Apokalіpsіs 20 - Ени Бааланты

Бин йыл падишахлык

¹ Гӧрдӱм бир ангил, ани гӧктӓн инӓрди. Онун елиндӓ варды дипсизлиин анатары хем бир бӱӱк синӂир.

² О тутту дракону, евелки йыланы, ангысы – диавол хем шейтан, да баалады ону бин йыла.

³ Атты ону дипсизлӓӓ, сора, орайы капайып, ӱстӱнӱ мӱхӱрледи, ки шансора алдатмасын миллетлери бин йыл гечмейинӂӓ. Бундан сора о лӓӓзымды салверилсин бир парча вакыда.

⁴ Гӧрдӱм чорбаӂылык скемнелерини хем отураннары оннарын ӱстӱндӓ, ангыларына верилди заабитлик, даава йапсыннар. Гӧрдӱм инсаннарын ӂаннарыны да, ангыларын кафалары кесилмишти, зерӓ шаатлык едӓрдилӓр Иисус ичин хем насаат едӓрдилӓр Аллахын сӧзӱнӱ. Оннар ӂанавара хем онун идолуна баш иилтмемиштилӓр хем онун дамгасыны кенди анныларына хем еллеринӓ каблетмемиштилӓр. Оннар дирилдилӓр да падишахлык еттилӓр Христозлан барабар бин йыл.

⁵ Бу – илк дирилмӓк. Каланы ӧлӱлердӓн дирилмедилӓр, бин йыл таманнанмайынӂа.

⁶ Мутлу хем айоз оннар, кимин вар пайы илк дирилмектӓ. Оннарын ӱстӱнӓ икинӂи ӧлӱмӱн йок куведи. Оннар Аллахын хем Христозун попазлары олаӂэклар да Онуннан падишахлык едеӂеклӓр бин йыл.

Шейтанын ӂезасы

⁷ Бин йыл таманнандыктан сора, шейтан зынданындан салверилеӂек

⁸ да чыкаӂэк, ки алдатсын миллетлери, ангылары ерин дӧрт тарафында йашээрлар – Гогу хем Магогу – да топласын оннары бирери ӂенк ичин. Оннарын сайысы денизин куму гиби.

⁹ Оннар чыктылар ерин хер тарафына да долайладылар Аллахын айоз халкынын лагарыны хем севгили касабайы. Ама гӧктӓн /Аллахтан/ атеш йаады да, оннары йакып, кӱл етти.

¹⁰ Диавол, ани оннары алдадарды, атеш хем кӱкӱрт гӧлӱнӓ атылды, нередӓ вар ӂанавар хем йаланӂы пророк, да геӂӓ-гӱндӱз дивечтӓн дивеӂӓ зеетленеӂеклӓр.

Ӧлӱлӓр ичин даава

¹¹ Гӧрдӱм бир бӱӱк бийаз чорбаӂылык скемнеси хем Ону, Ким отурурду онун ӱстӱндӓ. Ерлӓн гӧк Онун ӱзӱндӓн качтылар да кайбелдилӓр.

¹² Гӧрдӱм ӧлӱлери – кӱчӱклери хем бӱӱклери, ани айакча чорбаӂылык скемнесинин ӧнӱндӓ дурардылар. Кийатлар ачылдылар, сора бир башка кийат ачылды, йашамак кийады, да ӧлӱлерӓ, оннарын йаптыкларына гӧрӓ, даава йапылды, бакарак она, не йазылды кийатларда.

¹³ Озаман дениз геери верди ӧлӱлери, ани варды онда. Ӧлӱм хем ӧлӱлӓр ери дӓ верди ӧлӱлери, ани варды оннарда. Да херкезинӓ даава йапылды оннарын йаптыкларына гӧрӓ.

¹⁴ Ӧлӱм хем ӧлӱлӓр ери атеш гӧлӱнӓ атылдылар. Бу атеш гӧлӱ – икинӂи ӧлӱм.

¹⁵ Кимин ады йашамак кийадында йазылы олмады, о атеш гӧлӱнӓ атылды.