Apokalіpsіs 18 - Ени Бааланты

Вавилонун йыкылмасы

¹ Бундан сора гӧрдӱм бир башка ангил, ани гӧктӓн инӓрди, хем кимдӓ варды бӱӱк заабитлик. Ер онун шафклыындан айдыннанды.

² О баарды куветли сеслӓн да деди: «Йыкылды, йыкылды бӱӱк Вавилон! Етишти олсун ӂиннерин йашамак ери, хертӱрлӱ фена духун зынданы, хертӱрлӱ диилпак хем ииренч кушун йувасы.

³ Зерӓ сулады ороспулуунун кызгын шарабыннан хепси миллетлери. Ерин падишахлары ороспулук еттилӓр онуннан, хем ерин безиргеннери зенгиннедилӓр онун ӧлчӱсӱз сефалыындан».

⁴ Сора ишиттим гӧктӓн башка бир сес, ани деди: «Чык орадан, Беним халкым, ки пай алмайасын онун гӱнахларындан да зеетлӓнмейӓсин онун белаларындан.

⁵ Зерӓ онун гӱнахлары, ӱст-ӱстӓ йывылып, гӧкӓ етишти, да Аллах онун кабаатларыны аклына гетирди.

⁶ Она ӧлӓ верин, ниӂӓ о сизӓ верди. Ики катына геери чевирин йаптыклары ичин. Окайлан, нейлӓн сизӓ шарап хазырлады, ики катына таа чок геери она верин.

⁷ Некадар кендини мететти хем сефалык сӱрдӱ, окадар зеет хем кахыр она чевирин. Зерӓ о кенди-кендинӓ деер: „Падишахка гиби отурэрым, диилим дул хем хич кахыр чекмейеӂӓм!“

⁸ Онуштан бир гӱндӓ онун ӱстӱнӓ гелеӂек белалар – чума, кахыр хем аачлык. Атештӓ йакылмыш олаӂэк, зерӓ каавийдир Сааби Аллах, ани она даава йапэр.

⁹ Ерин падишахлары, ани онуннан ороспулук еттилӓр хем сефалык сӱрдӱлӓр, аалайаӂэклар хем сызлайаӂэклар онун ичин, ачан гӧреӂеклӓр тӱтӱнӱ онун йангынындан.

¹⁰ Коркуйа дӱшеӂеклӓр онун зеетлериндӓн, да, узакта дуруп, дейеӂеклӓр: „Вай, вай, бӱӱк касаба, каави касаба Вавилон! Бир саат ичиндӓ ӂезаны булдун“.

¹¹ Ерин безиргеннери аалайаӂэклар хем сызлайаӂэклар онун ичин, зерӓ оннарын малларыны шиндӓн сора йок ким сатын алсын.

¹² Маллары алтындан, гӱмӱштӓн, паалы таштан, седефтӓн, инӂӓ кетендӓн, ипектӓн, ергиван хем койу-кырмызы ренкли парчалардан, хертӱрлӱ ии кокулу аачтан, хертӱрлӱ филдиши кабы, хертӱрлӱ кабы ен паалы аачтан, тунчтан, демирдӓн хем мермердӓн,

¹³ корицайы, специйайы, гӱннӱӱ, смирна йаайыны, ладаны, шарабы, зейтин йаайыны, ислӓӓ уну, боодайы, сыырлары, койуннары, бейгирлери, талигалары хем чыраклары – инсаннары – кимсей алмайаӂэк.

¹⁴ Дейеӂеклӓр: „Мейвалар, беенилмиш сенин ӂанындан, елиндӓн йок олдулар. Хепси паалы хем йалабык ишлерин кайбелдилӓр. Оннары сӓн шиндӓн сора буламайаӂан“.

¹⁵ Бу малларын безиргеннери, ани Вавилондан зенгиннедилӓр, узакта дураӂэклар, коркарак онун зеетлериндӓн, да аалайаӂэклар хем сызлайаӂэклар,

¹⁶ дейип: „Вай, вай, бӱӱк касаба! О инӂӓ кетеннӓн, ергиван хем койу-кырмызы ренкли рубаларлан гиийимнийди, донаклыйды алтыннан, паалы ташларлан хем седефлӓн.

¹⁷ Букадар чок зенгинник бир саат ичиндӓ кайбелди!“ Хер геминин капитаны, йолӂулары, гемиӂилери хем хепси, ким дениздӓн йашамасыны тутарды, узакта дурардылар.

¹⁸ Ачан гӧрдӱлӓр онун йангынындан тӱтӱнӱ, баардылар, дейип: „Ангы касаба вар бу бӱӱк касаба гиби?“

¹⁹ Башларына тоз аттылар да, аалайып хем сызлайып, баарардылар: „Вай, вай, бӱӱк касаба! Онда паалы малларындан зенгиннеди хепси, кимин варды дениздӓ гемилери. Бир саатта бош калды!“

²⁰ Ей, гӧк, севин онун башына геленнӓр ичин! Севинин, Аллахын айоз халкы, апостоллар хем пророклар, зерӓ Аллах она даава кести хем доорулуунузу чыкарды».

²¹ Озаман бир куветли ангил калдырды бир таш, ани бензӓрди бӱӱк дермен ташына, да атты ону дениз ичинӓ, дейип: «Бӧлӓ бӱӱк куветлӓн атылаӂэк бӱӱк касаба Вавилон, да ондан сора гӧрӱлмейеӂек.

²² Артык сендӓ ишидилмейеӂек арфа чаланнарын, тӱркӱӂӱлерин, кавал хем труба чаланнарын сеси. Артык сендӓ хич бир занаат устасы булунмайаӂэк хем дермен уултусу ишидилмейеӂек артык сендӓ.

²³ Артык кандилин шафкы сени айдыннатмайаӂэк, гӱвӓӓ хем гелин сеси артык сендӓ ишидилмейеӂек, зерӓ сенин безиргеннерин дӱннейин ӧн адамнарыйды, хем сенин бӱӱӂӱлӱӱннӓн хепси миллетлӓр алдандылар.

²⁴ Зерӓ сендӓ пророкларын хем Аллахын айоз халкынын хем хепси ердӓ буазлананнарын дӧкӱлӱ каннары булунду».