1 Salonіklіlerä 1 - Ени Бааланты

Селӓм

¹ Бӓн, Павли, Силуан хем Тимофей селӓм йоллээрыз Салоник клисесинӓ, ангысы Аллах Бобанын хем Сааби Иисус Христозун. Ииверги хем услулук сизӓ /бизим Аллах Бобадан хем Сааби Иисус Христоздан/.

Хакына инан

² Херзаман шӱкӱр едериз Аллаха хепсиниз ичин да анэрыз сизи бизим дуаларымызда.

³ Дайма анэрыз бизим Аллах Бобанын ӧнӱндӓ, несой инаннан ишлеерсиниз, несой севгийлӓн савашэрсыныз, да некадар дайанэрсыныз, умуду койарак бизим Сааби Иисус Христоза.

⁴ Аллахтан севилмиш кардашлар, билериз, несой сечилдиниз.

⁵ Зерӓ Ии Хабери гетирмедик сизӓ салт лафлан, ама куветлӓн, Айоз Духлан хем чок каави инаннан, ниӂӓ билерсиниз, несой гӧтӱрдӱк кендимизи сизин хатырыныз ичин, ачан сиздейдик.

⁶ Сиз бизӓ хем Саабийӓ бензӓр олдунуз, кабледип Аллахын сӧзӱнӱ чок зеет ичиндӓ, севинмеликлӓн, ани гелер Айоз Духтан.

⁷ Ӧлӓ ки, ӧрнек олдунуз хепси инанӂылара Македонийада хем Ахайада.

⁸ Зерӓ сиздӓн даалды Саабинин сӧзӱ. Хабер етишти сизин Аллаха инаныныз ичин, диил саде Македонийа хем Ахайа ерлеринӓ, ама херери, ӧлӓ ки йок лӓӓзымнык сизин ичин бишей сӧлейелим.

⁹ Зерӓ оннар кендилери сӧлеерлӓр, несой каблеттиниз бизи, ачан гелдик, да ниӂӓ идоллардан Аллаха дӧндӱнӱз, ки хакына хем дири Аллаха измет едӓсиниз,

¹⁰ да беклейӓсиниз гӧктӓн Онун Оолуну, Ангысыны О дирилтти ӧлӱмдӓн, Иисусу, Ангысы куртарэр бизи Аллахын гелӓн ӱфкесиндӓн.