İoan 12 - Ени Бааланты

Марийа йаалээр Иисусу

¹ Алты гӱн Паскелледӓн илери Иисус гелди Вифанийа кӱӱйӱнӓ, нередӓ йашарды Лазар, ангысыны дирилтти ӧлӱдӓн.

² Орада хазырланды конуш Онун ичин. Марфа измет едӓрди, Лазар да оннардан бирисийди, ким Иисуслан билӓ софрадайды.

³ Марийа алды бир фунт пек паалы йаа, темиз нард кокулуу, йаалады Иисусун айакларыны да сачларыннан силӓрди. Бӱтӱн ичерси долду гӧзӓл нард кокусундан.

⁴ Ӱӱрениӂилердӓн бириси, Иуда Искариот, /Симонун оолу,/ ангысы сора сатты Иисусу, деди:

⁵ «Нечин сатылмады бу йаа ӱчӱз динара, да пара верилсин фукааралара?»

⁶ Бӧлӓ лафетти, диил ани ӂаны аӂыйарды фукааралар ичин, ама ани хырсызды. О тутарды кесейи да чаларды о гӱмӱшлердӓн, ани топланарды.

⁷ Иисус ӂувап етти: «Гӱӂендирмӓ карыйы, о буну /лӓӓзымды/ корусун Беним гӧмӱлмӓм ичин.

⁸ Фукааралар херзаман сизиннӓн олаӂэклар, ама Бӓн херзаман олмайаӂам».

⁹ Чойу иудейлердӓн аннадылар, ани Иисус Вифанийа кӱӱйӱндӓ, да гелдилӓр орайы, диил саде Иисусу гӧрмӓӓ, ама Лазары да, ангысыны ӧлӱдӓн дирилтти.

¹⁰ Бӱӱк попазлар неетлендилӓр, Лазары да ӧлдӱрсӱннӓр.

¹¹ Зерӓ чойу иудейлердӓн, онун бетеринӓ, гидип, Иисуса инанардылар.

Иисус гирер Иерусалимӓ

¹² Икинӂи гӱнӱ бир сӱрӱ инсан, ани гелдийдилӓр йортуйа, ачан ишиттилӓр, ани Иисус гелер Иерусалимӓ,

¹³ алдылар палма даллары да чыктылар Иисуса каршы, баарарак: «Осанна, иисӧзленмиш олсун Аллахын адына Гелӓн, Израилин Падишахы!»

¹⁴ Иисус булду бир ешек, пинди она атлы, ниӂӓ вар йазылы:

¹⁵ «Коркма Сионун кызы, сенин Падишахын сана гелеӂек атлы бир ешек кодуу ӱстӱндӓ».

¹⁶ Ӱӱрениӂилӓр баштан буннары аннамадылар, ама ондан сора, ачан Иисус метинненди, аклына гетирдилӓр, ани бӧлӓ Онун ичин йазылы, да онуштан инсан Она буну йапты.

¹⁷ О инсан, ани Иисусланды, ачан О Лазары дирилтти ӧлӱдӓн, шаатлык едӓрди бунун ичин.

¹⁸ Инсан онуштан чыкты Иисуса каршы, зерӓ ишитти, ани йапты бу нышаны.

¹⁹ Фарисейлӓр лафедӓрдилӓр бири-бириннӓн: «Гӧрерсиниз ми, ниӂӓ бишей етиштирмеерсиниз? Бак, бӱтӱн дӱннӓ Онун ардына гидер!»

Иисус хаберлеер Кенди ӧлӱмӱ ичин

²⁰ Оннарын, ким гелдийди Иерусалимдӓ баш иилтмӓӓ, варды биркач урум араларында.

²¹ Оннар йаклаштылар Филипӓ, ангысы Галилейанын Вифсаида касабасынданды, да дедилӓр она: «Чорбаӂы, истеериз гӧрелим Иисусу».

²² Филип гитти да сӧледи Андрейӓ. Оннар икиси гелдилӓр да сӧледилӓр Иисуса.

²³ Иисус ӂувап етти оннара: «Гелди саат, ки Адам Оолу метинненсин.

²⁴ Доору, доору сӧлеерим сизӓ, ани боодай тоому, ани, дӱшӱп ерӓ, ӧлмӓрсейди, йалныз калэр. Ама ӧлӓрсейди, чок берекет гетирер.

²⁵ Ким север кенди ӂаныны, о кайбедер ону. Ама ким паа коймээр кенди ӂанына бу дӱннедӓ, ону коруйуп, дивеч йашамак еденер.

²⁶ Еер биркимсей истӓрсейди измет етмӓӓ Бана, гелсин ардыма. Нередӓ Бӓн олаӂам, орада олаӂэк Беним изметкерим дӓ. Еер биркимсей измет едӓрсейди Бана, Боба она сайгы сӱреӂек.

²⁷ Шинди Бени кахыр басты. Не дейим Бӓн? Дейим: „Боба, куртар Бени бу аӂы замандан“? Ама Бӓн бунун ичин гелдим!

²⁸ Боба, метиннӓ Сӓн Кенди адыны!» Озаман гӧктӓн ишидилди бир сес, ани деди: «Метиннедим хем метиннейеӂӓм дӓ!»

²⁹ Инсаннар, ани орада дурарды, ишиттилӓр бу сеси да дедилӓр: «Гӧк гӱрӱлдеди!» Башкалары дедилӓр: «Бир ангил Онуннан лафетти!»

³⁰ Иисус ӂувап етти: «Бу сес ишидилди диил Беним ичин, ама сизин ичин.

³¹ Шинди даава олэр бу дӱннейӓ, шинди бу дӱннейин чорбаӂысы уурадылды дышары.

³² Ачан калдырылаӂам йукары бу ердӓн, чекеӂӓм хепси инсаны Кендимӓ.

³³ Бу лафларлан гӧстерди, несой ӧлӱмнӓн лӓӓзымды ӧлсӱн».

³⁴ Инсан ӂувап етти: «Биз ишиттик Закондан, ани Христос йашайаӂэк дивеч. Насыл вар ниӂӓ дейӓсин, ани Адам Оолу калдырылаӂэк, хем ким бу Адам Оолу?»

³⁵ Иисус деди оннара: «Айдыннык таа бир парча вакыт сизиннӓн олаӂэк. Гезин, некадар айдыннык сизиннӓн, сизи караннык капламасын дейни. Ким гезер каранныкта, билмеер, нерейи гидер.

³⁶ Некадар вакыт айдыннык сизиннӓн, инанын айдынныы, айдынныын ооллары оласыныз дейни». Иисус сӧледи бу лафлары, сора гитти да сакланды оннардан.

Иудейлерин инансызлыы

³⁷ Иисус йапты чок нышаннар оннарын ӧнӱндӓ, ама оннар хеп окадар инанмардылар Она,

³⁸ таманнансын дейни пророк Исайанын сӧзӱ, ани деди: «Сааби, ким инанды бизим насаатымызы? Кимӓ ачылды Аллахын куведи?»

³⁹ Онуштан инанамадылар, зерӓ Исайа таа деди:

⁴⁰ «Аллах оннарын гӧзлерини кӧӧр етти, ӱреклерини четиннетти, ки гӧрмесиннӓр гӧзлериннӓн, аннамасыннар ӱреклериннӓн да дӧнмесиннӓр Бана, ки алыштырайым оннары».

⁴¹ Исайа сӧледи бу ишлери, зерӓ гӧрдӱ Иисусун метинниини да лафетти Онун ичин.

⁴² Бакмайарак буна, чойу артык заабитлердӓн да Иисуса инандылар, ама фарисейлӓр бетеринӓ ачык сӧлӓмедилӓр, ки ууратмасыннар оннары синагогадан.

⁴³ Зерӓ таа чок севдилӓр инсандан метиннии, некадар Аллахтан метиннии.

⁴⁴ Иисус бӱӱк сеслӓн деди: «Ким инанэр Бана, о инанмээр Бана, ама инанэр Она, Ким Бени йоллады.

⁴⁵ Ким гӧрер Бени, гӧрер Ону, Ким Бени йоллады.

⁴⁶ Бӓн гелдим олмаа айдыннык бу дӱннедӓ, ким инанаӂэк Бана, калмасын каранныкта дейни.

⁴⁷ Еер биркимсей ишидӓрсейди Беним сӧзлерими да таманнамарсайды, она Бӓн даава кесмеерим, зерӓ Бӓн гелмедим даава кесмӓӓ дӱннейӓ, ама куртармаа.

⁴⁸ Ким атылэр Бендӓн хем каблетмеер Беним сӧзлерими, она вар ким даава кессин. О сӧз, ани сӧледим, даава кесеӂек она битки гӱндӓ.

⁴⁹ Нечинки Бӓн лафетмедим Бендӓн Кендимдӓн, ама Боба, ани йоллады Бени, Кендиси сымарлады, не сӧлейим хем не лафедейим.

⁵⁰ Билерим, ани Онун сымарламасы – дивеч йашамак. Онун ичин, не лафедерим, лафедерим ниӂӓ Бана Боба сымарлады».