İoan 10 - Ени Бааланты

Гӱдӱӂӱ хем сӱрӱ

¹ Доору, доору сӧлеерим сизӓ, ким койуннарын аулуна гирмеер капудан, ама атлээр башка ердӓн, о хырсыз хем хайдут.

² Ким гирер капудан, одур койуннарын гӱдӱӂӱсӱ.

³ Капуда дуран ачэр капуйу, да койуннар таныйэрлар гӱдӱӂӱнӱн сесини. О чаарэр хербир койуну адынӂа да дышары чыкарэр.

⁴ Ачан чыкарды хепси койуннарыны, сора гидер оннарын ӧнӱ сора, койуннар да гелерлӓр онун ардына, зерӓ таныйэрлар сесини.

⁵ Йабанӂынын ардына гитмеерлӓр, ондан качэрлар, зерӓ танымээрлар йабанӂынын сесини».

⁶ Иисус сӧледи бу ӧрнӓӓ оннара, ама оннар аннамадылар, не иш ичин о лафедӓрди.

⁷ Иисус енидӓн лафетти: «Доору, доору сӧлеерим сизӓ, ани Бӓним койуннарын капусу.

⁸ Хепси, ким гелди Бендӓн ӧнӂӓ, оннар хырсыз хем хайдут. Койуннар да оннары сеслӓмедилӓр.

⁹ Бӓним капу. Еер биркимсей гирирсейди Беним ашыры, олаӂэк куртулмуш, гиреӂек хем чыкаӂэк да отлайаӂак кендинӓ булаӂэк.

¹⁰ Хырсыз гелер салт чалмаа, ӧлдӱрмӓӓ хем йок етмӓӓ. Бӓн гелдим, ки койуннарын ташкынныктан йашамаклары олсун.

¹¹ Бӓн – ии гӱдӱӂӱйӱм. Ии гӱдӱӂӱ верер йашамасыны койуннары ичин.

¹² Ама йанашык адам, ким диил гӱдӱӂӱ, хем ким диил койуннарын чорбаӂысы, ачан гӧрер йабаныйы гелӓркӓн, бракэр койуннары да качэр, йабаны да, оннары капып, даадэр.

¹³ О адам качэр, зерӓ о йанашык, онун касавети йок койуннар ичин.

¹⁴ Бӓн – ии гӱдӱӂӱйӱм. Бӓн таныйэрым койуннарымы, оннар да таныйэрлар Бени,

¹⁵ ниӂӓ Боба таныйэр Бени, Бӓн дӓ таныйэрым Бобайы. Бӓн верерим йашамамы койуннарым ичин.

¹⁶ Бендӓ вар башка койуннар да, ани диил бу аулдан. Оннары да лӓӓзым гетирейим. Оннар сеслейеӂеклӓр Беним сесими. Озаман олаӂэк бир сӱрӱ хем бир гӱдӱӂӱ.

¹⁷ Боба север Бени, зерӓ Бӓн верерим йашамамы, енидӓн геери алайым дейни.

¹⁸ Кимсей ону зорлан алмээр Бендӓн, ама Бӓн Кенди истедиимдӓн верерим. Вар куведим верейим хем вар куведим геери алайым. Бу сымарламайы Бӓн каблеттим Беним Бобамдан».

¹⁹ Бу лафлардан сора енидӓн башлады кавга иудейлӓр арасында.

²⁰ Чойу оннардан дейӓрдилӓр: «Онда вар фена дух, О бир дели. Нечин сеслеерсиниз Ону?»

²¹ Башкалары дейӓрдилӓр: «Бу лафлар диил фена духлу адамын лафлары. Вар мы насыл бир фена дух ачсын кӧӧрларын гӧзлерини?»

Иисуса каршы душманнык артэр

²² Озаман олду Иерусалимдӓ йорту Айоз бинанын ачылмасынын анылмасы ичин. Кышынды.

²³ Иисус гезинӓрди Айоз бинанын аулунда, Соломонун колонадасында.

²⁴ Иудейлӓр Ону сардылар да дедилӓр: «Незаманадан койаӂан дӱшӱнмейӓ бизи? Сӧлӓ ачык бизӓ, Сӓнсин ми Христос?»

²⁵ Иисус ӂувап етти: «Бӓн сӧледим сизӓ, ама сиз инанмээрсыныз. О ишлери, ани йапэрым Бобамын адына, оннар шаатлык едерлӓр Беним ичин.

²⁶ Ама сиз инанмээрсыныз, зерӓ диилсиниз Беним койуннарымдан, /ниӂӓ сӧледим сизӓ/.

²⁷ Беним койуннарым сеслеерлӓр Беним сесими. Бӓн таныйэрым оннары, оннар да гелерлӓр Беним ардыма.

²⁸ Бӓн верерим оннара дивеч йашамак, оннар хич бир вакыт кайбелмейеӂеклӓр. Кимсей капамайаӂэк оннары Беним елимдӓн.

²⁹ Беним Бобам, ани верди оннары Бана, О хепсиндӓн таа бӱӱк. Кимсей йок ниӂӓ капсын оннары Беним Бобамын елиндӓн.

³⁰ Бӓн хем Боба бириз».

³¹ Иудейлӓр енидӓн таш алдылар, ташлан урсуннар Она.

³² Иисус деди: «Чок ии ишлӓр гӧстердим сизӓ Бобамдан. Бу ишлерин ангысы ичин истеерсиниз Бени ташлан дӱӱмӓӓ?»

³³ Иудейлӓр ӂувап еттилӓр: «Бакмээрыз бир ии иш ичин ташлан Сени дӱӱмӓӓ, ама Аллахы кӧтӱлемӓк ичин, зерӓ Сӓн адамсын, ама Кендини Аллах йапэрсын».

³⁴ Иисус деди: «Диил ми йазылы сизин законунузда: „Бӓн дедим: сиз аллахларсыныз“?

³⁵ Аллах оннара деди „аллахлар“, кимӓ йоллады сӧзӱнӱ. Олмаз Айоз Йазы бозулсун.

³⁶ Бӧлейсӓ, Бӓн, Кими Боба айозлады да йоллады дӱннейӓ, сизин лафыныза гӧрӓ чыкэр, ани кӧтӱлеерим Аллахы, салт онуштан, ани дедим: „Аллахын Оолуйум“.

³⁷ Еер йапмарсайдым Беним Бобанын ишлерини, озаман инанмайын Бени.

³⁸ Ама йапарсайдым, озаман, еер инанмарсайдыныз да Бени, инанын баарлем ишлери. Озаман аннайаӂэныз хем билеӂениз, ани Боба Бендӓ, Бӓн дӓ Онда».

³⁹ Оннар енидӓн бактылар тутсуннар Ону, ама О куртулду оннарын елиндӓн.

⁴⁰ Иисус енидӓн гитти Иорданын ӧбӱр тарафына, нередӓ Иоан ӧнӂӓ ваатиз едӓрди, да калды орада.

⁴¹ Чойу гелӓрдилӓр Она да дейӓрдилӓр: «Иоан йапмады бир дӓ нышан, ама хепси, не сӧледи Иоан бу адам ичин, аслы чыкты».

⁴² Чойу инандылар Она орада.