İoan 13 - Ени Бааланты

Иисус йыкээр ӱӱрениӂилерин айакларыны

¹ Паскеллӓ йортусундан илерийди. Иисус билӓрди, ани гелди вакыт, гитсин бу дӱннедӓн Бобасына да, чӱнкӱ севди кендикилерини, ангылары варды бу дӱннедӓ, гӧстерди, ани север оннары биткийӓдӓн.

² Йорту софрасында диавол койдуйду Симон Искариотун оолунун Иуданын ӱреенӓ неети, ки сатсын Ону.

³ Иисус, Ангысы билӓрди, ани Боба хепсини верди Онун елинӓ, хем Кендиси Аллахтан чыкып-гелди да Аллаха дӧнер,

⁴ калкты софрадан, сойунду ӱст рубаларыны, алды бир пешкир да кушанды онуннан,

⁵ сора су дӧктӱ текнейӓ да башлады йыкамаа ӱӱрениӂилерин айакларыны хем силмӓӓ пешкирлӓн, ани кушалыйды.

⁶ Ачан йаклашты Симон Петрийӓ, Петри деди: «Сааби, Сӓн ми аӂаба йыкайасын беним айакларымы?»

⁷ Ӂувап етти Иисус она: «Не йапэрым, сӓн шинди аннамээрсын, ама аннайаӂан сора».

⁸ Петри деди: «Бир сыра билӓ йыкамайаӂан беним айакларымы!» Иисус ӂувап етти: «Еер Бӓн йыкамарсайдым сенин айакларыны, озаман олмайаӂэк пайын Бенимнӓн».

⁹ «Сааби, диил саде айакларымы, ама еллерими дӓ, башымы да!» – деди Симон Петри.

¹⁰ Иисус деди: «Йыканмышларын лӓӓзым салт айаклары йыканылсын, оннар хептӓн пак. Сиз дӓ паксыныз, салт диил хепсиниз».

¹¹ Зерӓ билӓрди, ким сатаӂэк Ону, онуштан деди: «Диилсиниз хепсиниз пак».

¹² Айакларыны йыкадыктан сора енидӓн гииди рубасыны да, ерлешип еринӓ, деди оннара: «Аннээрсыныз мы, не йаптым Бӓн сизӓ?

¹³ Сиз Бана „Ӱӱредиӂи“ хем „Сааби“ деерсиниз, доору сӧлеерсиниз, зерӓ Бӓн хакына ӧлӓйим.

¹⁴ Чӱнкӱ Бӓн, Саабиниз хем Ӱӱредиӂиниз, йыкадым сизин айакларынызы, сиз дӓ лӓӓзым йыкайасыныз бири-биринизин айакларынызы.

¹⁵ Зерӓ Бӓн гӧстердим сизӓ ӧрнек, ки сиз дӓ йапасыныз, не Бӓн сизӓ йаптым.

¹⁶ Доору, доору сӧлеерим сизӓ, ани чырак диил таа бӱӱк кенди чорбаӂысындан, хем йолланмыш олан – йоллайандан.

¹⁷ Чӱнкӱ буннары билирсениз, не мутлу олаӂэныз, таманнарсайдыныз.

Иисус сатыӂыйы ачты

¹⁸ Лафетмеерим хепсиниз ичин. Бӓн билерим оннары, кими айырдым, ама лӓӓзым таманнансын Айоз Йазылар, ани деер: „О, ким екмееми ийер, о тепмеледи Бени“.

¹⁹ Сӧлеерим сизӓ, таа олмадыйнан, ки ачан олаӂэк, инанасыныз, ани Бӓним.

²⁰ Доору, доору сӧлеерим сизӓ: ким кабледер ону, кими Бӓн йоллээрым, о Бени кабледер. Ким кабледер Бени, о кабледер Ону, Ким Бени йоллады».

²¹ Ачан Иисус сӧледи бу лафлары, гӱчленди да, ачык лафедип, деди: «Доору, доору сӧлеерим сизӓ, ани сиздӓн бириси Бени сатаӂэк».

²² Ӱӱрениӂилӓр бактылар бири-биринӓ да аннамадылар, кимин ичин лафедер.

²³ Ӱӱрениӂилердӓн бириси, ангысыны севӓрди Иисус, отурарды софрада, анык Иисусун куӂаана.

²⁴ Симон Петри она йапты нышан, ки сорсун, кимин ичин лаф гидер.

²⁵ Бу ӱӱрениӂи, ангысы аныкты Иисусун гӱӱсӱнӓ, сорду: «Сааби, кимдир о адам?»

²⁶ Иисус ӂувап етти: «О, кимӓ вереӂӓм бу букайы, ани банаӂам». Сора, банып букайы, верди Симон Искариотун оолуна Иудайа.

²⁷ Ачан Иуда алды букайы, шейтан гирди она. Иисус деди: «Не йапаӂан, тез йап».

²⁸ Кимсей оннардан, ани отурурдулар софрада, аннамадылар, нечин деди бу лафлары.

²⁹ Кимиси санарды, чӱнкӱ Иуда ташыйарды кесейи, Иисус истеди она демӓӓ: «Сатын ал, не лӓӓзым бизӓ йорту ичин, еки вер бишей фукааралара».

³⁰ Иуда, ачан алды букайы, хызлы чыкты дышары. Геӂӓ олмушту.

Ени сымарламак

³¹ Иуда дышары чыктыктан сора Иисус деди: «Шинди метинненди Адам Оолу, Аллах да метинненди Онда.

³² Чӱнкӱ Аллах метинненди Онда, озаман Аллах да метиннейеӂек Ону Кендиндӓ. Хич ойаланмадаан метиннейеӂек.

³³ Ушаӂыкларым! Аз вакыт булунаӂам сизиннӓн, аарайаӂэныз Бени, да ниӂӓ сӧледим иудейлерӓ, хеп ӧлӓ шинди сӧлеерим сизӓ: нерейи гидерим Бӓн, сиз гелӓмейеӂениз.

³⁴ Верерим сизӓ бир ени сымарламак: Севин бири-биринизи. Ниӂӓ Бӓн севдим сизи, ӧлӓ сиз дӓ севин бири-биринизи.

³⁵ Бутӱрлӱ хепси таныйаӂэклар, ани сиз Беним ӱӱрениӂилеримсиниз, еер севӓрсейдиниз бири-биринизи».

Иисус хаберлеер Петринин атылмасы ичин

³⁶ «Сааби, нерейи гидерсин?» – сорду Симон Петри. Иисус ӂувап етти: «Нерейи гидерим, сӓн шинди йок ниӂӓ гелӓсин Бенимнӓн, ама сора гелеӂӓн».

³⁷ «Сааби, нечин йок ниӂӓ шинди гидейим Сениннӓн? Бӓн кайылым верейим ӂанымы да Сенин ичин», – деди Петри.

³⁸ Иисус ӂувап етти: «Вереӂӓн ӂаныны мы Беним ичин? Доору, доору сӧлеерим сана, хороз ӧтӱнӂӓ, сӓн ӱч керӓ атылаӂан Бендӓн.