2 Korіnflіlerä 1 - Ени Бааланты

Селӓм

¹ Бӓн, Павли, Иисус Христозун апостолу Аллахын истедиинӓ гӧрӓ, хем кардаш Тимофей селӓм йоллээрыз Аллахын клисесинӓ, ани Коринф касабасында, барабар Аллахын бӱтӱн айоз халкыннан, ани булунэр Ахайа долайында.

² Сизӓ ииверги хем услулук Аллах Бобамыздан хем Сааби Иисус Христоздан.

Иилендирӓн Аллах

³ Шӱкӱр Аллаха, бизим Сааби Иисус Христозун Бобасына! Одур йалпак ӱрекли Боба хем хертӱрлӱ кахырда иилендирӓн Аллах,

⁴ Ангысы иилендирер бизи хербир зеетлердӓ, ки биз дӓ иилендирӓбилелим оннары, ким булунэр хертӱрлӱ зеетлердӓ хеп ӧлӓ, ниӂӓ Аллах бизи кендимизи иилендирер.

⁵ Зерӓ некадар чок Христос ичин аӂы чекериз, окадар таа чок иилендирмӓк кабледериз Христоздан.

⁶ Еер кахыр чекӓрсейдик, бу сизин ииленмениз ичин хем куртулманыз ичин. Еер иилендирилирсейдик, бу да сизин иилендирилмениз ичин, ани ачылэр дайанманызда зеетлерӓ, ангыларыны биз дӓ чекериз.

⁷ Бизим бӱӱк умудумуз вар сиздӓ, зерӓ билериз, ани пай алэрсыныз бизимнӓн барабар, ниӂӓ зеетлердӓ, хеп ӧлӓ ииленмектӓ дӓ.

⁸ Кардашлар, биз истӓмеериз, билмейӓсиниз, нелӓр гечирдик Асийада. Бир бӱӱк ӱк алтындайдык, куведимиздӓн дышары. Ӧлӓ ки, умуду алдыйдык йашамактан.

⁹ Кендимизи дуйдук, сансын ӧлӱм дӧшеендӓ. Бу олду, ки умутланмайалым кендимизӓ, ама Аллаха, Ани ӧлӱлери дирилдер.

¹⁰ О бизи ӧлӓ йакын ӧлӱмдӓн куртарды хем куртарэр. Инанэрыз, ани, еер бизӓ йардым едӓрсейдиниз дуанызлан, О бизи ӧнӱмӱздӓ вакытларда да куртараӂэк,

¹¹ ки чок инсаннар Аллаха шӱкӱр етсиннӓр бизим ичин, зерӓ чойунун дуаларыннан бизӓ ииверги верилди.

¹² Бунуннан ӱӱнериз, пак ӱзлӓн буну вар насыл сӧлейелим, ани биз дӱннедӓ хем маасуз сизин аранызда йашадык, хализликлӓн верилип Аллаха, диил инсан аарифлиинӓ гӧрӓ, ама Аллахын иивергисинӓ гӧрӓ.

¹³ Биз йазмээрыз сизӓ башка бишей, ондан каарӓ, не кендиниз дӓ окуйэрсыныз хем аннээрсыныз. Умутланэрым, бизи доору аннайаӂэныз,

¹⁴ ниӂӓ дӓ бираз аннээрсыныз, ани бизим Сааби Иисусун гӱнӱндӓ сиз бизимнӓн ӱӱнӓбилирсиниз, ниӂӓ дӓ биз сизиннӓн.

Павлинин гелиши ойаланэр

¹⁵ Бу ӱзерӓ, бӱӱк инаннан неетлендим илкин сизӓ гидейим, ки ики катына ииверги Аллахтан еденӓсиниз,

¹⁶ да, сиздӓн гечип, Македонийайа гидейим, сора Македонийадан геери дӧнейим сизӓ, ки сиз бени гечирӓбилӓсиниз Иудейайа.

¹⁷ Бӧлӓ дӱшӱнӱп, не карарсыз мы даврандым аӂаба? Йада дӱннейӂесинӓ ми ишлеерим, дейип хем «олур», хем «олмаз»?

¹⁸ Аллах инанчтыр; О шаат бана, ани не сӧледик сизӓ, диил хем «олур», хем «олмаз».

¹⁹ Зерӓ Аллахын Оолу Иисус Христос, Кимин ичин биз – бӓн, Силуан хем Тимофей – насаат еттик, олмады хем «олур», хем «олмаз», ама Онда салт «олур».

²⁰ Зерӓ хепси Аллахын адамаклары Онда «олур». Онуштан биз деериз Онун адыннан «Амин», Аллах метинненсин.

²¹ О, Ким каавилеер бизи барабар сизиннӓн Христозда хем йаалээр бизи, О Аллахтыр,

²² Ангысы бизи мӱхӱрледи хем пей верди Айоз Духу бизим ӱреклеримизӓ.

²³ Шаат алэрым бана Аллахы, ани шиндийӓ кадар гелмедим Коринф касабасына, чӱнкӱ ӂаным аӂыйэр сизӓ.

²⁴ Диил, ани истеериз чорбаӂы олалым сизин инаныныза, ама сизиннӓн ишлеериз севинмениз ичин, чӱнкӱ сиз инанда каави дурэрсыныз.