Çıfıtlara 12 - Ени Бааланты

Сааби ӂезайлан ӱӱредер оннары, кими север

¹ Онуштан, чӱнкӱ бизи долайлээр чок шаатлар, булут гиби, аталым бир тарафа хертӱрлӱ аарлыы хем хертӱрлӱ гӱнахы, ани колай долаштырэр бизи, да дайанмаклан йарышалым о качмакта, ани ӧнӱмӱздӓ.

² Уз Иисуса бакалым, Ангысы бизим инанын ӧнӂӱсӱ хем таманнайыӂысы. О, бакарак севинмелӓӓ, ани гелеӂек, дайанды ставрозда герили олсун. Буну хич утанмак саймады да Аллахын чорбаӂылык скемнесинин саа тарафына отурду.

³ Дӱшӱнӱн Онун ичин, Ким ӧлӓ чок дайанды озаман, незаман гӱнахкерлӓр Она каршы лафетти, ки йуфкаламайасыныз да умутсузлаа дӱшмейӓсиниз.

⁴ Сиз таа ӂенклешмединиз кан дӧкӱнӂӓ, савашарак гӱнаха каршы.

⁵ Сиз унуттунуз му о насаады, ани сизӓ верилер, ниӂӓ ооллара: «Оолум! Паасызландырма о ӂезайы, нейлӓн Сааби сени ӱӱредер, да умутсузлаа дӱшмӓ, ачан о сени таказалээр.

⁶ Зерӓ Сааби, кими север, ону ӂезалайып ӱӱредер хем хербир оолу дӱӱйер, кими кабледер».

⁷ Ӂезайа дайанын, зерӓ бундан танынэр, ани Аллах ташыйэр Кендини сизиннӓн, ниӂӓ оолларыннан. Вардыр мы аӂаба оол, кими бобасы ӂезалайарак ӱӱретмесин?

⁸ Еер ӱӱренмӓрсейдиниз ӂезадан, ангысыны хепси чекӓр, озаман сиз ороспулук ушакларыйсыныз, ама диил хакына ооллар.

⁹ Бундан каарӓ, ердеки бобаларымыздан ӂезаланмыш, хеп окадар оннары хатырлээрыз. Аӂаба таа чок дӱшмеер ми, духча Бобамызын запына верилип, йашайалым?

¹⁰ Зерӓ бобаларымыз бизи ӂезалардылар аз вакыт ичин, ниӂӓ сайардылар таа ии, ама Аллах ӂезалээр бизим иилиимиз ичин, ки пайымыз олсун Онуннан айозлукта.

¹¹ Баштан хич бир ӂеза да севинчли гӧрӱнмӓз, ама гуӂендирир. Ама сора ондан ким ӱӱренди, оннара услулук верӓн доорулук мейвасыны гетирер.

¹² Ӧлӓ ки, калдырын саркык еллеринизи хем доорудун бӱкӱк дизлеринизи.

¹³ Айакларыныза уз йолӂаазлар йапын, ки топаллар да сапмасыннар, ама доорулсуннар.

Атылмайын Аллахтан

¹⁴ Хепси инсаннан услулукта хем айозлукта йашамаа чалышын, зерӓ айозлуксуз кимсей Саабийи гӧрӓмейеӂек.

¹⁵ Есап алын, ки биркимсей качырмасын Аллахын хайырыны. Бир зихирли кӧк, пейдаланып, сизӓ зарар йапмасын да улаштырмасын чойуну.

¹⁶ Бакын, аранызда олмасын бир ороспу йада биркимсей, ани паайа коймээр айозлуу, ниӂӓ Есав, ангысы бир имӓк ичин сатты илк дуумушлууну.

¹⁷ Зерӓ ии билерсиниз, ани ондан сора о истеди еденсин бобасындан иисӧзлемейи, ама рет едилди, зерӓ она йокту колайлык, дииштирсин бобасынын карарыны, макар ки йашларлан гӧзлериндӓ йалварды.

¹⁸ Сиз йаклашмадыныз диилӓбиленӓ, атешлӓн тутушана, бир думана, бир караннаа йада бир фуртунайа,

¹⁹ бир труба баартмасына йада бир сесӓ, ани ӧлӓ лафедӓрди, ки ишиденнӓр йалвардылар, ки оннара шиндӓн сора лаф едилмесин.

²⁰ Зерӓ оннар йокту насыл дайансыннар бу сымарламайа: «Еер хайван да диийӓрсӓ бу байыра, ташлан ӧлдӱрӱлсӱн /йада сӱнгӱйлӓн саплансын/».

²¹ Не гӧрӓрдилӓр, ӧлӓ титсийди, ани Моисей деди: «Чок коркэрым хем титирерим».

²² Ама сиз йаклаштыныз Сион байырына, дири Аллахын касабасына, Гӧктеки Иерусалимӓ, оннан бин ангиллерӓ,

²³ илк дуумушларын клисӓ йортулууна, ангыларын адлары йазылы гӧктӓ; о Аллаха, Ким херкезинӓ даава кесер, хем доору оланнарын духларына, ани таманнаа етишти.

²⁴ Йаклаштыныз ени баалантынын Араӂысына, Иисуса, хем серпили кана, ани таа ии ишлери аннадэр, некадар Авелин каны.

²⁵ Бакын, Ондан, Ким лафедер, атылмайасыныз. Чӱнкӱ ӂезадан куртуламадылар оннар, ким Моисейдӓн атылды, ангысы Аллахтан оннара ер ӱстӱндӓ хабер гетирди, окадар таа пек куртуламайаӂэз биз, еер ӱзӱмӱзӱ чевирӓрсӓк Христоздан, Ангысы лафедер гӧктӓн.

²⁶ Аллахын сесиндӓн озаман ер тепреди, ама шинди О бӧлӓ адамак верди: «Енидӓн сарсаладаӂам диил саде ери, ама гӧкӱ дӓ».

²⁷ Бу лаф «енидӓн» аннадэр, ани диишилеӂек, не сарсаланэр, башка лафлан, не йарадылмыш, ки калсын салт о, не сарсаланмаз.

²⁸ Онуштан, чӱнкӱ биз каблеттик бир падишахлык, ани сарсаланмаз, олалым шӱкӱр да бутакым измет еделим Аллаха ӧлӓ, ниӂӓ О беенер, бир аллахчы коркуйлан хем сайгыйлан.

²⁹ Зерӓ бизим Аллах бир йакар атештир.