2 Korіnflіlerä 7 - Ени Бааланты

¹ Ӧлӓ ки, севгили кардашлар, чӱнкӱ биздӓ вар бӧлӓ адамаклар, пакланалым хертӱрлӱ тен хем дух мындарлыындан да айозлукта кусурсуз олалым, коркарак Аллахтан.

Павлинин севинмелии

² Бизӓ ер верин ӱреклериниздӓ! Биз кимсейӓ зарар йапмадык, кимсейи йолдан саптырмадык, кимсейи соймадык.

³ Буну сӧлӓмеерим, ки сизи кабаатландырайым, ама ниӂӓ ӧнӂӓ сӧледим, сиз бизим ӱреемиздейсиниз, ӧлӓ ки хазырыз сизиннӓн хем ӧлмӓӓ, хем йашамаа.

⁴ Бӱӱк умудум вар сиздӓ, чок ӱӱнерим сизиннӓн хем чок хошланэрым. Бӱтӱн бизим зеетлеримиздӓ севинӂимин кенары йок.

⁵ Зерӓ, ачан гелдик биз Македонийайа, гӱӱдемизин раатлыы олмады. Хер тарафтан зеетлендик – дышандан дӱӱшлӓр, ичйандан корку.

⁶ Ама Аллах, Ани иилендирер мӱнӱз оланнары, бизи дӓ иилендирди Титын гелмесиннӓн,

⁷ диил саде онун гелмесиннӓн, ама хаберлӓн, ани о сизиннӓн ииленди. О сӧледи бизӓ, некадар сиз бени ӧзлемишиниз, некадар йаш дӧкмӱшӱнӱз, некадар чалышмышыныз беним ичин. Ӧлӓ ки, бӓн таа чок севиндим.

⁸ Еер бӓн гӱӂендирдийсӓм сизи беним кийадымнан, пишман олмээрым, макар ки ӧнӂӓ пишман олдум, зерӓ гӧрерим, ки о кийадым гӱӂендирмиш сизи аз вакыда.

⁹ Шинди севинерим, диил ани гӱӂендиниз, ама ани гӱӂенмениз дӧндӱрдӱ сизи гӱнахтан Аллаха. Гӱӂендиниз Аллахын истедиинӓ гӧрӓ, ӧлӓ ки, бизим тарафтан сизӓ зарар олмады.

¹⁰ Зерӓ гӱӂенмӓк Аллах истедиинӓ гӧрӓ, инсаны гӱнахтан Аллаха дӧндӱрер хем куртулмайа гӧтӱрер. Бундан кимсей пишман олмаз. Ама дӱннейӂесинӓ гӱӂенмӓк ӧлӱм гетирер.

¹¹ Йа бакыныз, хеп бу гӱӂенмениз Аллахын истедиинӓ гӧрӓ, не бӱӱк хавез йаратты сиздӓ, не йаныклык, ки доорулуунузу чыкарасыныз, не ӱфкӓ, не корку, не истек, не шереметлик, не чалышмак, ки ӂезалайасыныз кабаатлы оланы! Хер тарафтан бу иштӓ гӧстердиниз кендинизи темиз.

¹² Онуштан, макар ки бӓн йаздым сизӓ о кийады, бу диил онун бетеринӓ, ким гӱӂендирди, еки ким гӱӂендирилди, ама йаздым, ки сизӓ ачылсын кахырыныз бизим ичин Аллахын ӧнӱндӓ.

¹³ Бунуннан иилендик. Ииленмемиздӓн каарӓ, таа чок севиндик Титын севинӂинӓ, зерӓ сиз хепсиниз онун ӱреени сериннеттиниз.

¹⁴ Ӧлӓ ки, бӓн калмадым утанмакта, еер бираз сизиннӓн ӱӱндӱсейдим онун ӧнӱндӓ. Ама ниӂӓ хепси доору, не сӧледим сизӓ, ӧлӓ Титын да ӧнӱндӓ сизиннӓн ӱӱнмемиз доору чыкты.

¹⁵ О сизи таа чок север, ачан аклына гетирер, ниӂӓ сиз хепсиниз сеслединиз да каблеттиниз ону сайгыйлан хем коркуйлан.

¹⁶ Севинерим, ани вар насыл умутланайым сизӓ хербир иш ӱзерӓ.