1 İoanın 1 - Ени Бааланты

Иисус Христос – йашамак верӓн Сӧз

¹ Не варды баштан, не биз ишиттик, не кенди гӧзлеримизлӓн гӧрдӱк, не сииреттик хем не кенди еллеримизлӓн йокладык – йашамак верӓн Сӧзӱ сизӓ хаберлеериз.

² Зерӓ Йашамак бизӓ ачылды, да биз Ону гӧрдӱк, Онун ичин шаатлык едериз. Сизӓ хаберлеериз дивеч Йашамайы, ани Бобадайды, да бизӓ гӧстерилди.

³ Не биз гӧрдӱк хем не ишиттик, ону сизӓ хаберлеериз, ки бизимнӓн сизин дӓ пайдашлыыныз олсун, ниӂӓ бизим вар пайдашлыымыз Бобайлан хем Онун Оолуннан, Иисус Христозлан.

⁴ Сизӓ буннары йазэрыз, ки бизим севинмемиз долулуктан олсун.

Айдынныкта олун

⁵ Хабер, ани Ондан ишиттик да сизӓ хаберлеериз, будур: Аллах – айдыннык, Онда йок караннык.

⁶ Еер биз дейӓрсейдик, ани вар пайдашлыымыз Онуннан, ама каранныкта йашарсайдык, биз йалан сӧлеериз да аслылаа гӧрӓ йашамээрыз.

⁷ Еер айдынныкта йашарсайдык, ниӂӓ О Кендиси айдынныкта, озаман бири-биримизлӓн пайдашлыымыз вар, да Онун Оолунун, Иисус Христозун, каны паклээр бизи хербир гӱнахтан.

⁸ Еер дейӓрсейдик: йок гӱнахымыз, озаман кенди-кендимизи алдадэрыз, да биздӓ йок аслылык.

⁹ Еер гӱнахларымызы шаатлык едӓрсейдик, О, инанч хем доору, гӱнахларымызы афедир хем бизи хербир кӧтӱлӱктӓн паклар.

¹⁰ Еер дейӓрсейдик: йок гӱнахымыз, озаман Ону йаланӂы йапэрыз, да Онун сӧзӱ йок биздӓ.