Çıfıtlara 6 - Ени Бааланты

¹ Онуштан, бракып Христозун башланкы ӱӱретмеклерини, таманнаа доору илерлейелим. Енидӓн темели коймайалым: дӧнмӓк ӧлӱ ишлердӓн, инанмак Аллаха,

² ӱӱренмӓк ваатизлик ичин, ел коймак ичин, ӧлӱлерин дирилмеси ичин хем дивеч даава ичин.

³ Илерлейелим! Буну йапаӂэз, еер Аллах изин едӓрсӓ.

⁴ Зерӓ ким бир сыра айдыннадылды, датты гӧктӓн гелӓн баашышлардан, олду пайӂы Айоз Духлан

⁵ да датты Аллахын ии сӧзӱндӓн хем гелеӂек заманын куветлериндӓн,

⁶ ама хеп окадар дӱштӱ инансызлаа, оннары йок насыл енидӓн дӧндӱрмӓӓ Аллаха гӱнахларындан, зерӓ кендилериндӓ енидӓн ставроза герерлӓр Аллахын Оолуну да гӱлмӓӓ алэрлар Ону аалемин ӧнӱндӓ.

⁷ Зерӓ Аллахтан иисӧзленер о ер, ангысы чок сыра йысланэр йаамур суйуннан, ани йаайэр онун ӱстӱнӓ да ешиллик бӱӱдер, файда гетирерӓк оннара, ким топраа ишледи.

⁸ Ама еер бу ер бӱӱдӓрсейди чалы хем гӱрлӱк, о бишейӓ йарамаз, йакындыр бетваланмаа. О биткидӓ йакылэр атештӓ.

⁹ Макар ки бӧлӓ лафедериз, севгили кардашлар, хеп окадар биз чок инанэрыз, ани сиз таа ии халда булунэрсыныз да илери доору куртулмуш олаӂэныз.

¹⁰ Зерӓ Аллах доорудур, О унутмээр сизин савашманызы хем севгинизи, ани гӧстердиниз Онун ады ичин. Сиз йардым еттиниз хем таа йардым едерсиниз Аллахын айоз халкына.

¹¹ Истеериз, ани херкезиниз биткийӓдӓн гӧстерсин хеп бу чалышмайы, ки бӱтӱн умудунуз олсун.

¹² Истӓмеериз, хайлаз оласыныз, ама истеериз бензейӓсиниз оннара, ким инаннан хем дайанмаклан еденерлӓр адамаклары.

Аллахын адамасы

¹³ Аллах, Авраама адамак вериркӓн, чӱнкӱ йокту башка таа бӱӱк, киминнӓн емин етсин, емин етти Кенди-Кендиннӓн

¹⁴ да деди: «Доору, ани ташкынныктан иисӧзлейеӂӓм хем зееделейеӂӓм сени».

¹⁵ Биткидӓ Авраам дайанмаклан каблетти, не аданды.

¹⁶ Доору, ани инсаннар, ки лафларыны инандырсыннар дейни, емин едерлӓр таа бӱӱк биркимсейлӓн, да бунуннан битирилер хербир кавга.

¹⁷ Хеп ӧлӓ Аллах да, истейерӓк таа ачык гӧстерсин, ани Онун неети йок насыл диишилсин, каавиледи адамасыны еминнӓн,

¹⁸ ки бу ики диишилмейӓн ишлӓн, адамаклан хем еминнӓн, нейлӓн Аллах йок насыл алдатсын, бӱӱк кыйышмак еденелим. Биз Аллахта сакландык, ки тутунабилелим ӧнӱмӱзӓ койулу умуттан.

¹⁹ Бу умудумуз каави хем четин, ниӂӓ бир геми демири, ани коруйэр ӂанымызы, Айоз бинанын ичйанкы перденин ӧбӱр тарафына етишер,

²⁰ нерейи Иисус ӧнӂӓ гирди бизим ичин, оларак дивеӂинӓ Баш попаз, Мелкиседек гиби.