1 Korіnflіlerä 9 - Ени Бааланты

Апостолун пайы

¹ Диилим ми бӓн сербест? Диилим ми апостол? Гӧрмедим ми бӓн Иисусу, бизим Саабийи? Диилсиниз ми сиз – беним изметимин мейвасы Саабидӓ?

² Еер башкасы ичин диилсейдим апостол, сизин ичин баарлем апостолум. Беним апостоллуумун мӱхӱрӱ сизсиниз, чӱнкӱ инанӂыйсыныз Саабийӓ.

³ Бутӱрлӱ доору чыкарэрым кендими оннара каршы, ким бени мааналээр.

⁴ Йок му доорулуумуз, ийелим хем ичелим?

⁵ Йок му доорулуумуз, биз бирӓр кызкардаш алалым, ки карымыз олсун, ниӂӓ йапэр ӧбӱр апостоллар, Саабинин кардашлары хем Кифа?

⁶ Не, салт беним хем Варнаванын мы йок доорулуумуз ишлӓмейелим?

⁷ Ким ӂенгӓ гидер кенди харӂыннан? Ким баа койэр да емишиндӓн имеер? Ким сӱрӱйӱ отладэр да сӱрӱнӱн сӱдӱндӓн ичмеер?

⁸ Не, саде адамӂасына мы буннары сӧлеерим? Буну сӧлӓмеер ми Айоз Закон да?

⁹ Моисейин законунда йазылы: «Бааламайасын ӧкӱзӱн аазыны харман дӱӱйӓркӓн». Не, ӧкӱзлӓр ичин ми кахырланэр Аллах?

¹⁰ Оса маасуз бизим ичин ми лафедер? Елбетки, бизим ичин йазылы. Чӱнкӱ ким сӱрер, сӱрсӱн умутлан, хем ким харман дӱӱйер, дӱӱсӱн умутлан, ки пайы да олаӂэк хармандан.

¹¹ Чӱнкӱ биз ектик сиздӓ духча тоомнар, бӱӱк иш ми олур, еер сиздӓн тенӂӓ бичӓрсӓк?

¹² Еер башкаларынын доорулуу варсайды, сиздӓн йардым алсыннар, бизим таа чок доорулуумуз йок му? Ама биз бу доорулуктан файдаланмадык. Хепсини гечирдик, ки кӧстек олмайалым Христозун Ии Хаберинин насаат едилмесинӓ.

¹³ Билмеерсиниз ми, ани айоз изметчилик йапан Айоз бинадан дойунэр. Ким изметчи курбанныкта, пай алэр ондан, не вар курбанныкта.

¹⁴ Хеп ӧлӓ Сааби да сыралады, ким насаат едер Ии Хабери, Ии Хабердӓн йашасыннар.

¹⁵ Ама бӓн бу доорулукларымдан хич бирисиндӓн билӓ файдаланмадым. Буннары йазмээрым, ки беним ичин бишей йапылсын, зерӓ бана таа ии ӧлейим, некадар биркимсей боша чыкарсын беним лафымы.

¹⁶ Еер насаат едӓрсейдим Ии Хабери, йок нейлӓн ӱӱнейим, зерӓ бу беним борӂум. Вай бана, еер насаат етмӓрсейдим!

¹⁷ Еер буну кенди истедиимдӓн йапарсайдым, баашыш еденӓрим. Еер зоруна йапарсайдым, йапэрым саде о измети, не бана инандырылмыш.

¹⁸ Озаман не баашыш бана олур? Бу, ани насаат едерӓк Ии Хабери /Христос ичин/, насаат едерим ӧдексиз, файдаланмайарак, Ии Хаберин насаатчысы оларак, кенди доорулуумдан.

¹⁹ Зерӓ сербест оларак, кимсейин чыраа диилим, кендими чырак херкезинӓ йаптым, ки таа чок инсан казанабилейим.

²⁰ Иудейлӓрлӓн бӓн иудей гиби кендими гӧтӱрдӱм, ки иудейлери казанайым. Макар ки кендим Айоз Законун запында диилим, Законун запында оланнарлан сансын Законун запында олдум, ки казанабилейим Закондан заплы оланнары.

²¹ Оннарлан, кимдӓ Айоз Закон йок, олдум сансын бендӓ дӓ Закон йок, ки казанабилейим оннары, кимдӓ Закон йок, макар ки бӓн диилим бир адам, кимдӓ йок Аллахын Закону, ама Христозун законун запындайым.

²² Йуфкаларлан йуфка олдум, ки йуфкалары казанабилейим. Херкезиннӓн хепси олдум, ки куртарабилейим баарлем кимисини.

²³ Хепсини Ии Хабер ичин йапэрым, ки беним дӓ пайым олсун Ии Хаберин ииликлериндӓн.

²⁴ Билмеерсиниз ми, ани ким йарышмакта йарышэр, хепси качып-йарышэр, ама салт бириси баашыш казанэр? Сиз ӧлӓ качын, ки баашыш казанабилӓсиниз!

²⁵ Хепси, ким йарышэр атлетик ойуннарда, тутэрлар кендилерини заплы хербир ӱзерӓ. Оннар буну йапэрлар, ки бир сӧрпешӓр фенец казансыннар. Ама биз йапэрыз, ки сӧрпешмӓз фенец казаналым.

²⁶ Онуштан бӓн качмээрым, ниӂӓ бириси, ким билмеер, нерейи доору качэр. Бошуна йумуруклан дӱӱмеерим, ниӂӓ бириси, ким лӱзгери дӱӱйер.

²⁷ Ама кенди гӱӱдеми серт кулланэрым да запта тутэрым. Зерӓ истӓмеерим, ки насаат едип башкасына, сонда кендим бир тарафта калайым.