3 İoanın 1 - Ени Бааланты

Селӓм

¹ Бӓн, пресвитер, селӓм йоллээрым севгили Гайа, ангысыны бӓн хакына северим.

² Севгили кардашым! Дуа едерим, ки саа оласын, хем хепси ишлерин ии гитсин, ниӂӓ сенин ӂанын да ии гидер.

³ Зерӓ бӓн пек севиндим, ачан гелди кардашлар да шаатлык еттилӓр, ани сӓн аслылыкта йашээрсын хем аслылык йолунда гезерсин.

⁴ Беним ичин йок таа бӱӱк севинмӓк, некадар ишидейим, ани ушакларым аслылык йолунда гезерлӓр.

Насаатлар

⁵ Севгили кардашым! Сӓн ии иш йапэрсын, ачан йардым едерсин кардашлара, макар ки оннар – йабанӂы.

⁶ Оннар шаатлык еттилӓр клисенин ӧнӱндӓ сенин севгин ичин. Сӓн ии йапаӂан, еер оннары йола йолларсан, ниӂӓ дӱшер Аллахын ӧнӱндӓ.

⁷ Зерӓ оннар йола йолландылар Христозун ады ичин, алмайарак бир дӓ йардым инансызлардан.

⁸ Онуштан бӧлӓ инсаннары лӓӓзым кабледелим, ки барабар ишлейелим аслылык ичин.

⁹ Бӓн йаздым клисейӓ, ама Диотреф, ани север ӧнӂӱ олмаа, каблетмеер бизи.

¹⁰ Онуштан, ачан гелеӂӓм, онун аклына гетиреӂӓм, не о йапэр, зерӓ кӧтӱ лафларлан бизи каралээр, хем диил саде буну йапсын, ама каблетмеер кардашлары хем дӓ кӧстек койэр оннара, ким истеер каблетсин, хем оннары клиседӓн коолээр.

¹¹ Севгили кардашым, бензӓмӓ кӧтӱлӓӓ, ама иилӓӓ. Ким йапэр иилик, о Аллахтан. Ким йапэр кӧтӱлӱк, о гӧрмеди Аллахы.

¹² Димитри ичин хепси ии шаатлык едер, да хакына о ӧлӓ дӓ йашээр. Биз дӓ онун ичин шаатлык едериз, да билерсиниз, ани бизим лафымыз доору.

¹³ Чок ишлӓр ичин истеерим йазмаа, ама истӓмеерим чернилайлан хем саазлан сизӓ йазайым.

¹⁴ Умутланэрым, тездӓ гӧрӱшейим сениннӓн да лафедейим ӱз-бе-ӱз.

¹⁵ Селемет сана. Селӓм йоллээр сана достлар. Адынӂа селӓм сӧлӓ хепси достлара. /Амин./