Efeslіlerä 2 - Ени Бааланты

Ӧлӱмдӓн йашамайа гечтик

¹ Сиз ӧлӱйдӱнӱз кабаатларыныз хем гӱнахларыныз бетеринӓ,

² ангыларда вакыдын бириндӓ йашардыныз бу дӱннейин адетинӓ гӧрӓ, излейерӓк ӧндерӂийи, ани заабитлик едер гӧкӱн алтында, о духу, ани ишлеер сеслӓмейӓн инсаннарда.

³ Оннарын арасында биз хепсимиз дӓ вакыдын бириндӓ йашардык тенимизин хавезлеринӓ гӧрӓ. Таманнардык тенимизин хем аклымызын истедиклерини. Хализ халымызда биз даавалы олмуштук Аллахын ӱфкесинӓ, ниӂӓ дӓ калан инсаннар.

⁴ Ама Аллах, ӂӧмерт аӂыйанныыннан, бизи чок севди.

⁵ Макар ки биз ӧлӱйдӱк кабаатларымыз бетеринӓ, О севгийлӓн йашамак верди бизӓ Христозлан барабар. Сиз Онун иивергисиннӓн куртулдунуз.

⁶ Аллах дирилтти бизи Иисус Христозда да отуртту Онуннан барабар гӧклердӓ,

⁷ ки гелӓр заманнарда гӧстерсин иивергисинин кенарсыз зенгинниини ииликлӓн, ани йапты бизим ичин Иисус Христозда.

⁸ Зерӓ сиз Онун иивергисиннӓн, инаннан куртулдунуз. Бу диил сиздӓн, ама баашыш Аллахтан,

⁹ диил йаптыкларыныздан, кимсей ӱӱнмесин дейни.

¹⁰ Зерӓ биз – Аллахын усталыы, Иисус Христозда йарадылы, ки йапалым ииликлери, не Аллах ӧнӂӓ хазырлады, ки йашаркан таманнайалым.

Аллахын ени инсаны

¹¹ Онуштан унутмайын, не вардыныз бир вакытлар. Сиз тенӂесинӓ тайфӓндыныз. Оннар, кимин ады «кесикли», сизӓ «кесиксиз» деерлӓр, макар ки кесиклик инсан елиннӓн гӱӱдедӓ йапылэр.

¹² Унутмайын, ани сиздӓ озаман Христос йокту, Израил ватандашлыындан кесилмиштиниз, йабанӂыйдыныз баалантылара, ани темелленмиш Аллахын адамакларына, умутсуз хем Аллахсыздыныз бу дӱннедӓ.

¹³ Шинди сӓ Иисус Христозда сиз, ани вакыдын бириндӓ Аллахтан узактыныз, йакын олдунуз Христозун каныннан.

¹⁴ Зерӓ Одур бизим услулук, Ангысы икидӓн бир йапты, да Кенди гӱӱдесиннӓн дувары йыкты, ани арамызда дурарды, да душманнык йарадарды.

¹⁵ О Айоз Закону сымарламакларыннан хем сыраларыннан куветсиз йапты, ки, услулук гетирип, икисиндӓн бир ени адам йапсын Кендисиндӓ,

¹⁶ ки ставрозда ӧлмӓклӓн икисини дӓ бир гӱӱдедӓ Аллахлан барыштырсын. Бунуннан душманныы йок етти.

¹⁷ О, гелип, гетирди услулуун ии хаберини сизӓ, узак оланнара хем йакын оланнара.

¹⁸ Зерӓ О колайлык верди, ки биз икимиз дӓ бир Духун йардымыннан Бобайа йаклашалым.

¹⁹ Бутакым сиз шиндӓн сора не йабанӂы, не дӓ мусаафирсиниз, ама ватандаш Аллахын айоз халкыннан хем Онун айлесинин еклери.

²⁰ Сиз апостолларын хем пророкларын темели ӱстӱнӓ йывылдыныз, нередӓ Кенди Иисус Христос – кӧшӓ ташы.

²¹ Онда бӱтӱн йапы, уйгун бирликтӓ топлу, ӱӱселип, олсун бир айоз бина Саабинин изметиндӓ.

²² Сиз йапынэрсыныз о бинада, ки олсун ер, нередӓ Аллах Духлан йашасын.