Çıfıtlara 1 - Ени Бааланты

Оол ангиллердӓн ӱстӱн

¹ Евелдӓн Аллах чок сыра хем чок тӱрлӱ сӧледи пророкларын аазыннан бизим деделерӓ.

² Ама бу битки гӱннердӓ лафетти бизӓ Кенди Оолуннан, Ангысыны койду мирасчы хепсинӓ хем Ангысыннан дӱннейи йаратты.

³ Оол Аллахын метинниин айдынныы хем Онун варлыын гӧрӱмӱ да хепсини тутэр Кенди кудретли сӧзӱннӓн. О, паклайып бизим гӱнахлары, отурду ӱӱсеклердӓ, бӱӱк Оланын саа тарафында.

⁴ О олду окадар таа ӱстӱн ангиллердӓн, некадар оннардан таа кӓӓмил ад кендинӓ еденди.

⁵ Зерӓ незаманса Аллах ангиллерин бирисинӓ деди: «Сӓн Беним Оолумсун, бӱӱн Сенин Бобан олдум», еки: «Бӓн Боба Она олаӂам, О да Оол Бана олаӂэк»?

⁶ Хеп ӧлӓ, Кенди илк дуумушуну дӱннейӓ гетириркӓн, деер: «Аллахын хепси ангиллери Она баш иилтсиннӓр».

⁷ Ангиллӓр ичин деер: «Бӓним О, Ким дӧндӱрер ангиллерини лӱзгерӓ хем изметкерлерини атеш йалынына».

⁸ Ама Оолу ичин деер: «Ей, Аллах, Сенин чорбаӂылык скемнӓн дивечтир хем падишахлык бастонун доорулук бастонудур.

⁹ Доорулуу севдин, ама законсузлуктан азетмедин, онуштан Аллах, Сенин Аллахын, Сени йаалады севинч йаайыннан таа чок Сенин достларындан».

¹⁰ Да деер: «Ей, Сааби, Сӓн баштан ери курдун, гӧклӓр дӓ Сенин еллеринин йаптыклары.

¹¹ Оннар кайбелеӂеклӓр, салт Сӓн калэрсын. Хепси руба гиби ескийеӂек.

¹² Оннары кыврадаӂан, ниӂӓ бир йаамурлук, да руба гиби дииштирилеӂеклӓр. Ама Сӓн калэрсын хеп ӧлӓ, Сенин йылларын – биткисиз».

¹³ Незаман хем ангы ангилӓ Аллах деди: «Отур саа тарафымда, Бӓн койунӂа Сенин душманнарыны айакларын алтына».

¹⁴ Диил ми оннар хепси изметкӓр духлары, йолланмыш йардым етсиннӓр оннара, ким куртулмак еденеӂек?