Wasɨn̰a 7 - Gabri Maja

Kondɨwa da kalaŋ ga da Kumu

¹ Kardi hɨnga nɔm ga nee le na, ɨŋ sol ka-ƴɔbɛ ga daa won̰ poɗɨn̰ ɨrege daa a tɨbɨn̰ cay gɨsəŋ ga poɗɨn̰ gaŋ. Kan ƴomge kal ga poɗɨn̰ ga a cay gɨsəŋ gaŋ kɨɗɨn̰ pɨnaa ɗe na duroŋ cay gɨsəŋ gaŋ naŋ bɨ, cay kuray gɨ gumu taa taa gɨŋ naŋ bɨ, a cay sɨya pɨna wo̰ naŋ bɨ.

² Ɨni na, ɨŋ sol ba-ƴɔbɛ gɨ daa nii gɨ ɗaŋ gɨ pɨna wo̰ gɨ sayga jɨn̰ te kumu gɨŋ. Ban ƴom tambo da Kumu gɨ som-bɨra a kobi. Ban wɨlal yen̰ ka-ƴɔbɛ ga daa nii ga poɗɨn̰ ga bɨgege dɔnɔ ɗe na mondɨn̰ge cay gɨsəŋ bɨ, kuray gɨ gumu taa taa bɨ ye hɨn̰:

³ «Kɨŋ ɗɔɔ ba mɔndɛ cay gɨsəŋ bɨ, kuray gɨ gumu taa taa bɨ, hayaŋ bɨ bɨrɨŋ gɨsɨn̰ gɨ ni na cɨbɨn̰ tambo a jin̰ marɨne ka-lɔɔ gɨye gɨ da Kumu konagɨŋ dɨm.»

⁴ Ɨni na, yəŋge bɔyɛ gɨ da te kalaŋ ga cɨbɨgege tambo jin̰dɨge le: Kan na kalaŋ dubu aru dan̰ tɔɔ poɗɨn̰ cay poɗɨn̰ ga lobɨgege a te wɨn̰je nɔm gɨ da karɨn̰ Ɨsɨrayɛl.

⁵ Kalaŋ ga a te wɨn̰je gɨ da Juda gɨŋ ga cɨbɨge tambo jin̰dɨge le na dubu-mɔjɨ-cay-sɔɔ bɨ, a te wɨn̰je gɨ da Rubḛ gɨŋ na dubu-mɔjɨ-cay-sɔɔ bɨ, a te wɨn̰je gɨ da Gad gɨŋ na dubu-mɔjɨ-cay-sɔɔ bɨ,

⁶ a te wɨn̰je gɨ da Ajɛr gɨŋ na dubu-mɔjɨ-cay-sɔɔ bɨ, a te wɨn̰je gɨ da Nɛptali gɨŋ na dubu-mɔjɨ-cay-sɔɔ bɨ, a te wɨn̰je gɨ da Manase gɨŋ na dubu-mɔjɨ-cay-sɔɔ bɨ,

⁷ a te wɨn̰je gɨ da Simin̰o gɨŋ na dubu-mɔjɨ-cay-sɔɔ bɨ, a te wɨn̰je gɨ da Lebi gɨŋ na dubu-mɔjɨ-cay-sɔɔ bɨ, a te wɨn̰je gɨ da Isakar gɨŋ na dubu-mɔjɨ-cay-sɔɔ,

⁸ a te wɨn̰je gɨ da Jabulo̰ gɨŋ na dubu-mɔjɨ-cay-sɔɔ bɨ, a te wɨn̰je gɨ da Jɨsɛb dɨŋ na dubu-mɔjɨ-cay-sɔɔ bɨ, a te wɨn̰je gɨ da Bɛ̰jamɛ̰ gɨŋ na dubu-mɔjɨ-cay-sɔɔ bɨ.

⁹ Kardi hɨnga nɔm ga nee le, ɨŋ sol dɨmdɨrdi kalaŋ dan̰ kondige ga ungo ɓala ɗɔngɨsɛ naŋ. Kan na kalaŋ ga a te kalaŋ ga ani ani bɨ, te wɨn̰je gɨ ani ani bɨ, te labar gɨ ani ani bɨ, te kɨbɨ wɔɔ gɨ ani ani bɨ. Kan ɨrege dan̰ tɨbayge daa tumoy kali-tɨrɨmbala bɨ, tumoy Kurɨn̰-dɨmangɨ bɨ. Kan tobɨge badɨge ga sɨngɨɗɨdəŋ ga bɛrɛ gusɨge bɨ ƴomge kabɨn̰ mɨlɨn̰ kobɨge bɨ.

¹⁰ Kan nɔm wɨlalge dan̰ tumoyge di daa yen̰ge hɨn̰: «Pɔɗɛ sayga na gusi Kumu konagɨŋ, Gɨ som a cay kali-tɨrɨmbala dɨŋ bɨ, Gusi Kurɨn̰-dɨmangɨ bɨ.»

¹¹ Ɨni na, ka-ƴɔbɛ ga daa nii nɔm ga ɨrege daa nɨwrɨn̰ge cay kali-tɨrɨmbala bɨ, cay ka-muɗɔlɛ bɨ, cay kandi-se ga a gɨɗɨgɨ-Kumu gaŋ ga poɗɨn̰ bɨ le, laydaŋge hɨmdɨn̰ge cɨndɨge dugo tumoy kali-tɨrɨmbala bɨ n̰ɨrɨn̰ge Kumu,

¹² yen̰ge hɨn̰: «Ɗa-ɗe-woy-hɨn̰-wo̰! Ho’o, hɨrame bɨ, gusoŋ-tɔgɛ bɨ, Cɨn̰-muɗɔlɛ bɨ, lɔɔ ho’o bɨ, Hurɔmɔ bɨ, dɔnɔ bɨ, tɔgɨ bɨ Na ga da Kumu konagɨŋ ɨlge dan̰ ɨlge! Ɗa-ɗe-woy-hɨn̰-wo̰!»

¹³ Kardi nee ɨni na, ba-muɗɔlɛ gɨ pɨna duroy kamdi ay kɔl ɨngɨrəŋ ye hɨn̰: «Kɛ kalaŋ ga tobɨge badɨge ga sɨŋɗɨdəŋ ga bɛdɨrdɛŋ tɨrɨjɨ tɨrɨjɨ gusɨge le na ga ani ga? Bɨ kan saygage na ani ɨrgage ga?»

¹⁴ Ɨni na, ɨŋ dɨbi cay nee yey hɨn̰: «Ba-gulonɨ, ji ba sɔlɛ.» Kɨɗɨn̰di ga nee gaŋ le, ban yəŋ hɨn̰: «Na kalaŋ ga andaŋge a duroy hɨnga ga ni dɔsɛ-ɗugɔ ga gumu gaŋ. Kan pɨlge badɨge kage ga sɨngɨɗɨdəŋ bɨ dorge ɗege bɛrɛ tɨrɨjɨ tɨrɨjɨ a duroy kɨbardi Kurɨn̰-dɨmangɨ gɨŋ le.

¹⁵ Na toy di hɨn̰ wo̰ ma, kan ɨrege a tumoyi kali-tɨrɨmbala da Kumu dɨŋ leen̰ge gɨye bii, duroy son̰do dan̰ tɨwa di ɨni bɨ, duroy ƴaa toyi dɨŋ bɨ. Ban gɨ som a cay kali-tɨrɨmbala toyi dɨŋ le kɨya ƴomge te dabaŋ koyi gɨŋ.

¹⁶ Kuroŋ kɨya looge naŋ bɨrɨŋ bɨ, gɨmase kɨya doge naŋ bɨrɨŋ bɨ, tɨwa kɨya jɨbɨge naŋ bɨrɨŋ bɨ, ɨlwa kɨya looge naŋ bɨrɨŋ bɨ.

¹⁷ Kɨya wa kurɨn̰-dɨmangɨ gɨ ɨre a duroy kali-tɨrɨmbala dɨŋ bɔb le, kɨya sɔlɛ kardɨge hɨn̰ ba-ame gamge gɨ sol kardi gamge wo̰ bɨ. Ban kɨya dɔrɛ tumoyge orɨn̰ danage a kɨɗɨn̰ ga kan kɨya ɓale sɨn̰ kaŋ ga bee sɔmɛ-bɨra gɨ leen̰ cɨndi. Ɗaŋ coŋ Kumu kɨya hande kaŋdi cɨndɨge a cɨndɨge pɨrɛd pɨrɛd coŋ bɨ.»