Apokalіpsіs 3 - Ени Бааланты

Сардис клисесинӓ

¹ Сардис клисесинин ангилинӓ йаз: „Бӧлӓ деер О, Кимдӓ вар Аллахын еди Духу хем еди йылдызы. Билерим сенин йаптыкларыны. Сӓн ад казандын, сансын дирийсин, ама ӧлӱйсӱн.

² Кушку ол, ӧлӱмӓ йакын ишлери каавилӓ, зерӓ сенин йаптыкларыны таман булмадым Беним Аллахымын ӧнӱндӓ.

³ Аклына гетир, не каблеттин хем не ишиттин, кору хем дӧн бана гӱнахларындан. Кушку олмарсайдын, гелеӂӓм хырсыз гиби, да хич дуймайаӂан, не саатта гелеӂӓм сенин ӱстӱнӓ.

⁴ Хеп окадар сендӓ, Сардистӓ, вар биркач инсан, ани лекелӓмедилӓр кенди рубаларыны. Оннар гезеӂеклӓр Бенимнӓн, гиийимни бийаз рубаларлан, зерӓ бу йарашэр оннара.

⁵ Ким енсейеӂек, о бийаз руба гиинеӂек. Онун адыны хич силмейеӂӓм йашамак кийадындан да ачыктан анаӂам онун адыны Бобамын хем ангиллерин ӧнӱндӓ.

⁶ Кимин вар кулаа, сеслесин, не Айоз Дух сӧлеер клиселерӓ“.

Филаделфийа клисесинӓ

⁷ Филаделфийа клисесинин ангилинӓ йаз: „Бӧлӓ деер Айоз хем Доору Олан, Кимдӓ вар Давидин анатары, Ким ачэр, да кимсей капайамээр, капээр, да кимсей ачамээр.

⁸ Билерим сенин йаптыкларыны. Бӓн сенин ӧнӱнӓ ачык бир капу койдум, кимсей ону капайамаз. Аз куведин вар, ама корудун Беним сӧзӱмӱ да инкӓр етмедин Беним адымы.

⁹ Бак, Бӓн верерим оннары, ким шейтанын топлушундан, оннары, ким сайэр кендилерини иудей, ама диил доору, йалан сӧлеерлӓр, йапаӂам, гелсиннӓр да баш иилтсиннӓр сенин айакларынын ӧнӱндӓ. Озаман таныйаӂэклар, ани Бӓн сени севдим.

¹⁰ Чӱнкӱ таманнадын Беним сымарламамы дайанмак ичин, Бӓн дӓ коруйаӂам сени денемӓк вакыдындан, ани гелеӂек бӱтӱн дӱннейин ӱстӱнӓ, ки денесин оннары, ким ер ӱстӱндӓ йашээр.

¹¹ Бӓн тез гелерим! Сыкы тут, не вар сендӓ, ки кимсей капмасын сенин фенецини.

¹² Ким енсейеӂек, ону йапаӂам дирек Беним Аллахымын Айоз бинасында, да о артык чыкмайаӂэк дышары. Йазаӂам онун ӱстӱнӓ беним Аллахымын адыны хем Аллахымын касабасынын, ени Иерусалимин адыны, ани гӧктӓн Беним Аллахымдан инер, хем Беним ени адымы.

¹³ Кимин вар кулаа, ишитсин, не Айоз Дух сӧлеер клиселерӓ“.

Лаодикийа клисесинӓ

¹⁴ Лаодикийа клисесинин ангилинӓ йаз: „Бӧлӓ лафедер Амин, инанч хем доору шаат, башлайан Аллахын йаратмасыны.

¹⁵ Билерим сенин йаптыкларыны, сӓн диилсин не суук, не дӓ хашлак. Еер олайдын суук йада хашлак!

¹⁶ Ама чӱнкӱ сӓн ылыӂасын – не сууксун, не дӓ хашлаксын, фырладаӂам сени аазымдан.

¹⁷ Зерӓ сӓн деерсин: зенгиним, зенгиннендим да бишей ичин зорум йоктур; ама билмеерсин, ани сӓн зайыф, заваллы, фукаара, кӧӧр хем чыплаксын.

¹⁸ Сана насаат едерим, ани сатын аласын Бендӓн алтын, атештӓн пакланмыш, ки зенгинненӓсин, бийаз рубалар, ки гиинӓсин, да гӧрӱнмесин сенин айып чыплаклыын, хем илач, ки гӧзлерини йаалайасын да гӧрӓсин.

¹⁹ Бӓн азарлээрым хем сырайа койэрым хепсини, кими северим. Ол чалышкан да дӧн Бана гӱнахларындан.

²⁰ Тӓ, дурэрым капуда да урэрым. Еер биркимсей ишидӓрсейди Беним сесими да ачарсайды капуйу, гиреӂӓм да софрайа отураӂам онуннан, о да Бенимнӓн.

²¹ Ким енсейеӂек, она изин вереӂӓм Бенимнӓн отурсун Беним чорбаӂылык скемнемдӓ, ниӂӓ дӓ Бӓн енседим да отурдум Беним Бобамнан Онун чорбаӂылык скемнесиндӓ.

²² Кимин вар кулаа, ишитсин, не Айоз Дух сӧлеер клиселерӓ“».