2 Korіnflіlerä 10 - Ени Бааланты

Павли доорулээр изметчилиини

¹ Бӓн, Павли, ани услуйум аранызда, ама кыйакым сиздӓн узак оларак, йалварэрым Иисус Христозун мӱнӱзлӱӱннӓн хем йалпаклыыннан

² хем истеерим, ки ачан гелеӂӓм, лӓӓзым олмасын, ки кыйак олайым бир кыйышмаклан хем гиргинниклӓн, не дӱшӱнерим гӧстермӓӓ оннара, ким сайэр, ани биз йашээрыз тенӓ гӧрӓ.

³ Зерӓ, макар ки биз тенӂӓ йашээрыз, тенӂӓ дӱӱшмеериз.

⁴ Бизим дӱӱшӱмӱзӱн силӓхлары диил тенӂӓ, ама оннарда вар Аллахтан кувет, калелери йыксыннар дейни.

⁵ Биз йыкэрыз бош фикирлери хем хепсини, ани шишкинниклӓн калкэр да дургудэр инсаны Аллахы танымактан. Хербир дӱшӱнмеклери есир алэрыз, ки Христозу сеслесиннӓр.

⁶ Хазырыз ӂезаламаа хербир сеслӓмезлии, ачан сизин сеслемениз таман олаӂэк.

⁷ Бакын ӧнӱнӱзӓ. Ким инанэр, ани кендиси Христозун, о дӱшӱнсӱн, ниӂӓ о Христозун, ӧлӓ биз дӓ Христозунуз.

⁸ Еер бӓн зеедӓ ӱӱнӓрсейдим бизим куветлӓн, не Сааби верди бизӓ, сизи каавилетмӓк ичин, ама диил йыкмак ичин, калмайаӂам утанмыш.

⁹ Буну деерим, ки санмайасыныз, ани бӓн сизи кийатларымнан коркудэрым.

¹⁰ Зерӓ деерлӓр: «Онун кийатлары кескин хем каави, ама кендиси биздейкӓн, гӱӱдеси йуфка, лафы да каба».

¹¹ Ким бӧлӓ лафедер, ко аннасын, ани, не деериз сизӓ кийатларымызда, узакта булунаркан, хеп ону йапаӂэз, аранызда булунаркан.

¹² Доору, ани биз кыйышмээрыз бенземӓӓ еки конмаа оннарлан, ким кендини метедер. Оннар кендилерини бензедерлӓр хем ӧлчерлӓр кенди ӧлчӱлериннӓн. Аариф олан бӧлӓ йапмаз.

¹³ Ама биз зеедесиннӓн ӱӱнмейеӂез. Ӱӱнмемиз о ӧлчӱдӓ калэр, ани Аллах верди бизӓ, ки, насаат едерӓк, етишелим сизӓ кадар.

¹⁴ Биз зорламээрыз кендимизи, сансын сизӓ етишмедик. Зерӓ илкин биз сизӓ етиштик Христозун Ии Хабериннӓн.

¹⁵ Биз ӱӱнмеериз ӧлчӱдӓн дышары башкаларын ишлериннӓн, ама умутланэрыз, ани сизин инаныныз бӱӱдӱкчӓ, аранызда ишлемӓк кырларымыз зееделиклӓн генишленеӂек,

¹⁶ ӧлӓ ки насаат едӓбилериз Ии Хабери сиздӓн таа ӧтӓӓ. Зерӓ истӓмеериз ӱӱнелим ишлӓрлӓн, ани йапылды башка бир адамын аланында.

¹⁷ «Ким ӱӱнер, ӱӱнсӱн Саабийлӓн».

¹⁸ Зерӓ диил о, ким кендини метедер, беенилеӂек, ама кими Сааби метедер.