2 Tіmofeyä 1 - Ени Бааланты

Селӓм

¹ Бӓн, Павли, Иисус Христозун апостолу Аллахын истемесинӓ гӧрӓ, йолланылдым насаат едейим йашамак ичин, ани аданмыш Иисус Христозда.

² Селӓм йоллээрым Тимофейӓ, беним севгили ушаама: ииверги, аӂыйаннык, услулук Аллах Бобадан хем бизим Сааби Иисус Христоздан.

Ии Хаберӓ инанч ол

³ Шӱкӱр едерим Аллаха, Ангысына измет едерим деделерим гиби пак ӱзлӓн, дурмамайӂа геӂӓ-гӱндӱз анарак сени беним дуаларымда.

⁴ Зерӓ аклыма гетирерим сенин гӧз йашларыны, да ӧзледим гӧрейим сени, ки севинмеликлӓн долайым.

⁵ Аклыма гетирерим сенин йапынмадык инаныны, ани баштан варды сенин бӱӱк ананда, Лоидада, хем сенин ананда, Евникада, да чок инанэрым, ани хеп о инан сендӓ дӓ вар.

⁶ Онуштан аклына гетирерим, алифлендирӓсин Аллахын баашышыны, ани едендин еллерими коймамдан сенин ӱстӱнӓ.

⁷ Зерӓ Аллах верди бизӓ диил коркаклык духу, ама кудрет, севги хем кендини запетмӓк духу.

⁸ Онуштан, утанма шаатлык етмӓӓ бизим Сааби ичин хем утанма бендӓн дӓ, ани капана дӱштӱм Онун ичин, ама бенимнӓн пай ал зеетленмектӓ Ии Хабер ичин Аллахын кувединнӓн.

⁹ О куртарды бизи да чаарды, Кенди айоз халкы олалым, диил бизим йаптыкларымыза гӧрӓ, ама Кенди курулмушуна хем иивергисинӓ гӧрӓ, ани верилди бизӓ Иисус Христозда баштан дивечликтӓн,

¹⁰ ама шинди ачылды бизим Куртарыӂы Иисус Христозун гӧрӱнмесиннӓн. О бозду ӧлӱмӱн куведини да айдыннаа чыкарды йашамайы хем ӧлӱмсӱзлӱӱ Ии Хаберлӓн,

¹¹ ангысы ичин бӓн койулдум насаатчы, апостол хем ӱӱредиӂи /миллетлерӓ/.

¹² Бу бетерӓ бӓн бӧлӓ зеетленерим, ама хич утанмээрым, зерӓ билерим, Кимӓ инандым хем чок инанэрым, ани Онун вар куведи о Гӱнӓ кадар, корусун ону, не бана верилди.

¹³ Ӧрнек оларак, тутун о саа сӧзлердӓн, ани бендӓн ишиттин, инаннан хем севгийлӓн, ани Иисус Христозда.

¹⁴ О ии ӱӱретмеклери, не верилди сана, кору Айоз Духлан, Ким биздӓ йашээр.

¹⁵ Сӓн билерсин, ани хепси Асийада оланнар бендӓн атылдылар. Оннарын арасында – Фигел хем Ермоген.

¹⁶ Сааби Онисифорун евинӓ аӂыйаннык версин, зерӓ о чок сыра бени иилендирди хем утанмады беним синӂирлеримдӓн,

¹⁷ ама Рома касабасында булунаркан, бӱӱк чалышмаклан аарады бени, булунӂа.

¹⁸ Сааби версин она, ки о Гӱндӓ аӂыйаннык булсун Саабидӓн, зерӓ некадар о бана измет етти Ефес касабасында, сӓн чок ии билерсин.