Efeslіlerä 4 - Ени Бааланты

Гӱӱденин бирлии

¹ Бутакым насаатлээрым сизи бӓн, Сааби ичин капанӂы, йашаманыз йакышыклы олсун Онун чаармасына гӧрӓ, ангысыны каблеттиниз.

² Херзаман йаваш, йалпак хем сабурлу олун, дайанын бири-биринизӓ севгийлӓн.

³ Чалышын корумаа Духун бирлиини услулуклан, ани баалээр сизи бири-биринизлӓн.

⁴ Бир гӱӱдӓ вар хем бир Дух, ниӂӓ сиз чаарылдыныз бир умуда, ани гелер чаарылманыздан,

⁵ Бир Сааби, бир инан, бир ваатизлик.

⁶ Аллах бирдир, Боба хепсинӓ. О хепсиндӓн ӱстӱн, хепсиннӓн ишлеер хем хепсиндӓ йашээр.

⁷ Херкезимизӓ бизӓ ииверги верилди о ӧлчӱйлӓн, не Христос баашлады.

⁸ Онуштан денди: «Ӱӱсеклӓӓ калкты, есирлери пленӓ алды, инсаннара баашышлар верди».

⁹ Лафын «калкты» не аннамасы вар, еер диилсӓ бу, ани илкин инди ашаа, ер ӱстӱнӓ?

¹⁰ О, Ким инди, Одур, Ким калкты таа ӱӱсек хепси гӧклердӓн, ки хепсини долдурсун.

¹¹ О койду кимисини апостол, башкасыны пророк, башкасыны ии хаберӂи, таа башкасыны пресвитер хем ӱӱредиӂи,

¹² ки хазырласыннар Аллахын айоз халкыны изметчилик йапмаа, Христозун гӱӱдесини йывмаа,

¹³ озаманадан, ачан хепсимиз инаннан хем Аллахын Оолуну танымаклан етишеӂез бирлӓӓ, олгун адамнаа, Христозун йашларынын бӱтӱн ӧлчӱсӱнӓ.

¹⁴ Озаман артык олмайаӂэз ушаклар гиби, ангылары салланэрлар далгаларлан хем сӱрӱкленерлӓр лӱзгерлӓрлӓн – хертӱрлӱ ӱӱренмӓклӓн, ани инсаннар гетирерлӓр шалвирликлӓн хем ширетликлӓн, ки башкаларыны, алдадып, йолдан саптырсыннар.

¹⁵ Ама, аслылаа гӧрӓ севгиликтӓ йашайарак, хер тарафтан бӱӱйеӂез да етишеӂез Она, Ким Баштыр, Христоза,

¹⁶ Ангысындан бӱтӱн гӱӱдӓ уйгун бирликтӓ топлу хем сыкы баалы хертӱрлӱ еклерин йардымыннан. Ачан хербир ек дӱзгӱн ишлеер, гӱӱдӓ бӱӱйер хем севгиликтӓ каавилешер.

Ески йашамак хем ени йашамак

¹⁷ Онуштан тӓ не сӧлеерим хем йалварэрым Саабинин адыннан: артык йашамайын, ниӂӓ тайфӓннар йашээрлар, кенди бош дӱшӱнмеклеринӓ гӧрӓ.

¹⁸ Оннарын фикирлери карарды, Аллахын йашамасына йабанӂы олдулар, зерӓ билмезлӓӓ дӱштӱлӓр хем ӱреклери инатлашты.

¹⁹ Етиштилӓр дуйгусузлаа да верилдилӓр айып ишлерӓ. Онуштан тамахлыклан йапэрлар хертӱрлӱ диилпаклык.

²⁰ Ама сиз Христозу бӧлӓ ӱӱренмединиз.

²¹ Шӱпесиз, Онун сесини ишиттиниз хем Ондан ӱӱрендиниз, зерӓ аслылык Иисуста.

²² Бутакым, гечмиш йашаманыза гӧрӓ бракылын ески адамныктан, ангысы бозулэр алдангач хавезлӓрлӓн.

²³ Аклыныз духча таазеленсин,

²⁴ хем гиинин ени адамныы, ани йарадылмыш Аллаха бензесин дейни, хакына доорулуклан хем айозлуклан.

²⁵ Онуштан бракылын йаландан, доору лафедин йакын оланынызлан, зерӓ биз бир гӱӱденин еклерийиз.

²⁶ «Ӱфкеленӓрсениз, гӱнаха гирмейин». Ӱфкениз ӱстӱнӓ гӱн каушмасын,

²⁷ диавола ер вермейин.

²⁸ Ким хырсызлык йапарды, шиндӓн сора хырсызлык йапмасын. Терсинӓ, чалышсын да кенди еллериннӓн файдалы ишлӓр йапсын, ки олсун колай йоклукта оланнара йардым етсин.

²⁹ Бир дӓ бозук лаф сизин аазыныздан чыкмасын, ама салт ии лаф, ани духча каавилеер инсаннары, ниӂӓ дӱшер, ки сеслейеннерӓ ииверги версин.

³⁰ Гӱӂендирмейин Аллахын Айоз Духуну, Ангысыннан мӱхӱрлендиниз куртулмак гӱнӱ ичин.

³¹ Хертӱрлӱ аӂыламак, кызгыннык, ӱфкӓ, баармак, фена лаф хем хертӱрлӱ кӧтӱ неет сиздӓн узак олсун.

³² Ама бири-биринизлӓн ии ӱрекли хем йалпак олун. Бири-биринизи афедин, ниӂӓ Аллах Христозда сизи афетти.