Apokalіpsіs 22 - Ени Бааланты

¹ Ангил гӧстерди бана йашамак суйунун дересини, ани кристал гиби йалабык. О сызэр Аллахын хем Кузунун чорбаӂылык скемнесиндӓн.

² Касабанын ана йолунун ортасында, деренин ики тарафында булунэр йашамак фиданы, ани оники тӱрлӱ мейва йапэр, хер ай кенди мейвасыны верер. Бу фиданын йапраклары миллетлерин алышмасы ичин.

³ Хем хич бишей бетвалы орада олмайаӂэк. Ама Аллахын хем Кузунун чорбаӂылык скемнеси орада олаӂэк, хем Онун чыраклары Она измет едеӂеклӓр.

⁴ Онун ӱзӱнӱ гӧреӂеклӓр, адыны анныларында ташыйаӂэклар.

⁵ Артык геӂӓ олмайаӂэк, хем шафк диил лӓӓзым оннара, не дӓ гӱн айдынныы, зерӓ Сааби Аллах айдыннадаӂэк оннары. Оннар дивечтӓн дивеӂӓ падишахлык едеӂеклӓр.

⁶ Сора ангил деди бана: «Бу сӧзлӓр хакына хем доору. Сааби, пророкларын духларынын Аллахы, ангилини йоллады, ки гӧстерсин Кенди чыракларына, не тездӓ лӓӓзым олсун».

Иисусун икинӂи гелмеси

⁷ «Тӓ, тез гелерим. Мутлу, ким таманнээр пророклук сӧзлерини, ани вар бу кийатта!» – деер Иисус.

⁸ Бӓн, Иоан, о, ким буннары гӧрдӱ хем ишитти. Ачан ишиттим хем гӧрдӱм, ангилин айакларына дӱштӱм, ким бана буннары гӧстерӓрди, ки баш иилдейим она.

⁹ Ама о деди бана: «Сакын, буну йапма, зерӓ бӓн саде изметкерим, ниӂӓ сӓн хем сенин кардашларын пророклар хем оннар, ким бу кийадын сӧзлерини таманнээр. Бир Аллаха баш иилт».

¹⁰ Сора деди бана: «Бу кийадын пророклук сӧзлерини мӱхӱрлӓмейӓсин, зерӓ вакыт йакын.

¹¹ Ким кӧтӱлӱк йапэр, таа йапсын кӧтӱлӱк. Ким кирли, кирли калсын. Ким доору, таа йапсын доорулук. Ким айоз, таа айозлансын».

¹² Иисус деер: «Бӓн тездӓ гелерим, ӧдӓӓм бенимнӓн, ки херкезӓ йаптыкларына гӧрӓ верейим.

¹³ Бӓним Алфа хем Омега, Биринӂи хем Битки, Баш хем Сон.

¹⁴ Мутлу оннар, ким рубаларыны йыкээр, ки доорулуклары олсун, имӓӓ дейни йашамак фиданындан хем, токатлардан гечип, касаба ичинӓ гирмӓӓ!

¹⁵ Дышанда кӧпеклӓр, бӱӱӂӱлӓр, ороспулук еденнӓр, ӧлдӱрӱӂӱлӓр, идоллара баш иилденнӓр, оннар, ким север йалан сӧлемӓӓ хем алдадэр.

¹⁶ Бӓн, Иисус, йолладым беним ангилими, ки сизӓ бӧлӓ шаатлык етсин клиселӓр ичин. Бӓн – Давидин кӧкӱ хем сенселеси, йалабык сабаа йылдызы.

¹⁷ Дух хем гелин деер: „Гел!“ Ким ишидер, десин: „Гел!“ Сусуз олан гелсин хем ким истеер, йашамак суйу парасыз алсын!»

¹⁸ Херкезинӓ шаатлык едерим, ким бу кийадын пророклук сӧзлерини ишидер: еер биркимсей бишей бу сӧзлерӓ еклӓрсейди, Аллах она белалары, ани бу кийатта йазылы, еклейеӂек.

¹⁹ Хем, еер биркимсей бишей бу пророклук кийадын сӧзлериндӓн чыкарарсайды, Аллах онун пайыны йашамак фиданындан хем айоз касабадан, ани бу кийатта йазылы, чыкараӂэк.

²⁰ О, ким шаатлык едер бу ишлӓр ичин, деер: «Хакына, тездӓ гелерим!» Амин! Ей, гелсӓнӓ, Сааби Иисус!

²¹ Сааби Иисусун иивергиси олсун херкезлӓн! /Амин./