1 Petrіnіn 4 - Ени Бааланты

Аллах ичин йашамак

¹ Ниӂӓ Христос зеетленди гӱӱдейлӓн, хеп ӧлӓ сиз дӓ фикирлеринизи зеет ичин хазырлайын, зерӓ ким гӱӱдейлӓн зеетленер, о гӱнах йапмактан дургунэр.

² Ӧлӓ ки, калмыш вакыды бу гӱӱдейлӓн йашайын диил инсанын хамеллеринӓ гӧрӓ, ама Аллахын истедиинӓ гӧрӓ.

³ Зерӓ етӓр некадар гечмиш вакытларда тайфӓннарын истедиклерини йаптыныз, йашайарак айыплыкта, шефкликтӓ, сарфошлукта, хайырсызлык конаклыында, ичкиӂиликтӓ хем ииренч идоллара баш иилтмектӓ.

⁴ Шинди оннар шашэрлар, чӱнкӱ сиз оннарлан барабар далмээрсыныз о ташкын хайырсызлык селлеринӓ, да онуштан кӧтӱлеерлӓр сизи.

⁵ Оннар ӂувап вереӂеклӓр Аллахын каршысында, Ангысы хазыр даава кесмӓӓ хем дирилерӓ, хем ӧлӱлерӓ.

⁶ Онун ичин Ии Хабер насаат едилди оннара да, ким ӧлдӱ, ки оннара ӧбӱр инсаннар гиби гӱӱдейӂесинӓ даава кесилсин, ама духчасына Аллах гиби йашасыннар.

⁷ Хербир ишин биткиси йакындыр, онуштан акыллы олун, дуайлан кушкулукта беклейин.

⁸ Хепсиндӓн таа чок сиздӓ бири-биринизӓ хашлак севги олсун, зерӓ севги чок гӱнахлары ӧртер.

⁹ Мырылданмайарак бири-биринизӓ, конакчы олун.

¹⁰ Херкез измет етсин бири-биринӓ о айыры баашышлан, не Аллахтан каблетти, ниӂӓ оннар, ким ии кулланэр Аллахын хертӱрлӱ иивергисини.

¹¹ Лафедӓрсейди бириси, ко Аллахын сӧзӱнӱ сӧлӓр гиби лафетсин. Измет едӓрсейди бириси, измет етсин о куветлӓн, не Аллахтан верили, ки хепсиндӓн метинненсин Аллах Иисус Христос араӂылыыннан. Христоза дӱшер метинник хем кувет дивечтӓн дивеӂӓ. Амин.

¹² Севгили кардашларым! Атешли денемеклерӓ шашмайын, ани башыныза гелер сизи денемӓк ичин, ниӂӓ бир шашылаӂак иш.

¹³ Буна каршы, севинин, чӱнкӱ пай алэрсыныз Иисус Христозун зеетлериндӓ, ки Онун метиннии ачылмасында да севинӓсиниз хем шенненӓсиниз.

¹⁴ Еер сизи азарларсайдылар Христозун ады ичин, не мутлу сизӓ, зерӓ Аллахын шанны Духу булунэр ӱстӱнӱздӓ. /Оннардан О кӧтӱленер, ама сиздӓн метинненер./

¹⁵ Саде олмасын, ки биркимсей сиздӓн зеетленер, чӱнкӱ ӧлдӱрӱӂӱ, хырсыз, фена йапыӂы, еки карышэр башкаларынын ишинӓ.

¹⁶ Ама еер сӓн зеетленӓрсейдин христиан гиби, утанма, ама метиннӓ Аллахы, чӱнкӱ Христозун адыны ташыйэрсын.

¹⁷ Зерӓ вакыт гелди, даава башлансын Аллахын евиндӓн. Еер даава биздӓн башланарсайды, несой олаӂэк оннарын биткиси, ким Аллахын Ии Хаберини сеслӓмеер?

¹⁸ «Еер доору инсаннар гӱӂӱлӓ куртуларсайды, озаман аллахсызларлан хем гӱнахкерлӓрлӓн не олур?»

¹⁹ Ӧлӓ ки, оннар, ким Аллахын истедиинӓ гӧрӓ зеетленер, кенди ӂаннарыны инанч Йарадыӂыйа иилик йапмаклан инандырсыннар.