İakovun 5 - Ени Бааланты

Азар зенгиннерӓ

¹ Сеслейин шинди, сиз, зенгиннӓр! Аалайын хем сызлайын белалар ичин, ани башыныза гелер.

² Зенгиннииниз чӱрӱдӱ, рубаларынызы гӱвелӓр иди.

³ Сизин алтыннар хем гӱмӱшлӓр кӱфленди. Кӱфлери сизӓ каршы шаатлык едеӂек, сизин етинизи атеш гиби кемиреӂек. Сиз не хазырладыныз кендинизӓ, битки гӱннӓр ичин топладыныз.

⁴ Тӓ ишчилерин ӧдеклери, ангылары бичтилӓр сизин кырларынызы, да ангыларынын ӧдеклерини сиз йаланнан дургуттунуз, шинди баарэр Бана. Оракчыларын аалайышы куветли Саабинин кулаана етишти.

⁵ Сиз йашадыныз бу ердӓ сефалыкта, кенди беендиинизӓ гӧрӓ. Кендинизи беслединиз, сансын бир кесилеӂек гӱн ичин.

⁶ Сиз кабаатландырдыныз хем ӧлдӱрдӱнӱз кабаатсыз инсаннары, ангылары сизӓ каршы дурамадылар.

Дайанын, Саабинин гелмеси йакын

⁷ Онуштан, кардашлар, Саабинин гелмесинӓ кадар дайанын. Тӓ бакын, чифтчи дайанмаклан беклеер ерин паалы берекедини, каблединӂӓ еркен хем геч йаамуру.

⁸ Сиз дӓ дайанын, ӱреклеринизи каавилейин, зерӓ Саабинин гелмеси йаклашэр.

⁹ Мырылданмайын бири-биринизӓ каршы, кардашлар, башка тӱрлӱ кабаатлы калэрсыныз. Тӓ, дааваӂы капу ӧнӱндӓ дурэр!

¹⁰ Кардашларым, ӧрнек алын пророклардан, ангылары зор вакытларда дайандылар да Саабинин адына лафеттилӓр.

¹¹ Биз мутлу сайэрыз оннары, ким дайанэр. Сиз ишиттиниз Иовун дайанмасы ичин хем гӧрдӱнӱз, не биткидӓ Сааби йапты онун ичин. Сааби чок аӂыйан хем йалпак ӱрекли.

¹² Хепсиндӓн ӧнӂӓ, кардашларым, емин етмейин не гӧклӓн, не ерлӓн, не дӓ бир башка еминнӓн. Лафыныз олсун: «ӧлӓ – ӧлӓ» хем «олмаз – олмаз», ки кабаатлы булунмайасыныз.

Дуанын куведи

¹³ Сиздӓн биркимсей зеетленӓр ми? Ко дуа етсин. Бириси шен ми? Ко тӱркӱ чалсын.

¹⁴ Сиздӓн биркимсей хаста мы? Ко чаарсын клисенин пресвитерлерини, да дуа етсиннӓр онун ичин, йаалайып ону Саабинин адына зейтин йаайыннан.

¹⁵ Дуа, ани инаннан йапылы, хастайы куртараӂэк, да Сааби ону айаа калдыраӂэк. Хаста гӱнах йаптысайды, афедилеӂек.

¹⁶ Ачык сӧлейин бири-биринизӓ кабаатларынызы хем дуа един бири-бириниз ичин, ки саа оласыныз. Бир доору адамын дуасы чок куветли хем чок йапабилер.

¹⁷ Илийа бизим гиби бир адамды. О маасуз, йаамур йаамасын, дуа етти, да йаамур йаамады ер ӱстӱнӓ ӱч йыл хем алты ай.

¹⁸ Сора енидӓн дуа етти, да гӧк йаамур верди, хем ердӓ берекет олду.

¹⁹ Кардашлар, еер сиздӓн бириси сапарсайды хакына йолдан, да биркимсей ону геери чевирӓрсейди,

²⁰ ко билсин, ани ким гӱнахкери шашырык йолдан чевирди, о ӧлӱмдӓн бир ӂан куртарды хем чок гӱнах ӧрттӱ.