1 Tіmofeyä 1 - Ени Бааланты

Селӓм

¹ Бӓн, Павли, Иисус Христозун апостолу, сыраланмыш бизим Куртарыӂы Аллахтан хем Сааби Иисус Христоздан, Ангысында бизим умудумуз,

² селӓм йоллээрым Тимофейӓ, беним хакына ушаама инанда: ииверги, аӂыйаннык, услулук Аллах Бобадан хем Христос Иисустан, бизим Саабидӓн.

Корун йанныш ӱӱретмеклердӓн

³ Ниӂӓ Македонийайа гидӓркӓн йалвардым сана, лӓӓзым каласын Ефес касабасында, ки сымарлайасын бир бойуна, ӱӱретмесиннӓр башка тӱрлӱ

⁴ да верилмесиннӓр масаллара хем сенселӓ лафларына, ангысынын йок биткиси. Буннар таа чок чекиш дебештирер, некадар Аллахын сырасыны дӱзер, ани инандан гелер.

⁵ Бу сымарламанын кеези – севги бир пак ӱректӓн, темиз нееттӓн хем диил икиӱзлӱ инандан.

⁶ Кимиси сапты буннардан да бошуна лафлара дакындылар.

⁷ Истеерлӓр Закон ӱӱредиӂилери олсуннар, ама аннамээрлар не кенди лафларыны, не о ишлери, нелӓр ичин кыйышмаклан лафедерлӓр.

⁸ Биз билериз, ани Закон ии, еер доору файдаланырсайды.

⁹ Зерӓ билериз, ани Закон диил курулу доору оланнар ичин, ама законсузлар ичин хем баш иилтмейеннӓр ичин, аллахсызлар ичин хем гӱнахкерлӓр ичин, оннар ичин, ани диил айоз хем паайа коймээрлар ону, не айоз, ана-бобаларыны дӱӱйеннӓр хем адам ӧлдӱреннӓр ичин,

¹⁰ ороспулук еденнӓр ичин, гомосексуалистлӓр ичин, чырак ӂамбазлары ичин, йаланӂылар ичин, емини тутмайаннар ичин хем башка хепси ичин, не каршы дурэр саа ӱӱренмейӓ,

¹¹ метин Аллахын шанны Ии Хаберинӓ гӧрӓ, ани бана инандырылды.

Аллахын аӂыйанныы

¹² Шӱкӱр едерим Иисус Христоза, бизим Саабийӓ, Ангысы бени каавилетти, зерӓ О сайды бени инанч да алды изметинӓ,

¹³ макар ки бӓн ӧнӂӓ бир кӧтӱлейиӂи, коолайыӂы хем зулумдум. Ама О аӂыды бени, зерӓ йапардым буннары билгисизликтӓн хем инансызлыктан.

¹⁴ Ама бизим Саабинин хайыры бана бол-бол верилди инаннан хем севгийлӓн билӓ, ани вар Иисус Христозда.

¹⁵ Аслыдыр хем йарашэр, ки херкезиндӓн кабледилсин о сӧз, ани деер: «Иисус Христос гелди бу дӱннейӓ, ки гӱнахкерлери куртарсын», ангыларындан бӓн ен кӧтӱсӱйӱм.

¹⁶ Ама Аллах бени аӂыды, ки Иисус Христос илкин бендӓ гӧстерсин кенарсыз дайанмасыны, да ӧрнек олабилейим оннара, ким Она инанаӂэк да дивеч йашамак еденеӂек.

¹⁷ Дивеч Падишаха – ӧлӱмсӱз, гӧрӱнмӓз, бириӂик Аллаха – дивечтӓн дивеӂӓ икрам хем метинник олсун. Амин.

Аскер ии ӂенктӓ

¹⁸ Оолум Тимофей, бу сымарламайы сана верерим пророклук сӧзлеринӓ гӧрӓ, ани ӧнӂӓ сӧленди сенин ичин, ки о сӧзлӓрлӓн аскер оласын ии ӂенктӓ

¹⁹ да коруйасын инаны бир пак ӱзлӓн, недӓн бир бойу атылды да инаннарыны телеф етти, ниӂӓ бир геми, ани ташлара чарпэр.

²⁰ Оннарын арасында булунэр Именей хем Александру, ангыларыны брактым шейтанын елинӓ, ки ӱӱренсиннӓр, ани дӱшмеер Аллахы кӧтӱлемӓӓ.