Çıfıtlara 2 - Ени Бааланты

Есап алын куртулмак хаберини

¹ Онуштан лӓӓзым таа чок есап алалым сӧзлери, не ишидериз, ки буннардан биртӱрлӱ сӱрӱкленип, йыракланмайалым.

² Зерӓ ангиллӓрлӓн сӧленмиш хепси сӧзлӓр аслы чыкты, да херкези, кач керӓ сырайы басып, законсузлук етти, уйгун ӂеза каблетти.

³ Озаман несой олур биз ӂезадан куртулалым, еер касаветсиз оларсайдык букадар шанны куртулмайа, ангысыны баштан Сааби аннатты, да ишиденнӓр гӧстердилӓр бизӓ, ани аслы.

⁴ Аллах да дооруклады оннарын сӧзлерини мераклы нышаннарлан хем шашмаклы ишлӓрлӓн, хертӱрлӱ кудретли йаптыкларлан хем баашышларлан, не пайетти Айоз Дух Кенди истедиинӓ гӧрӓ.

Иисус инанӂылара бензӓр олду

⁵ Ангиллерин запына верилмеди гелеӂек дӱннӓ, ангысы ичин шинди лафедериз.

⁶ Ама биркимсей незаманса, буну дооруклайып, деди: «Недир адам, ани Сӓн аклында тутэрсын ону, хем кимдир инсан оолу, ани Сӓн ону долашэрсын?

⁷ Сӓн ону ангиллердӓн бираз таа ашаа койдун. Метинниклӓн хем икрамнан донаттын ону /да Кенди еллеринин ишлери ӱстӱнӓ койдун/.

⁸ Хепсини, онун запына верип, айаклары алтына койдун». Хепсини онун запына верип, Аллах бракмады бишей верилмедик онун запына. Ама шинди таа гӧрмеериз, ани хепси верили онун запына.

⁹ Ама гӧрериз Ону, Ким ангиллердӓн бираз таа ашаа койулду – Иисусу, Ангысы, ӧлӱм зеетлерини чекерӓк, метинниклӓн хем икрамнан донадылды, ки Аллахын хайырыннан ӧлӱмдӓн датсын херкез ичин.

¹⁰ Зерӓ дӱшӓрди, ки О, Кимин ичин хепси олду хем Кимин кувединнӓн хепси вар, гетирип чок оол метиннӓӓ, зеетлӓрлӓн таман йапсын оннарын куртулмак Ӧнӂӱсӱнӱ.

¹¹ Зерӓ айозлайан Иисус хем айозланмак йолунда оланнар – хепси бир Бобадандыр. Онуштан Иисус утанмээр оннара десин «кардаш»,

¹² зерӓ деер: «Хаберлейеӂӓм Сенин адыны Беним кардашларыма, халкын арасында метинник Сана чалаӂам».

¹³ Хеп ӧлӓ деер: «Умудуму Она койаӂам» хем таа: «Тӓ, Бӓн хем ушакларым, ангыларыны верди Аллах бана».

¹⁴ Ӧлӓ ки, ниӂӓ ушаклар пай алэрлар кандан хем еттӓн, хеп ӧлӓ О да пай алды кандан хем еттӓн, ки ӧлӱмнӓн телеф етсин ону, кимдӓ вар ӧлӱмӱн куведи, ангысы диавол,

¹⁵ да бошандырсын оннары, ким ӧлӱм коркусундан бӱтӱн йашамакларында чыраклыкта булунду.

¹⁶ Шӱпесиз, О гелмеер ангиллерӓ йардыма, ама Авраамын сенселесинӓ.

¹⁷ Онуштан О лӓӓзымды хербир иш ӱзерӓ бензесин кардашларына, ки олабилсин Аллахын изметиндӓ бир инанч хем аӂыйан Баш попаз да усландырсын Аллахын ӱфкесини инсанын гӱнахлары ичин.

¹⁸ Зерӓ Кенди аӂы чекти дененмектӓ, онуштан О йардым едӓбилир дененмектӓ оланнара.