1 Petrіnіn 1 - Ени Бааланты

Селӓм

¹ Бӓн, Петри, Иисус Христозун апостолу, сечилмишлерӓ селӓм йоллээрым, ангылары йабанӂы гиби йашээрлар дааныкта: Понт, Галатийа, Каппадокийа, Асийа хем Вифинийа ерлериндӓ.

² Сечилдиниз Аллах Бобанын ӧнӂӓ билмесинӓ гӧрӓ, Аллахын Духуннан айоз халк оларак, ки сеслейӓсиниз Иисус Христозу, хем Онун каны серпилсин ӱстӱнӱзӓ. Сизӓ ииверги хем услулук зееделенсин.

Шӱкӱр Аллаха дири умут ичин

³ Метинник олсун Аллаха, Саабимиз Иисус Христозун Бобасына, Ангысы Кенди бӱӱк аӂыйанныындан йапты, аники енидӓн дууалым, да Иисус Христозун дирилмесиннӓн биздӓ бир ени умут олсун,

⁴ чӱрӱмӓз, лекесиз, сӧрпешмӓз бир мирас, ани сизин ичин гӧктӓ саклы.

⁵ Сиз Аллахын кувединнӓн, инаннан корунэрсыныз куртулмак ичин, ани хазыр ачылсын битки вакытларда.

⁶ Бунун ичин севинин, бакмайарак, ани шинди бир парча вакыт лӓӓзым зеет чекӓсиниз хертӱрлӱ денемеклердӓн,

⁷ ки сизин инанынызын хализлии гӧстерилсин. Алтын, ани кайбелер, атештӓн дененер. Хеп ӧлӓ инаныныз да, ани таа паалы алтындан, дененер, ки сиздӓ метинник, шаннык хем икрам олсун Иисус Христозун гелмесиндӓ.

⁸ Макар ки Ону гӧрмединиз, Ону северсиниз, шинди дӓ, гӧрмейерӓк, ама Она инанарак, севинерсиниз шанны бир севинмеликлӓн, ани йок насыл лафлан аннатмаа.

⁹ Зерӓ етишерсиниз инанынызын беенинӓ – ӂаннарынызын куртулмасына.

¹⁰ Бу куртулмак ичин чалышмаклан соруштурдулар хем аараштырдылар пророклар, ангылары ӧнӂӓ пророклук еттилӓр ииверги ичин, ани сизӓ верилмиш.

¹¹ Бактылар аннасыннар, незаман хем насыл олаӂэк бу вакыт, ани оннарда Христозун Духу гӧстерӓрди, ангысы ӧнӂӓ хаберледи Христозун зеетлери ичин хем ондан сора метиннии ичин.

¹² Оннара ачылды, ани измет едӓрдилӓр диил кендилеринӓ, ама сизӓ. Лафеттилӓр оннар ичин, не сиз ӱӱрендиниз оннардан, ким сизӓ Ии Хабери аннатты. Ии Хабер аннадылды Айоз Духун йардымыннан, ани гӧктӓн йолланылды. Ангиллӓр дӓ истеерлӓр бу ишлери аннамаа.

Айоз олун

¹³ Онун ичин фикирлериниз ишӓ хазыр олсун. Айык олун. Ен хептӓн умутланын о иивергийӓ, ани сизӓ верилеӂек Иисус Христозун гелмесиндӓ.

¹⁴ Ниӂӓ сеслейиӂи ушаклар, кайыл олмайын о хамеллӓрлӓн, ани сиздӓ варды, ачан таа доорулуу билмӓрдиниз.

¹⁵ Ама ниӂӓ О, Ким сизи чаарды, – айоздур, хеп ӧлӓ сиз дӓ олун айоз бӱтӱн йашаманызда.

¹⁶ Зерӓ йазылы: «Олун айоз, чӱнкӱ Бӓн айозум».

¹⁷ Еер сиз дейӓрсейдиниз Боба Она, Ким кимсейӓ пай тутмээр, ама херкезинӓ йаптыына гӧрӓ даава йапэр, онуштан бакын, Аллахы хатырлайарак, бу ӧмӱрӱ гечирмӓӓ, ани йашээрсыныз бу дӱннедӓ.

¹⁸ Зерӓ ии билерсиниз, не ӧденди, ки куртуласыныз бу бошуна йашамактан, ани едендиниз бобаларыныздан. Бу ӧдек диил гечиӂи ишлӓр – гӱмӱш йада алтын,

¹⁹ ама Христозун паалы каны, Ангысы кусурсуз хем лекесиз кузу.

²⁰ О дӱннейин курулмасындан ӧнӂӓ билинӓрди, ама ачылды битки вакытларда сизин ичин.

²¹ Онун араӂылыыннан Аллаха инандыныз, Ангысы дирилтти Ону ӧлӱдӓн да верди Она метинник, ки инанасыныз хем умутланасыныз Аллаха.

²² Аслылыы сеслемӓклӓн ӂаннарынызы /Айоз Духлан/ пакладыныз. Бунун ичин кардашларынызы икиӱзлӱлӱксӱз северсиниз. Онуштан севин бири-биринизи хашлаклыклан хем бӱтӱн ӱреклӓн.

²³ Зерӓ Аллахын дири хем дивеч сӧзӱннӓн сиз енидӓн дуудунуз, ниӂӓ ушаклар, диил бир ӧлӱмнӱ бобадан, ама ӧлӱмсӱз Бобадан.

²⁴ Зерӓ «инсан ота бензеер, онун бӱтӱн шаны бир кыр чичӓӓ гиби. От куруйэр, чичек дӱшер,

²⁵ ама Саабинин сӧзӱ дайма калэр». Бу о сӧздӱр, ани сизӓ насаат едилди.