Galatіyalılara 4 - Ени Бааланты

¹ Буну демӓӓ истеерим: некадар вакыт мирасчы ушак булунэр, о бишейлӓн чырактан айырылмээр, макар ки чорбаӂы хепсинӓ.

² О бакыӂыларын хем векиллерин запында о вакыдадан, незаманадан бобасы беннеди.

³ Бутӱрлӱ биз дӓ, некадар вакыт духчасына ушактык, окадар вакыт чырак булунардык дӱннейин башланкы ӱӱретмеклеринӓ.

⁴ Ама, ачан вакыт таманнанды, Аллах бизӓ Кенди Оолуну йоллады, Ангысы дууду карыдан да йашады Законун запында,

⁵ ки куртарсын оннары, ким булунэр Законун запында, да бусой ооллук еденелим.

⁶ Чӱнкӱ ооллук едендиниз, Аллах Кенди Оолунун Духуну ӱреенизӓ йоллады, ани баарэр «Авва!» – аннамасы «Боба!»

⁷ Онуштан сӓн шиндӓн сора диилсин чырак, ама оол, да чӱнкӱ оол олдун, Аллах сени мирасчы йапты.

Павлинин кахыры галатийалылар ичин

⁸ Вакыдын бириндӓ, ачан танымардыныз Аллахы, чырак булунардыныз аллахлара, ангылары диил хакына аллах.

⁹ Ама шинди таныйэрсыныз Аллахы, таа доорусу, Аллах сизи таныйэр. Ӧлейсӓ, насыл енидӓн геери дӧнерсиниз йуфка хем паасыз башланкы ӱӱретмеклерӓ, ангыларына сиз енидӓн чырак олмаа истеерсиниз?

¹⁰ Тутэрсыныз гӱннери, айлары, вакытлары хем йыллары.

¹¹ Сизин ичин коркэрым, сиздӓ савашмам наафилӓ калмасын.

¹² Кардашлар, йалварэрым, олун беним гиби, зерӓ бӓн дӓ олдум сизин гиби. Сиз бишейлӓн бана зарар йапмадыныз.

¹³ Ниӂӓ билерсиниз, илк сыра насаат еттим сизӓ Ии Хабери, чӱнкӱ гӱӱдейӂесинӓ хастайдым.

¹⁴ Бу хасталыым сизӓ бир денемӓкти. Буна бакмайарак, сиз бени ашааламадыныз хем рететмединиз. Сиз бени, ниӂӓ Аллахын ангилини, каблеттиниз, ниӂӓ Иисус Христозу Кендини.

¹⁵ Не олду о мутлулуктан, ани озаман дуйардыныз? Шаатлык едерим, ани еер олайды колай, сиз чыкараӂэйдыныз кенди гӧзлеринизи да бана вереӂейдиниз.

¹⁶ Аӂаба, шинди бӓн сизӓ душман мы олдум, чӱнкӱ аслысыны сӧледим?

¹⁷ О адамнар сизи казанмаа гиришерлӓр, ама диил ии неетлӓн. Салт истеерлӓр сизи биздӓн айырсыннар, ки оннар ичин чалышасыныз.

¹⁸ Иидир, диил саде ачан бӓн араныздайым, чалышкан оласыныз, ама херзаман.

¹⁹ Бӓн сизин ичин, ушакларым, енидӓн ана зеетлериндейим, о вакыдадан, ачан сиз етишеӂениз Христос гиби оласыныз.

²⁰ Некадар истӓрдим шинди сизиннӓн олайым да сесими дииштирейим, зерӓ шашэрым бу халыныза!

Агар хем Сарра

²¹ Сӧлейин бана сиз, ким Айоз Законун запында олмаа истеерсиниз, не, билмеерсиниз ми, не деер Закон?

²² Вар йазылы, ани Авраамын ики оолу варды: бириси чырак карыдан, ӧбӱрӱ сербест карыдан.

²³ Оолу чырак карыдан ӧбӱр адамнар гиби дууду, ама оолу сербест карысындан Аллахын адамасына гӧрӓ дууду.

²⁴ Буннары лӓӓзым аннамаа бир бензетмӓк гиби. Бу карылар – ики бааланты: бириси Синай байырындан, чыраклык ичин дуудуран, ангысы Агар.

²⁵ Агар – Аравийада Синай байырыдыр, да шиндики Иерусалимӓ бензеер, зерӓ о шинди чыраклыкта булунэр ушакларыннан барабар.

²⁶ Ама гӧктеки Иерусалим сербест. Одур бизим анамыз.

²⁷ Зерӓ вар йазылы: «Севин сӓн, ушак дуудурамайан кары, ани хич дуудурмадын. Сесини калдыр да баар, сӓн, ани дуудурмак аарысы чекмедин, зерӓ бракылмыш карынын таа чок ушаа олаӂэк, некадар онун, кимин коӂасы вар».

²⁸ Кардашлар, сиз дӓ, ниӂӓ Исаак, Аллахын адамасына гӧрӓ дуулмуш ушакларсыныз.

²⁹ Ама ниӂӓ озаман оол, ким дууду ӧбӱр адамнар гиби, кооларды ону, ким дууду Аллахын Духунун сӧзӱнӓ гӧрӓ, хеп ӧлӓ олэр бӱӱн дӓ.

³⁰ Ама не деер Айоз Йазы? «Коола чырак карыйы хем онун оолуну, зерӓ чырак карынын оолу мирасчы олмайаӂэк барабар сербест карынын оолуннан».

³¹ Ӧлӓ ки, кардашлар, биз диилиз чырак карынын ушаклары, ама сербест карынын.