1 Korіnflіlerä 6 - Ени Бааланты

Христианнарда даавалар

¹ Насыл кыйышэр сиздӓн бириси башкасына даава ачмаа, да даава кесмӓӓ гидер инансызлара, ама гитмеер Аллахын айоз халкына?

² Билмеерсиниз ми, ани Аллахын айоз халкы даава кесеӂек бу дӱннейӓ? Еер дӱннейӓ даава кесӓрсейдиниз, кӱчӱк ишлердӓ даава кесӓмӓрсиниз ми?

³ Билмеерсиниз ми, ани биз даава кесеӂез ангиллерӓ? Некадар таа чок даава кесӓбилириз бу заманын ишлериндӓ!

⁴ Ачан вар бир дааваныз бу йашамактакы ишлӓр ичин, сиз дааваӂы койэрсыныз оннары, ким клиседӓ бишей диил.

⁵ Буннары сӧлеерим сизин утанманыз ичин. Не, сизин аранызда бир дӓ аариф адам йок му, ки чӧздӱрсӱн кардашлар арасында даавалары?

⁶ Кардаш кардашыннан даавайа чыкэр, да буну инансызларын ӧнӱндӓ йапэр!

⁷ Сиз бири-биринизи даавайа верӓрсениз, бу – сизин ичин бир ашааланмактыр. Таа ии диил ми, зарара дайанасыныз? Таа ии диил ми, кайбедӓсиниз?

⁸ Ама сиз кендиниз зарар йапэрсыныз хем кенди кардашларынызы да сойэрсыныз.

⁹ Билмеерсиниз ми, ани о доору олмайаннар Гӧк Падишахлыыны мирас етмейеӂеклӓр. Алданмайын, хайырсызлык йапаннар, идоллара баш иилденнӓр, ороспулук йапаннар, гомосексуалистлӓр,

¹⁰ хырсызлар, тамахлар, ичкиӂилӓр, амазчылар, сойгунӂулар Гӧк Падишахлыыны мирас етмезлӓр.

¹¹ Бутӱрлӱйдӱ киминиз сиздӓн, ама йыкандыныз, айозландыныз, акландыныз Сааби Иисус Христозун адыннан хем бизим Аллахын Духуннан.

Ороспулуктан корунун

¹² «Хепсини дӱшер йапайым», – деерсиниз, салт диил хепси файдалы. «Хепсини дӱшер йапайым», – деерсиниз, ама бишей бракмам бени запласын.

¹³ «Имӓк шкембӓ ичин, шкембӓ дӓ имӓк ичин», – деерсиниз. Ама Аллах телеф едеӂек икисини дӓ. Гӱӱдӓ диил ороспулук ичин, ама Сааби ичин, Сааби дӓ гӱӱдӓ ичин.

¹⁴ Аллах, Ким дирилтти Саабийи, дирилдеӂек бизи дӓ Кенди кувединнӓн.

¹⁵ Билмеерсиниз ми, ани сизин гӱӱделериниз – Христозун еклери? Не, Христозун еклерини алып, йапайым оннары ороспулук еклери ми? Олмаз!

¹⁶ Не, билмеерсиниз ми? Ким бирлешер ороспуйлан, бир гӱӱдӓ олэр онуннан. Ниӂӓ дӓ сӧленер: «Оннар икиси бир гӱӱдӓ олэрлар».

¹⁷ Ама ким бирлешер Саабийлӓн, Онуннан бир дух олэр.

¹⁸ Корунун ороспулуктан. Калан гӱнахлар, ани инсаннар йапэр, гӱӱдедӓн дышары, ама ороспу кенди гӱӱдесинӓ каршы гӱнах йапэр.

¹⁹ Не, билмеерсиниз ми, ани гӱӱдениз – Духун айоз бинасы, нередӓ Айоз Дух булунэр, хем Ону Аллахтан каблеттиниз? Сиз кенди-кендинизин диилсиниз.

²⁰ Зерӓ сиз сатын алынмышсыныз бир бӱӱк паайлан. Онуштан метиннейин Аллахы сизин гӱӱденизлӓн /хем духунузлан, ани Аллахтан каблеттиниз/.