1 Korіnflіlerä 11 - Ени Бааланты

¹ Бендӓн ӧрнек алын, ниӂӓ бӓн Христоздан ӧрнек алэрым.

Сыра клиседӓ

² Метедерим сизи, кардашлар, ани хер тарафтан аклыныза гетирерсиниз бени хем ани коруйэрсыныз ӱӱретмеклери ӧлӓ, ниӂӓ ӱӱреттим сизи.

³ Ама истеерим билӓсиниз, ани хербир адамын башы – Христос, карынын башы – коӂасы, ама Христозун башы – Аллах.

⁴ Хербир адам, ким дуа едер йада пророклук едер узун сачлан, кенди башыны икрамсызлээр.

⁵ Хем хербир кары, ким дуа едер йада пророклук едер ачык башлан, икрамсызлээр кенди башыны. Бӧлӓ бир кары траш олмуш кары гиби олур.

⁶ Еер кары истӓмӓрсейди ӧртӱнмӓӓ, озаман кыркынсын. Ама еер утанырсайды кыркынсын йада траш олсун, озаман ӧртӱнсӱн.

⁷ Адам диил лӓӓзым ӧртсӱн башыны, чӱнкӱ адам – Аллахын бенземеси хем метинниидир. Ама кары – адамын метиннии.

⁸ Зерӓ адам алынмады карыдан, ама кары алынды адамдан.

⁹ Адам йарадылмады кары ичин, ама кары йарадылды адам ичин.

¹⁰ Онуштан, ангиллерин хатыры ичин, кары кенди башыны лӓӓзым тертипли тутсун.

¹¹ Ӧлӓ ки, Саабидӓ не кары адамсыз, не адам карысыз.

¹² Чӱнкӱ, ниӂӓ кары адамдан йарадылды, адам да карыдан дууэр, буннар хепси Аллахтандыр.

¹³ Карарлайын сиз кендиниз: йакышыклы мы, бир кары дуа етсин Аллаха ачык башлан?

¹⁴ Аӂаба сизи сыра кендиси ӱӱретмеер ми, ани утанчтыр бир адам узун сач ташысын.

¹⁵ Ама кары ичин узун сач бир ӱӱнмӓктир, зерӓ сач верили карыйа ӧртӱ еринӓ.

¹⁶ Еер биркимсей истӓрсейди чекишмӓӓ, билсин, ани не биздӓ, не дӓ Аллахын клиселериндӓ йок бӧлӓ алышмак.

Комка

¹⁷ Буннары сӧлейерӓк, мететмеерим сизи, зерӓ топланмакларыныз диил ии, ама зарар гетирер.

¹⁸ Илк, не ишидерим, ани клисӓ топланмакларында уйушмазлык олэр аранызда. Буну бираз инанэрым.

¹⁹ Зерӓ лӓӓзым олсун бӧлӱмнӓр сизин аранызда, ки ӱзӓ чыксын, ким араныздан беенилмиш.

²⁰ Ачан топланэрсыныз бирери, бу диил, ки ийӓсиниз Саабинин софрасындан.

²¹ Зерӓ херкези чалышэр ӧбӱрлериндӓн илери исин кенди имеесини. Ӧлӓ ки, бириси калэр аач, ама ӧбӱрӱ сарфош олэр.

²² Не, йок му ниӂӓ евдӓ ийӓсиниз хем ичӓсиниз? Нечин ашааландырэрсыныз Аллахын клисесини да утандырэрсыныз оннары, кимдӓ йок бишей? Не дейим сизӓ? Метедейим ми сизи? Бу ӱзерӓ йок нейлӓн метедейим!

²³ Не сизи ӱӱреттим, ону Саабидӓн каблеттим, ани Сааби Иисус о геӂӓ, ачан сатылмыш олду, алды бир екмек,

²⁴ шӱкӱр едип Аллаха, кырды ону да деди: «/Алын, ийин,/ бу – Беним гӱӱдӓм, ани /фаланэр/ сизин ичин. Буну йапасыныз Беним анылмам ичин».

²⁵ Хеп ӧлӓ, имектӓн сора, алды чӧлмӓӓ да деди: «Бу чӧлмек – ени бааланты, ани куведӓ гирер Беним канымнан. Буну херзаман йапасыныз, кач керӓ ичеӂениз, Беним анылмам ичин».

²⁶ Зерӓ кач керӓ ийеӂениз бу екмектӓн хем ичеӂениз бу чӧлмектӓн, Саабинин ӧлӱмӱнӱ анасыныз, О гелинӂӓ.

²⁷ Онуштан, ким йакышыксыз ийер бу екмектӓн хем ичер Саабинин чӧлмеендӓн, Саабинин гӱӱдесинӓ хем канына каршы кабаатлы калэр.

²⁸ Херкези аараштырсын кенди-кендини да ӧлӓ исин бу екмектӓн хем ичсин бу чӧлмектӓн.

²⁹ Зерӓ ким ийер хем ичер, танымайарак, ани бу Саабинин гӱӱдесидир, бу имӓклӓн хем ичмӓклӓн башына ӂеза гетирер.

³⁰ Онуштан сизин аранызда вар чок йуфка хем хаста, кимиси дӓ гечинди.

³¹ Еер кенди-кендимизи аараштырарсайдык, Аллах бизи ӂезаламаз.

³² Сааби бизи, даава едип, ӂезайлан ӱӱредер, ки сонда дӱннейлӓн билӓ кабаатлы олмайалым.

³³ Онуштан, кардашлар, ачан софрайа топланэрсыныз, бири-биринизи беклейин.

³⁴ Еер биркимсей аачсайды, евдӓ исин, ки ачан топланэрсыныз, Аллахтан даавалы олмайасыныз. Калан ишлери сырайа койаӂам, ачан гелеӂӓм.