2 Petrіnіn 3 - Ени Бааланты

Саабинин гӱнӱ

¹ Севгили кардашлар, шинди беним бу икинӂи кийадым, ани сизӓ йазэрым. Икисиндӓ дӓ буннары аклыныза гетирерим, савашып уйандырайым сизин пак фикиринизи,

² ки аклынызда тутасыныз сӧзлери, ани евелдӓн айоз пророклардан хабер едилди, хем бизим Сааби Куртарыӂынын сымарламасыны, ани сизин апостолларын аазыннан верилди.

³ Хепсиндӓн ӧнӂӓ билиниз, ани битки гӱннердӓ пейдаланаӂэк гӱлмӓӓ алыӂылар, ангылары йашайаӂэклар кенди истедиклеринӓ гӧрӓ.

⁴ Сизи гӱлмӓӓ аларак, дейеӂеклӓр: «Нередӓ Онун гелмесинин адамасы? Зерӓ незамандан деделеримиз ӧлдӱ, хепси ӧлӓ калды, ниӂӓ баштан йарадылы».

⁵ Маасуз йапылэрлар билмейӓн, ани гӧк баштан Аллахын сӧзӱннӓн олду, хем ер йарадылды судан хем суйлан.

⁶ Евелки дӱннӓ да хеп, суйлан буулуп, телеф олду.

⁷ Шиндики ер хем гӧк корунэр хеп о сӧзлӓн атеш ичин, даава гӱнӱ ичин, незаман телеф олаӂэк аллахсыз инсаннар.

⁸ Ама, севгили кардашлар, унутмайын, ани Саабидӓ бир гӱн – ниӂӓ бин йыл, хем бин йыл – ниӂӓ бир гӱн.

⁹ Сааби ойаланмээр таманнамаа, не адады, ниӂӓ кимиси санэр, ама сизӓ дайанэр, истӓмейерӓк, ки биркимсей кайбелсин, ама хепси гӱнахларындан Аллаха дӧнсӱн.

¹⁰ Саабинин гӱнӱ гелеӂек /геӂӓ/ хырсыз гиби. Озаман гӧклӓр бӱӱк уулдамаклан гечеӂек, гӧктеки ишлӓр бӱӱк сыӂактан ерийеӂек. Ер хем не йапылэр ер ӱстӱндӓ, хепси йанаӂэк.

¹¹ Чӱнкӱ хепси бӧлӓ йок олаӂэк, озаман нетӱрлӱ инсаннар дӱшер оласыныз сиз? Йашаманыз лӓӓзым олсун айоз хем Аллаха верили,

¹² беклейерӓк хем чабуклаштырарак Аллахын гӱнӱнӱн гелмесини. О гӱн гӧклӓр тутушуп-кайбелеӂек хем гӧктеки ишлӓр сыӂактан ерийеӂек.

¹³ Ама биз, Онун адамасына гӧрӓ, бир ени гӧк хем ени ер беклеериз, нередӓ херзаман доорулук олаӂэк.

¹⁴ Онуштан, севгили кардашлар, чӱнкӱ буннары беклеерсиниз, чалышын Онун ӧнӱндӓ лекесиз, кусурсуз хем услулукта оласыныз.

¹⁵ Бизим Саабимизин чок дайанмасыны куртулмак гиби сайын, ниӂӓ сизӓ йазды бизим севгили кардаш Павли о аарифлӓӓ гӧрӓ, ани она верилди.

¹⁶ О буннар ичин хепси кийатларында ӧлӓ сӧлеер. Онун кийатларында вар зор аннашылан ерлӓр, ангыларыны билгисиз хем карарсыз инсаннар терсинӓ аннээрлар, ниӂӓ дӓ башка Айоз Йазылары. Кендилери йол ачэрлар

¹⁷ Онуштан, севгили кардашлар, ӧнӂӓ билерӓк буннары, сакынын, ки бу законсуз кишилӓр гиби йанныш йолдан гитмейӓсиниз да кенди карарыныздан сапмайасыныз.

¹⁸ Ама каавиленин бизим Сааби хем Куртарыӂы Иисус Христозун иивергисиннӓн хем Ону танымаклан. Она метинник олсун шинди хем дивеӂинӓ. Амин.