1 Korіnflіlerä 10 - Ени Бааланты

Израил бизӓ ӧрнек

¹ Кардашлар, истӓмеерим, хаберсиз каласыныз, ани хепси бобаларымыз булут алтында булундулар, да хепси дениз ичиндӓн гечтилӓр.

² Хепси булутта хем дениздӓ ваатиз олдулар, ки баалашсыннар Моисейлӓн.

³ Хепси иди бир имектӓн, верили Айоз Духтан.

⁴ Хепси ичти бир судан, верили Айоз Духтан, зерӓ ичтилӓр бир духча Канарадан, ани ардларындан гелӓрди, о Канара – Христос.

⁵ Хеп окадар таа чойуну оннардан Аллах беенмеди, чӱнкӱ чолда кайбелдилӓр.

⁶ Оннарлан буннар хепси олду, ки бизӓ ӧрнек олсуннар, ки истӓмейелим кӧтӱлӱк йапмаа, оннар гиби.

⁷ Баш иилтмейин идоллара, оннардан кими гиби, ниӂӓ йазылы: «Инсан отурду имӓӓ хем ичмӓӓ, сора, калкып, ойнайып, сефаланмаа башлады».

⁸ Ороспулаа дӱшмейелим, ниӂӓ оннардан кими дӱштӱ, да бир гӱндӓ ирми ӱч бини ерӓ серилди.

⁹ Денӓмейелим Саабийи, ниӂӓ оннардан кимиси денеди да йыланнардан ӧлдӱрӱлдӱлӓр.

¹⁰ Мырылдамайын, ниӂӓ оннардан кими мырылдады да телеф олдулар ӧлӱм ангилиндӓн.

¹¹ Буннар оннарлан олду, ки бизӓ ӧрнек олсун, бизим ичин йазылды, ки акыл ӱӱренелим биз, ким етишти битки вакытлара.

¹² Бутакым, ким санэр, ани айакча дурэр, баксын дӱшмесин.

¹³ Сизӓ гелди денемеклӓр, хеп ӧлӓ, ниӂӓ херкезинӓ гелер. Аллах инанч да колвермӓз, ки кувединиздӓн зеедӓ дененмиш оласыныз. О денемӓк вакыды хазырлайаӂэк сизӓ бир чыкыш йолу, ки дайанабилӓсиниз.

Идоллар хем комка

¹⁴ Онуштан, севгили кардашларым, сакынын идоллара баш иилтмектӓн.

¹⁵ Лафедерим, ниӂӓ акыллы инсаннара, сиз кендиниз дӱшӱнӱн, не сӧлеерим.

¹⁶ Иисӧзленмиш чӧлмек, ангысыны иисӧзлеериз, диил ми пайдашлык Христозун канындан? Екмек, ангысыны кырэрыз, диил ми пайдашлык Христозун гӱӱдесиндӓн?

¹⁷ Чӱнкӱ бир екмек, биз дӓ чоклук бир гӱӱдейиз, зерӓ хепсимиз пайдашыз бир екмектӓн.

¹⁸ Бакын оннара, ким тенӂесинӓ Израил сенселесиндӓн. Оннар, ким курбаннардан пай алэр, пайдаш олмээр мы курбанныктан да?

¹⁹ Не истеерим сӧлемӓӓ? Курбанын, идола баашланмыш, сайгылыы вар мы? Йада идолун вар мы сайгылыы?

²⁰ Олмаз! Буну деерим: чӱнкӱ тайфӓннар курбаннарыны баашлээр фена духлара, ама диил Аллаха. Бӓн истӓмеерим, ки сиз пайдаш оласыныз фена духларлан.

²¹ Йок насыл ичӓсиниз хем Саабинин чӧлмеендӓн, хем фена духларын чӧлмеендӓн. Йок насыл пайдаш оласыныз хем Саабинин софрасындан, хем дӓ фена духларын софрасындан.

²² Нечин истеериз Саабийи гӱӂендирмӓӓ? Не, биз Саабидӓн таа каавийиз ми?

Хепсини йапын Аллахын метиннии ичин

²³ «Хепсини дӱшер йапайым», – деерсиниз, ама хепси файдалы олмаз. «Хепсини дӱшер йапайым», – деерсиниз, ама хепси духча каавилемӓз.

²⁴ Кимсей бакмасын саде кенди файдасыны, ама херкези баксын башкасынын да файдасыны.

²⁵ Ийин хербир йааныдан, ани панайырда сатылэр, хич соруштурмайарак, ки ӱзӱнӱз пак олсун.

²⁶ Зерӓ «бӱтӱн ер хем не ер ӱстӱндӓ – хепси Саабининдир».

²⁷ Еер инансызлардан бири сизи софрайа теклиф едӓрсейди, да сиз гитмӓӓ кайыл олурсайдыныз, ийин, не ӧнӱнӱзӓ койаӂэклар, хич соруштурмайарак, ки ӱзӱнӱз пак олсун.

²⁸ Ама еер биркимсей дейӓрсейди: «Бу йааны идола баашланмыш», озаман имейин сӧлейенин хатыры ичин, ки ӱзӱнӱз пак олсун. /Зерӓ ер хем не вар ер ӱстӱндӓ – хепси Саабининдир./

²⁹ Лафедерим, диил ани сизин ӱзӱнӱз пак олсун, ама онун ӱзӱ пак олсун. Зерӓ нечин беним сербестлиим сыкылансын башкасынын ӱзӱ ичин?

³⁰ Еер бӓн, шӱкӱр едип, ийӓрсейдим, недӓн бени мааналасыннар имӓк ичин, ангысы ичин шӱкӱр едерим?

³¹ Ӧлӓ ки, хепси, не ийерсиниз хем ичерсиниз, хем хепси, не йапэрсыныз, хепсини йапын Аллахын метиннии ичин.

³² Олмайын кӧстек не иудейлерӓ, не урумнара, не дӓ Аллахын клисесинӓ.

³³ Бӓн бакэрым хер тарафтан беендирейим кендими херкезинӓ, зерӓ бакмээрым кенди файдамы, ама чоклуун файдасыны, ки оннар куртулсуннар.