Efeslіlerä 1 - Ени Бааланты

Селӓм

¹ Бӓн, Павли, Аллахын истедиинӓ гӧрӓ Иисус Христозун апостолу, селӓм йоллээрым Аллахын айоз халкына Ефес касабасында, инанӂылара Иисус Христозда.

² Ииверги хем услулук сизӓ Аллах Бобадан хем Сааби Иисус Христоздан.

Ииликлӓр Христозда

³ Аллах метинненмиш олсун, бизим Сааби Иисус Христозун Бобасы, Ани гӧклердӓ иисӧзледи бизи Христозда хертӱрлӱ духча иисӧзлемеклӓрлӓн.

⁴ Зерӓ О бизи сечти Христозда дӱннейин курулмасындан ӧнӂӓ, ки биз Онун ӧнӱндӓ севгидӓ айоз хем кусурсуз олалым.

⁵ О ӧнӂӓ карарлады, Кендисинӓ ааретлик алсын бизи Иисус Христозун араӂылыыннан, Кенди истемесинӓ хем ии курулмушуна гӧрӓ,

⁶ ки метедилсин Онун шанны иивергиси, ани баашлады бизӓ Кенди севгили Оолунда.

⁷ Христозда куртулмак едендик Христозун каныннан, гӱнахларымыз афедилди Аллахын ӂӧмерт иивергисиннӓн,

⁸ ангысыны болдан бола верди бизӓ. Хертӱрлӱ аарифликлӓн хем акыллылыклан

⁹ О ачты бизӓ Кенди саклы истедиини, ии неетинӓ гӧрӓ, ангысыны таа баштан курду Христозда.

¹⁰ Бу неетӓ гӧрӓ, ани таманнанаӂэк, вакыт гелдийнӓн, О хепсини гӧктекилери хем ердекилери Христозда бирлештиреӂек.

¹¹ Христозда мирасчы да олдук, ниӂӓ ӧнӂӓ курулуйду бизим ичин Аллахын неетинӓ гӧрӓ, Ани хепсини йапэр Кенди истедиинӓ хем истедиинӓ гӧрӓ.

¹² Онуштан биз, ани таа баштан умутландык Христоза, ӧлӓ йашайалым, ки, Аллахын шаны метедилсин.

¹³ Ачан ишиттиниз хакына сӧзӱ – Ии Хабери, ангысыннан куртулдунуз, ону инандыныз хем Христозда сиз дӓ аданмыш Айоз Духлан мӱхӱрлендиниз.

¹⁴ Айоз Дух бир гарантийа гиби бизим мирасымыз ичин, о вакыдадан, ачан Аллах хептенӓ куртараӂэк, кими еденди, ки Онун шаны метедилсин.

Павли дуа едер инанӂылар ичин

¹⁵ Онуштан, ачан ишиттим, ани инанэрсыныз Сааби Иисус Христоза хем северсиниз Аллахын бӱтӱн айоз халкыны,

¹⁶ бӓн дӓ дурмадаан шӱкӱр едерим сизин ичин хем анэрым сизи дуаларымда,

¹⁷ ки бизим Сааби Иисус Христозун Аллахы, метинни Боба, версин сизӓ Духу, Ани сизи аариф йапаӂэк хем ачыклайаӂэк Аллахы, ки таныйасыныз Ону.

¹⁸ Истеерим, ани аклынызын гӧзлери айдынныы гӧрсӱн, ки билӓсиниз, недир умут, ангысына сизи чаарды, не зенгиндир Аллахын метинни мирасы Кенди айоз халкы ичин,

¹⁹ хем некадар кенарсыз Онун бӱӱк куведи биздӓ, инанӂыларда. Бу кувет ишлеер ниӂӓ Онун бӱӱк кудретлии,

²⁰ не гӧстерди Христозда, ачан Ону дирилтти ӧлӱдӓн да отуртту гӧклердӓ Кенди саа тарафына.

²¹ Таа ӱӱсек койду Ону хербир ӧндерӂиликтӓн, заабитликтӓн, куветликтӓн, чорбаӂылыктан хем хер адтан, ани анылэр диил саде бу заманда, ама гелӓр заманда да.

²² Хепсини койду айаклары алтына да йапты Ону, ки хепсинӓ баш олсун клиседӓ,

²³ ангысы Онун гӱӱдесидир хем ангысы долдурэр Ону, Ким долдурэр хепсини хербир иш ӱзерӓ.