Fіlіplіlerä 3 - Ени Бааланты

Хакына доорулук

¹ Биткидӓ, кардашларым, севинин Саабидӓ. Бана диил аар йазмаа сизӓ хеп о ишлери, зерӓ бу сизи зарардан коруйар.

² Корунун о кӧпеклердӓн! Корунун кӧтӱлӱк йапаннардан! Корунун кесиклик касапларындан!

³ Зерӓ хакына кесикли – биз, ани духча измет едериз Аллаха, ӱӱнериз Иисус Христозлан хем умудумузу коймээрыз инсан ишлеринӓ.

⁴ Аслыда бӓн дӓ вар ниӂӓ умудуму койайым инсан ишлеринӓ. Еер биркимсей санарса, ани вар насыл умутлансын инсан ишлеринӓ, бӓн таа чок умутланабилерим.

⁵ Секизинӂи гӱнӱ дуумактан кесиклийим, Израил миллетиндӓн, Вениамин тамызлыындан, чыфытлардан чыфыт, Айоз Закона гӧрӓ фарисей.

⁶ Кыйаклыклан клисейи коолардым. Еер лафедӓрсӓк доорулук ичин, ани Айоз Законда темелли, бӓн кабаатсыздым.

⁷ Ама недӓ бӓн ӱстӱндӱм, ону кайыплык сайдым Христос ичин.

⁸ Бундан таа чок, хепсини сайэрым кайыплык, бакарак, некадар таа ӱстӱндӱр танымак Христос Иисусу, беним Саабими. Христос ичин хепсини кайбеттим хем гӱбӱр сайэрым, ки еденӓбилейим Христозу

⁹ да булунайым Онда, диил кенди доорулуумнан, ани Закондан гелер, ама доорулуклан, ани Аллахтан гелер инаннан Христоза да инанда темелли.

¹⁰ Истеерим таныйым Ону хем дирилмесинин куведини, пай алайым Онун зеетлериндӓн хем ӧлӱмӱннӓн Она бензӓр олайым,

¹¹ несой да олса, етишӓбилейим ӧлӱлерин дирилмесинӓ.

Качалым чизгийӓ доору

¹² Диил, ки демӓӓ, ани шиндӓн сора каблеттим еки таман олдум, ама чалышэрым, ки еденейим, ниӂӓ Христос бени еденди.

¹³ Кардашлар, саймээрым, ани бӓн едендим, салт буну йапэрым: геерисини унударак да ӧнӱмдӓ ишлерӓ узанарак,

¹⁴ качэрым о уура етишмӓӓ чизгийӓ, ки ӧдӓӓ казанайым – гӧктӓ йашамайы, ангысына Аллах чаарды бени Иисус Христозда.

¹⁵ Онуштан хепсимиз, ким духча ергин, лӓӓзым бӧлӓ дӱшӱнелим. Еер сиздӓ варса башка бир неет бишей ичин, Аллах буну да ачаӂэк сизӓ.

¹⁶ Ама нейлӓн бир аннамайа гелдик, ону ӧлӓ дӓ туталым.

¹⁷ Бана бензӓр олмаа чалышын, кардашлар, да ислӓӓ бакын оннара, ким йашээр о ӧрнӓӓ гӧрӓ, ангысыны биз сизӓ вердик.

¹⁸ Зерӓ чойу оннардан, кимин ичин чок сыра сӧледим сизӓ, шинди дӓ сӧлеерим аалайарак, йашээрлар ниӂӓ Христозун ставрозунун душманнары.

¹⁹ Оннарын сону кайыплык олаӂэк. Оннарын аллахы – кенди шкембелери, да ӱӱнерлӓр онуннан, недӓн лӓӓзым утансыннар. Оннар дӱшӱнерлӓр ердеки ишлӓр ичин.

²⁰ Бизим ватанымыз са гӧклердӓ, нередӓн беклеериз Куртарыӂыйы, Сааби Иисус Христозу,

²¹ Ангысы бизим бу дӱшкӱн гӱӱдемизи дииштиреӂек да йапаӂэк Кенди шанны гӱӱдесинӓ бензӓр олсун, файдалайарак о куведи, ангысыннан О вар насыл запетсин хепсини.