İakovun 3 - Ени Бааланты

Дилимизи кулланмак

¹ Кардашларым, чойунуз ӱӱредиӂи олмайын, зерӓ билерсиниз, ани бизӓ бир таа кескин даава олаӂэк.

² Зерӓ хепсимиз чок сыра йанылэрыз. Ким лафлан йанылмээр, о таман адам, ангысы вар ниӂӓ тутсун чылбырда бӱтӱн гӱӱдесини.

³ Биз бейгирлерин аазларына кантырма койэрыз, ки тербеелейелим оннары. Бутӱрлӱ оннарын бӱтӱн гӱӱделерини кулланэрыз.

⁴ Йа бакын, не бӱӱк гемилӓр серт лӱзгерлердӓн гӧтӱрӱлер, ама не кӱчӱк дӱменнӓн кулланылы, оннар гидерлӓр орайы, нерейи гемиӂи истеер.

⁵ Хеп ӧлӓ дил дӓ, гӱӱдедӓ кӱчӱк бир ек, ама бӱӱк ишлӓрлӓн ӱӱнӓр. Бакын, бир кӱчӱк атеш не бӱӱк бир даа тутуштуруп-йакэр.

⁶ Дил дӓ атеш гибидир, гӱӱдемизин еклери арасында бир кӧтӱлӱк дӱннеси. Дил бӱтӱн гӱӱдемизи кирледер хем йашамамызын текерлеени кыздырэр, зерӓ кенди дӓ ӂендем атешиндӓн кыздырылан.

⁷ Хербир сой ӂанаварлар, кушлар, сӱрӱненнӓр хем дениздӓ йашайаннар адамдан запланды.

⁸ Ама дили кимсей заплайамээр. О бир феналык, долу ӧлӱм зихириннӓн, ангысыны кимсей дургудамээр.

⁹ Дилимизлӓн Аллах Бобайы метиннеериз, хеп о дилимизлӓн инсаннары бетвалээрыз, ангылары Аллаха тыпкы йарадылды.

¹⁰ Хеп бир ааздан чыкэр хем метинник, хем бетва! Олмаз бӧлӓ олсун, кардашларым.

¹¹ Олур му насыл бир сызынтыдан аксын хем татлы, хем аӂы су?

¹² Кардашларым, йок насыл инӂир фиданы йапсын зейтин, йада баа чотуу йапсын инӂир. Хеп ӧлӓ, йок насыл бир сызынтыдан аксын хем тузлу, хем татлы су.

Ики сой аарифлик

¹³ Ким сизин аранызда аариф хем акыллы? Кенди йаптыкларыны гӧстерсин ии ташымасыннан хем мӱнӱзлӱклӓн, ани аарифликтӓн гелер.

¹⁴ Ама еер сизин ӱреениздӓ варсайды кин, кысканчлык хем кендини севмӓк, йок нечин ӱӱнӓсиниз хем аслылыы йаландырасыныз.

¹⁵ Бусой аарифлик йукардан инмӓз, ама гелер ердӓн, инсан табеетиндӓн, фена духлардан.

¹⁶ Зерӓ нередӓ кысканчлык хем кӓрӂылык, орада сырасызлык хем хертӱрлӱ фена ишлӓр.

¹⁷ Ама йукардан инӓн аарифлик хепсиндӓн ӧнӂӓ темиз, сора услу, йалпак, сеслейиӂи, долу аӂыйанныклан хем ии ишлӓрлӓн, ӱзӓ бакмаз, икиӱзлӱ олмаз.

¹⁸ Доорулуун мейвасы екилир услулукта оннардан, ким услулук ичин чалышэр.