1 Korіnflіlerä 12 - Ени Бааланты

Духун баашышлары

¹ Кардашлар, истӓмеерим, хаберсиз каласыныз Духун баашышларындан.

² Билерсиниз, ачан сиз таа тайфӓндыныз, йолу шашырып, баш иилдӓрдиниз дилсиз идоллара.

³ Онуштан истеерим, аннайасыныз, ани кимсей, ким Аллахын Духуннан лафедер, йок насыл бетваласын Иисусу, хем кимсей дейӓмӓз Она «Сааби Иисус», салт Айоз Дух.

⁴ Вар чок тӱрлӱ баашышлар, ама хепси бир Духтан.

⁵ Вар чок тӱрлӱ изметлӓр, ама салт бир Сааби.

⁶ Вар чок тӱрлӱ ишлемеклӓр, ама Аллах бир, Ким херкездӓ хепсини йапэр.

⁷ Херкезӓ верилер баашыш, ангысындан Айоз Дух ачылэр, ки файда гетирсин.

⁸ Бирисинӓ Духлан верилер, аарифчесинӓ лафетсин, башкасына верилер, билгили лафетсин хеп о Духлан.

⁹ Хеп о Духтан бирисинӓ верилер инан, башкасына хеп о Духтан беӂериклик хасталары алыштырмаа.

¹⁰ Таа башкасына верилер кувет, ки йапсын кудретли ишлӓр, башкасына – пророклук етсин, башкасына – духлары танысын, башкасына хертӱрлӱ диллӓр верилер, башкасына беӂериклик, диллери чевирсин.

¹¹ Хепси буннары йапэр бир Дух, Ангысы херкезинӓ пайедер, ниӂӓ Кенди истеер.

Гӱӱденин бирлии

¹² Ниӂӓ гӱӱдӓ бир, ама еклери чок, да чок еклердӓн бир гӱӱдӓ курулу, хеп ӧлӓ Христозда да.

¹³ Хепсимиз ваатиз олдук бир Духлан, ки бир гӱӱдӓ олалым, олсун иудей, олсун урум, олсун чырак, олсун сербест, хепсимиз бир Духтан суланмышыз.

¹⁴ Зерӓ гӱӱдӓ диил бир ектӓн, ама топлу чок ектӓн.

¹⁵ Еер айак дейӓрсейди: «Чӱнкӱ диилим ел, диилим гӱӱдедӓн», не, бу бетерӓ олмаз мы гӱӱдедӓн?

¹⁶ Еер кулак дейӓрсейди: «Чӱнкӱ диилим гӧз, диилим гӱӱдедӓн», не, бу бетерӓ олмаз мы гӱӱдедӓн?

¹⁷ Еер бӱтӱн гӱӱдӓ олайды саде гӧз, не олаӂэйды ишитмӓклӓн? Еер бӱтӱн гӱӱдӓ олайды салт кулак, не олаӂэйды коку дуйгусуннан?

¹⁸ Ама Аллах ерлештирди хербир еки гӱӱдедӓ ӧлӓ, ниӂӓ Кенди истеди.

¹⁹ Еер хепси бир ек олайды, озаман не олаӂэйды гӱӱдейлӓн?

²⁰ Доору, ани ек чок, ама гӱӱдӓ бир.

²¹ Гӧз йок насыл десин елӓ: «Сӓн диил лӓӓзымсын бана». Хеп ӧлӓ баш йок насыл десин айаклара: «Йок лӓӓзымныым сизин ичин».

²² Буна каршы, гӱӱденин еклери, ани гӧрӱнер таа йуфка, мутлак бизӓ лӓӓзым.

²³ Хем гӱӱденин еклеринӓ, ангыларыны таа айып сайэрыз, таа чок икрам верериз, да еклеримизӓ, ани диил гӧзӓл, маасуз кахыр гӱдериз.

²⁴ Гӧзӓл еклерин йок лӓӓзымныклары донаклык ичин. Ама Аллах ӧлӓ гӱӱдейи йапты, ки таа чок хатыр верилсин о еклерӓ, ангылары таа аз икрамда,

²⁵ ки гӱӱдедӓ айырыклык олмасын, ама еклӓр биртӱрлӱ заамет гӱтсӱннӓр бири-бирилери ичин.

²⁶ Еер зеетленӓрсейди бир ек, хепси еклӓр онуннан барабар зеетленерлӓр. Еер бир ек икрамнанарсайды, хепси еклӓр онуннан барабар севинерлӓр.

²⁷ Сиз Христозун гӱӱдеси, хем айыры-айыры бу гӱӱденин еклерийсиниз.

²⁸ Аллах ерлештирди клиседӓ илкин апостоллары, икинӂи – пророклары, ӱчӱнӂӱ – ӱӱредиӂилери, сора оннары, ким кудретли ишлӓр йапэр; сора оннары, кимин баашышы вар хасталары алыштырмаа; оннары, ким йардым едер; оннары, ким кулланэр; оннары, ким лафедер хертӱрлӱ диллердӓ.

²⁹ Не, хепси ми апостол? Хепси ми пророк? Хепси ми ӱӱредиӂи? Хепси ми йапабилер кудретли ишлӓр?

³⁰ Хепси ми хасталары алыштырабилер? Хепси ми лафедӓбилер башка диллердӓ? Хепси ми диллери чевирӓбилер?

³¹ Чалышын таа ӱстӱн баашышлары каблетмӓӓ. Да бӓн гӧстереӂӓм сизӓ ен ии йолу.