1 Korіnflіlerä 16 - Ени Бааланты

Кардашлара йардым

¹ Дӧнелим йардыма, не топланаӂэк Аллахын айоз инсаны ичин. Сиз йапын ӧлӓ, ниӂӓ сыраладым Галатийа клиселериндӓ.

² Херкезиниз хафтанын илк гӱнӱ койсун бир тарафа кенди гелириндӓн, некадар колайлыы вар, да корусун, ки бӓн гелдийнӓн, олмасын йардым топланмасы.

³ Ачан гелеӂӓм, кими сечеӂениз, оннары кийатларлан йоллайаӂам, гӧтӱрсӱннӓр сизин баашышларынызы Иерусалимӓ.

⁴ Еер уйгун олурса, ки бӓн дӓ гидейим, озаман бенимнӓн гелирлӓр.

Павлинин маасуз истедиклери

⁵ Сизӓ гелеӂӓм, ачан Македонийадан гечеӂӓм, зерӓ бӓн гечерим Македонийадан.

⁶ Беки сиздӓ бир вакыт калаӂам, беки дӓ кышлайаӂам, еер сиз бени гечирӓрсениз, нерейи гидеӂӓм.

⁷ Зерӓ бӓн истӓмеерим гӧрӱшейим сизиннӓн салт гечерӓк, ама умутланэрым сиздӓ калайым бир парча вакыт, еер Сааби изин верирсӓ.

⁸ Ефес касабасында дураӂам Еллинӂи гӱнӱ йортусунадан,

⁹ зерӓ бана ачылды бир гениш капу бӱӱк ишлӓр ичин, ама каршы дураннар да чок.

¹⁰ Еер гелӓрсейди сизӓ Тимофей, бакын, о коркусуз олсун аранызда. Зерӓ о йапэр Саабинин ишини, ниӂӓ дӓ бӓн.

¹¹ Онуштан кимсей ону паасызландырмасын, ама гечирин ону услулуклан, ки гелсин бана, зерӓ бӓн беклеерим ону кардашларлан.

¹² Кардаш Аполлоса чок йалвардым, ки гитсин кардашларлан сизӓ, ама о хич истӓмеди шинди гитсин. О гидеӂек, незаман вакыды уйаӂэк.

¹³ Кушку олун, инанда каави дурун, гиргин хем куветли олун.

¹⁴ Хепсини севгийлӓн йапын.

¹⁵ Йалварэрым сизӓ, кардашлар, – сиз билерсиниз Стефанын евдекилерини, оннар Ахайада илк инанӂылар да верилдилӓр, ки Аллахын айоз халкына измет етсиннӓр –

¹⁶ бутӱрлӱ инсаннары сеслейин хем хепсини, ким оннарлан ишлеер хем чалышэр.

¹⁷ Бӓн севиндим, ачан Стефан, Фортунат хем Ахаик гелдилӓр. Оннар бана унуттурдулар сизиннӓн олмамазлыымы,

¹⁸ зерӓ оннар бени дӓ, сизи дӓ духча сериннеттилӓр. Онуштан бусой инсаннары паайа койун.

¹⁹ Селӓмнеерлӓр сизи Асийа долайында клиселӓр. Сизӓ чок селӓм йоллээрлар Акилла хем Прискилла клисейлӓн билӓ, ани оннарын евиндӓ.

²⁰ Хепси кардашлар селӓм сизӓ йоллээрлар. Селӓмнейин бири-биринизи айоз ӧпӱшлӓн.

²¹ Бӓн, Павли, бу селӓмнери йазэрым кенди елимнӓн.

²² Еер биркимсей севмӓрсейди Сааби Иисус Христозу, олсун бетвалы. Марана фа!

²³ Сааби Иисусун иивергиси олсун сизиннӓн.

²⁴ Беним севгилиим Иисус Христозда сизиннӓн хепсинизлӓн. /Амин./