Apokalіpsіs 1 - Ени Бааланты

¹ Иисус Христозун ачыкламасы, ани Аллах Она верди, гӧстерсин кенди чыракларына, не тездӓ лӓӓзым олсун. Буну хаберледи, йоллайып Кенди ангилин елиннӓн чыраана Иоана,

² ким шаатлык етти Аллахын сӧзӱ ичин хем Иисус Христозун шаатлыыны аннатты – хепсини, не гӧрдӱ.

³ Не мутлу о, ким окуйэр хем ким сеслеер бу пророклук сӧзлерини хем коруйэр, не бурада йазылы, зерӓ вакыт йакын.

Селӓм еди клисейӓ

⁴ Бӓн, Иоан, селӓм йоллээрым еди клисейӓ, ангылары булунэр Асийа бӧлгесиндӓ. Ииверги хем услулук сизӓ Ондан, Ким вар, Ким варды хем Ким гелӓр, еди духтан, ангылары Онун чорбаӂылык скемнесинин каршысында,

⁵ хем Иисус Христоздан, Ким инанч шаат, илк дууан, Ким ӧлӱлердӓн дирилди хем ердеки падишахларын ӧндерӂиси. О бизи севди, Кенди каныннан бизи гӱнахларымыздан куртарды,

⁶ йапты бизи падишах хем попаз Аллаха, Кенди Бобасына. Она олсун метинник хем заабитлик дивечтӓн дивеӂӓ!

⁷ Бак, О гелер булутларлан, да хербир гӧз Ону гӧреӂек, артык оннар да, ким Ону саплады. Хепси ердеки сенселелӓр аалайаӂэк Онун бетеринӓ. Ӧлӓ, амин!

Бӓним Баш хем Сон

⁸ «Бӓним Алфа хем Омега, /Баш хем Сон/», – деер Сааби Аллах, Ким вар, Ким варды хем Ким гелӓр, Чоккудретли.

⁹ Бӓн, Иоан, сизин кардашыныз, пай алэрым сизиннӓн барабар Иисусун зеетлериндӓ, падишахлыында хем дайанмасында. Булунардым бир адада, ады Патмос, Аллахын сӧзӱ ичин хем Иисусун шаатлыы ичин.

¹⁰ Айоз Дух конду бана Саабинин гӱнӱндӓ. Аркамдан ишиттим бир бӱӱк сес, труба сеси гиби, Ангысы дейӓрди: «/Бӓним Алфа хем Омега, Баш хем Сон./

¹¹ Не гӧрерсин, йаз бир кийада да йолла еди клисейӓ: Ефес, Смирна, Пергама, Фиатира, Сардис, Филаделфийа хем Лаодикийа касабаларына».

¹² Дӧндӱм гӧрейим, ким бенимнӓн лафедер. Дӧнӱп, гӧрдӱм еди алтын шамдал.

¹³ Еди шамдал ортасында гӧрдӱм Бирисини, Ким адам оолуна бензӓрди. Гиийимнийди айакларына кадар узун рубайлан хем кушалыйды гӱӱсӱндӓн алтын кушаклан.

¹⁴ Башы хем сачлары ак-бийаз, ниӂӓ йапаа, каар гиби, гӧзлери атеш йалыны гиби.

¹⁵ Айаклары – фырында кыздырылмыш йалабык тунч гибийди. Сеси – бӱӱк акан сулар уултусу гибийди.

¹⁶ Саа елиндӓ тутарды еди йылдыз, аазындан чыкарды икиӱзлӱ бир кескин кылыч. Ӱзӱ гӱн гибийди, ани шафк едер бӱтӱн куветлӓн.

¹⁷ Ачан гӧрдӱм Ону, дӱштӱм айакларына ӧлӱ гиби. О койду саа елини беним ӱстӱмӓ да деди: «Коркма! Бӓним Баш хем Сон.

¹⁸ Дири оланым, ӧлӱйдӱм, ама те, дири калаӂам дивеӂӓ кадар. Беним елимдӓ ӧлӱмӱн хем ӧлӱлӓр еринин анатарлары.

¹⁹ Онуштан йаз, не гӧрдӱн, не вар хем не олаӂэк бундан сора.

²⁰ Еди йылдызын, не гӧрдӱн Беним саа елимдӓ, хем еди алтын шамдалын саклылыы будур: еди йылдыз – еди клисенин ангиллери, хем еди шамдал – буннар еди клисӓ.