Apokalіpsіs 16 - Ени Бааланты

Аллахын ӱфкеси хем еди чӧлмек

¹ Ишиттим Айоз бина ичиндӓн бир бӱӱк сес, ани деди еди ангилӓ: «Гидин да еди чӧлмектӓн дӧкӱн ер ӱстӱнӓ Аллахын кызгынныыны!»

² Илк ангил гитти да дӧктӱ онун чӧлмеендӓн ер ӱстӱнӓ. Пейдаланды титси хем аӂы йаралар инсаннарда, кимдӓ варды ӂанаварын дамгасы хем кимнӓр баш иилдӓрдилӓр онун идолуна.

³ Икинӂи ангил дӧктӱ чӧлмеени дениз ӱстӱнӓ, да су ӧлӱ каны гиби олду. Хепси, не йашээр дениз ичиндӓ, ӧлдӱ.

⁴ Ӱчӱнӂӱ ангил дӧктӱ чӧлмеени акар сулар ӱстӱнӓ хем су сызынтылары ӱстӱнӓ, оннар да кан гиби олдулар.

⁵ Ишиттим су ангилини, ким дейӓрди: «/Сааби,/ ани варсын, вардын хем айозсун, Сӓн доору йаптын, ани бӧлӓ даава кестин.

⁶ Зерӓ оннар дӧктӱлӓр Сенин айоз халкынын хем пророкларынын каныны, да Сӓн вердин оннара кан, ичсиннӓр. Оннара бу йарашэр».

⁷ Ишиттим бир сес курбанныктан, ани дейӓрди: «Ӧлӓ, Сааби Аллах, Чоккудретли, хакына хем доору Сенин дааваларын».

⁸ Дӧрдӱнӂӱ ангил дӧктӱ чӧлмеени гӱнӱн ӱстӱнӓ. Изин верилди гӱнӓ, йаксын инсаннары кызгынныыннан.

⁹ Инсаннар каурулдулар титси сыӂактан. Оннар кӧтӱлӓрдилӓр Аллахын адыны, Кимин бу белалар ӱстӱнӓ варды заабитлии, ама гӱнахларындан Аллаха дӧнмедилӓр хем Ону метиннӓмедилӓр.

¹⁰ Бешинӂи ангил дӧктӱ чӧлмеени ӂанаварын чорбаӂылык скемнеси ӱстӱнӓ, да онун падишахлыы каранныкланды. Инсаннар аӂыдан диллерини далардылар.

¹¹ Оннар гӧктеки Аллахы кӧтӱледилӓр аӂылары хем йаралары бетеринӓ, ама кенди йаптыкларындан дӧнмедилӓр.

¹² Алтынӂы ангил дӧктӱ чӧлмеени бӱӱк дерӓ Евфрат ӱстӱнӓ да онун суйу куруду, ки йол хазырлансын гӱндуусундан падишахлара.

¹³ Гӧрдӱм, ани драконун аазындан, ӂанаварын аазындан хем йаланӂы пророкун аазындан чыкты ӱч фена дух, курбаалара бензӓр.

¹⁴ Буннар ӂин духлары, ангылары мераклы нышаннар йапэрлар. Оннар чыкэрлар бӱтӱн дӱннӓ падишахларына, ки топласыннар оннары бирери ӂенк етмӓӓ Аллахын, Чоккудретлинин, о бӱӱк гӱнӱндӓ.

¹⁵ «Тӓ, Бӓн гелерим, бир хырсыз гиби! Не мутлу, ким уйанык дурэр хем хазыр тутэр кенди рубаларыны, ки чыплак гезмесин да айыплыы гӧрӱнмесин!»

¹⁶ О духлар падишахлары топладылар бир ерӓ, ани чыфытчасына денер Армагеддон.

¹⁷ Единӂи ангил дӧктӱ кенди чӧлмеени хавайа, да /гӧктеки/ Айоз бинадан /Аллахын/ чорбаӂылык скемнесиндӓн ишидилди бир бӱӱк сес, ани деди: «Таманнанды!»

¹⁸ Озаман чимчирик чакты, уултулар ишидилди, гӧк гӱрледи, да олду ӧлӓ бӱӱк ер тепремеси, ниӂӓ олмадыйды незамандан инсан бу ер ӱстӱндӓ. Ӧлӓ бӱӱк ер тепремеси олду!

¹⁹ Бӱӱк касаба ӱч пайа бӧлӱндӱ да миллетлерин касабалары йыкылды. Бӱӱк Вавилон анылды Аллахын ӧнӱндӓ, да она верилди филӂан, ани тутэр Аллахын кызгын ӱфкесинин шарабыны.

²⁰ Хепси адалар качып йок олдулар хем байырлар кайбелдилӓр.

²¹ Гӧктӓн инсан ӱстӱнӓ толу йаады. Хербир толунун аарлыы бир талант кадарды. Толу беласы ӧлӓ коркунчту, ки инсан кӧтӱлӓрди Аллахы бу беланын бетеринӓ.