2 Korіnflіlerä 3 - Ени Бааланты

Апостолун икрамы

¹ Аӂаба, енидӓн таныштыралым мы кендимизи сизӓ? Лӓӓзым мы йоллайалым таныштырмак кийады сизӓ, йада сиздӓн ми кийат алалым?

² Сиз бизим кийадымызсыныз – кийат, ани бизим ӱреклеримиздӓ йазылы, херкездӓн билинӓн хем окунан.

³ Сиз кендиниз гӧстерерсиниз, ани Христозун кийадыйсыныз, бизим елимизлӓн гетирилмиш, йазылы диил чернилайлан, ама дири Аллахын Духуннан, йазылы диил таш таблалара, ама инсанын ӱреклеринин таблаларына.

⁴ Буну чок инанэрыз Аллахын ӧнӱндӓ, зерӓ Христос бизи инандырды.

⁵ Диил, ани саналым, ки беӂериклийиз, да кендимиз бишей йаптык, ама бизим беӂермӓк Аллахтан.

⁶ О бизи беӂерикли йапты, ки ени баалантынын изметкерлери олалым. О бааланты тутунмээр йазылы буквалардан, ама Айоз Духтан. Зерӓ буква ӧлдӱрер, ама Дух ӧмӱр верер.

Ески бааланты хем ени бааланты

⁷ Ӧлӱм гетирӓн изметчилик – ани ойулу букваларлан ташлар ӱстӱндӓ йазылыйды – ӧлӓ йалабыклы гелди, ки израиллилӓр бакамардылар Моисейин ӱзӱнӓ, макар ки онун ӱзӱндеки йалабыклык гечерлийди.

⁸ Ӧлейсӓ, некадар таа чок метинникли олаӂэк изметчилик, ангысы Духтан башланылмыш?

⁹ Чӱнкӱ вар метинник о изметчиликтӓ, ани инсаны кабаатландырэр, некадар таа бӱӱк метинник вар изметчиликтӓ, ани инсаны аклээр.

¹⁰ Зерӓ о йалабыклык шинди йалабык хич сайылмаз о изметчилӓӓ гӧрӓ, ангысынын метиннии таа ӱстӱн.

¹¹ Чӱнкӱ гечӓр изметчилик бӧлӓ метинниклӓн гелди, некадар таа чок метинникли олаӂэк о изметчилик, ани дайма вар.

¹² Чӱнкӱ биздӓ вар бӧлӓ бир умут, лафедериз бӱӱк кыйышмаклан.

¹³ Биз диилиз Моисей гиби, ким ӧртӓрди чаршафлан кенди ӱзӱнӱ, ки израиллилӓр гӧрмесиннӓр гечӓр йалабыклыы.

¹⁴ Оннарын фикирлери капалыйды, зерӓ бӱӱнӓ кадар, окуйуп Ески Баалантыйы, хеп о чаршаф оннарын ӱзлериндӓ калэр алынмамыш, зерӓ чаршаф калдырылэр салт Христозун араӂылыыннан.

¹⁵ Бӱӱнӓ кадар, Моисейи окуйуп, чаршаф ӧртӓр оннарын ӱреклерини.

¹⁶ Ама чаршаф алынэр, зерӓ: «Ачан Моисей Саабийӓ дӧнӓрди, чаршаф алынарды».

¹⁷ Бу сырада «Сааби» – Айоз Духтур. Нередӓ Саабинин Духу, орада сербестлик.

¹⁸ Биз хепсимиз ачык ӱзлӓн, ниӂӓ айнада, бакып Саабинин метинниинӓ, Она бензӓр, Саабинин Духундан диишериз метинниктӓн метиннӓӓ.