2 Korіnflіlerä 2 - Ени Бааланты

¹ Ӧлӓ ки, бӓн карарладым кенди-кендимӓ, ки гелдийнӓн, сизи енидӓн гӱӂендирмейим.

² Еер бӓн сизи гӱӂендирӓрсейдим, ким бени шеннендиреӂек, сиздӓн каарӓ, кими гӱӂендирдим?

³ Хеп буну йаздым сизӓ, ки, гелдийнӓн, бени гӱӂендирмесин, ким дӱшер севиндирсин. Зерӓ чок инанэрым, ани беним севинмӓм хепсинизи дӓ севиндирер.

⁴ Бӱӱк кахырлан хем ӱрек аӂысыннан йаздым сизӓ, чок йаш та дӧктӱм, диил ани гӱӂенӓсиниз, ама аннайасыныз, некадар чок северим сизи.

Афетмӓк гӱнахкерӓ

⁵ Еер биркимсей гӱӂендирдисейди, гӱӂендирмеди салт бени, ама бираз, истӓмеерим зееделемӓӓ, сизи хепсинизи.

⁶ Бу адама етӓр ӂеза, ани чойунуз верди.

⁷ Ӧлӓ ки, шинди зеедӓ ӂезаламайын ону, ама афедин хем иилендирин, ки зеедесиннӓн кахырланмасын.

⁸ Онуштан йалварэрым сизӓ, енидӓн гӧстерин она севги.

⁹ Бунун ичин йаздым, ки денейим сизи да гӧрейим, аслы мы, ани бени херзаман сеслеерсиниз?

¹⁰ Кими сиз афедерсиниз, ону бӓн дӓ афедерим. Еер афеттисейдим биркимсейи бишей ичин, афеттим сизин ичин Христозун ӧнӱндӓ,

¹¹ ки йапмасын бир тӱрлӱ кедер бизӓ шейтан. Зерӓ биз хаберсиз диилиз онун неетлериндӓн.

Апостолун изметчилии

¹² Гелип Троада касабасына Ии Хаберлӓн Христос ичин, макар ки Саабинин измети ичин бана капу ачылды,

¹³ хеп окадар духча усланамадым, зерӓ буламадым орада беним кардашымы, Титы. Онуштан, дейип «кал саалыӂаклан» оннара, гиттим Македонийайа.

¹⁴ Ама шӱкӱр Аллаха, Ким херзаман гездирер бизи Христозун енсемӓк парадында хем бизимнӓн херердӓ даадэр гӧзӓл кокуйу, не гелер Ону танымактан.

¹⁵ Зерӓ биз Христозун ии кокулуу Аллах ичин, хем оннарын арасында, ким куртулмак йолунда, хем оннарын арасында ким кайыплык йолунда.

¹⁶ Кимиси ичин ӧлӱм гетирӓн ӧлӱм кокусуйуз, ама башкасы ичин йашамак гетирӓн йашамак кокусуйуз. Ким аннар буннары аӂаба?

¹⁷ Зерӓ биз чойу гиби бозмээрыз Аллахын сӧзӱнӱ, ки безиргенник йапалым, ама насаат едериз Аллахын ӧнӱндӓ бир темиз ӱректӓн, ниӂӓ оннар, ким Аллахтан йолланмыш хем Христоза инанэр.