Fіlіplіlerä 4 - Ени Бааланты

Битки насаатлар

¹ Ӧлӓ ки, севгили кардашларым, ангыларыны чок ӧзледим, беним севинмелиим хем фенецим, бӧлӓ каави дурасыныз Саабидӓ, севгилилӓр.

² Йалварэрым Еводийайа, йалварэрым Синтихийӓ, Саабидӓ олун бир аннамакта.

³ Сӓн дӓ, Сизиг, хакына кафадарым, йардым ет бу карылара, ани саваштылар Ии Хабери насаат етмӓӓ бенимнӓн, Клементлӓн хем каланнарлан, ани бенимнӓн ишлеерлӓр, ангыларын адлары йазылы йашамак кийадында.

⁴ Севинин Саабидӓ херзаман, таа бир сыра деерим, севинин.

⁵ Сизин йалпаклыыныз хепси инсаннардан билинсин. Сааби йакын.

⁶ Кахырланмайын бишей ичин, ама хертӱрлӱ дуада хем йалвармакта ачын сизин истемеклеринизи Аллахын ӧнӱндӓ шӱкӱрлӱклӓн.

⁷ Озаман Аллахын селемети, ани таа ӱӱсек хербир акылдан, коруйаӂэк сизин ӱреклеринизи хем фикирлеринизи Иисус Христозда.

⁸ Биткидӓ, кардашларым, не вар хакына, сайгылы, доору, темиз, севимни хем майыл, не вар ии хем метинни, оннар ичин дӱшӱнӱн.

⁹ Не ӱӱрендиниз, каблеттиниз, ишиттиниз хем гӧрдӱнӱз бендӓ, оннары таманнайын, да селемет верӓн Аллах сизиннӓн олаӂэк.

Павлинин шӱкӱрӱ

¹⁰ Бӓн пек севиндим Саабидӓ, ани сиз енидӓн башладыныз беним ичин меракланмаа. Сиз херзаман меракланардыныз беним ичин, ама йокту колайлыыныз.

¹¹ Деерим буну, диил ани беним зорум вар. Зерӓ бӓн ӱӱрендим шӱкӱр олайым о халда, ангысында булунэрым.

¹² Билерим йашамаа, ниӂӓ йоклукта, хеп ӧлӓ боллукта да. Ӱӱрендим секрети, ани херердӓ, хербир халда, ниӂӓ ток олайым, хеп ӧлӓ аач да дурайым, ниӂӓ боллукта, хеп ӧлӓ зорлукта да булунайым.

¹³ Хепсини беӂерерим Христозда, ани бени каавилеер.

¹⁴ Ама сиз ии йаптыныз, ани бенимнӓн пай алдыныз беним зеетлеримдӓ.

¹⁵ Сиз дӓ, Филиплилӓр, билерсиниз, ани ачан Ии Хабер даалмаа башлады, да бӓн чыктым Македонийадан, бир дӓ клисӓ пай алмады йардым вермектӓ хем насаат каблетмектӓ, сиздӓн каарӓ.

¹⁶ Бӓн Салониктӓ булунаркан, сиз биркач сыра йардым йолладыныз бана, ачан зорум варды.

¹⁷ Сӧлеерим буну, диил ани баашыш аарээрым. Терсинӓ, аарээрым бир казанч сизин файданыз ичин.

¹⁸ Бендӓ хепси вар, боллукта йашээрым. Бӓн токум, каблеттим, нейи Епафродитин елиннӓн йолламышыныз. Бу – ниӂӓ гӧзӓл кокулу бир баашыш, бир курбан, ангысыны Аллах кабледер хем беенер.

¹⁹ Аллахым да долдураӂэк хепси сизин лӓӓзымныкларынызы Кенди зебилликтӓн зенгинниинӓ гӧрӓ Иисус Христозда.

²⁰ Аллах Бобамыза олсун метинник дивечтӓн дивеӂӓ! Амин.

²¹ Селӓмнейин Иисус Христозун бӱтӱн айоз халкыны. Кардашлар, ани бенимнӓн, сизӓ селӓм йоллээрлар.

²² Аллахын бӱтӱн айоз халкы, хепсиндӓн чок – Кесарын евиндекилӓр, сизӓ селӓм йоллээрлар.

²³ Сааби Иисус Христозун иивергиси олсун сизин духунузлан. /Амин./