Wasɨn̰a 1 - Gabri Maja

Kɔl gɨ cay wase

¹ Magtubu di kɛ le, na hɨnga ga woy kɨɗɨn̰ wɔsɛdɨge gaŋ ga Jesu-Kɨris wasɨn̰ cayge. Na Kumu ba bii ɗe na gɨlɨn̰ marɨne ka-gɨye kayi, ɗe na solɨn̰ge hɨnga ga ba kɨya ɨrga mɨnde. Na toy di hɨn̰ wo̰ ma, Jesu gɨy ba-ƴɔbɛ koyi gɨ daa nii ɗe na or wasɨn̰e cayge bɨn̰ marɨna ba-gɨye koyi Ja̰ ɗe na sol.

² Ja̰ lee tɨmon̰ di da hɨnga nɔm ga ban sol dan̰ cɨndi le naa Kɔl gɨ da Kumu bɨ, na tɨmon̰ di Jesu-Kɨris lee bɨ.

³ Kɔl gɨ walge duroy magtubu di kɛ dɨŋ le, sayga na gusi Kumu. Tumoy wolwa woy a cay ungo gɨ ba ɗɔngɨsɛ bɨ, Tumoy wolwa woy a cay kalaŋ ga ka-yɔɔ-kɔl-gɨ-Kumu-ba-yɔɔ bɨ, a cay ka-game kɔl nɔm gɨ woy a duroy nee bɨ. Na cɨndi tɨwadi baa mɨnde.

Ja̰ leen̰ Ka-Daye ga kɨɗɨn̰ jurgum lapɨya

⁴ Sɨlagɨŋ ɨŋ-bandi Ja̰, ɨŋ wal magtubu gɨyɨn̰ dan̰ kɔl gɨ kɛ le bɨn̰ na Ka-Daye ga kɨɗɨn̰ jurgum ga somge a cay gɨsəŋ ga Aji gaŋ. Kuɗa gɨ Kumu bɨgɨŋ ɗarwa bɨ, gusi-dɔbɛ bɨ. Ban som nee a boy wɔlɛ gɨ haw kɛ gɨŋ bɨ, a boy wɔlɛ gɨ tumɔ gɨŋ bɨ, a boy wɔlɛ gɨ kɨya ɨrga gɨŋ bɨ. Kuɗa gɨ Turnɔ di da Kumu ga jurgum ga somge a tumoy kali-tɨrɨmbala da Kumu dɨŋ le, bɨgɨŋge ɗarwa bɨ, gusi-dɔbɛ bɨ.

⁵ Kuɗa gɨ Jesu-Kɨris ba lɔɔ tɨmon̰ gɨ ɨre a cay tɨbayi dɨŋ le, bɨgɨŋ ɗarwa bɨ, gusi-dɔbɛ bɨ. Jesu-Kɨris le, na ban pɨna hayi ma na ungo gɨ cay wase cɨg cɨg gɨ boy lɨbɨ duroy kalaŋ ga madɨrdaŋ gaŋ. Ban na kɨlma gɨ ba-dɔɔ cay kɛrɨmbɛlɛŋ ga a cay gɨsəŋ gaŋ kɛ. Ban geynagɨŋ bɨ, dornagɨŋ a kobɨ guyɔŋdu di da ɨsɨna konagɨŋ gɨŋ bɨ, dan̰ gɨyəŋ gɨ ni kɨbardi bɨ.

⁶ Ban bɨlnagɨŋ leen̰ dɔɔ-ƴaa toyi bɨ, bɨlnagɨŋ leen̰ ka-bɔgɛ kɨbar kɨya loon̰ gɨye gɨ da Bayi Kumu bɨ. Kuɗa gɨ gusoŋ-tɔgɛ dan̰ dɔnɔ wɨya kol cayi ɨlge dan̰ ɨlge. Ɗa-ɗe-woy-hɨn̰-wo̰.

⁷ Sɨlagɨŋ, ban tɨlga duroy gɨrɨmbale gaŋ nee, Kalaŋ nɔm kɨya soliige dan̰ cɨndɨge, Kan ga ka-jɨbege gasɨbii le kalɨn̰ ma, Kɨya soliige dan̰ cɨndɨge bɨ. Te wɨn̰je nɔm ga a cay gɨsəŋ gaŋ, Kɨya ɨlege gusɨge togɨn̰ kuduroyge kol cayi. Ho’o! Ɗa-ɗe-woy-hɨn̰-wo̰.

⁸ Ba-gulɔŋ Kumu ye daa waŋ hɨn̰: «Ɨŋ na Alpa bɨ Omega bɨ, ɨŋ som nee a boy wɔlɛ gɨ haw kɛ gɨŋ bɨ, a boy wɔlɛ gɨ tumɔ gɨŋ bɨ, a boy wɔlɛ gɨ ba kɨya ɨrga gɨŋ bɨ. Ɨŋ na Kumu gɨ dɔnɔnɨ ɗɨn̰ dɔnɔ nɔm.»

Kɨris buyoŋ cɨn̰ Ja̰ hɨn̰ dḛḛ wo̰

⁹ Ɨŋ-bandi Ja̰ kurɨndɨgɨŋ, ɨŋ bugoŋ danagɨŋ pɨna boy hɨnga ga ni gɨwase gaŋ bɨ, boy dɔɔ-ƴaa di da Kumu dɨŋ bɨ, boy haye-kudurɔ kardi Jesu hɨn̰ kɨŋ-gandi wo̰ bɨ. Ƴɔmɔŋge na kɨya bɛrnɛ di kɔl gɨ da Kumu gɨ ɨŋ tee bɨn̰ kalaŋ bɨ, kɨya cay tɨmon̰ di ɨŋ lee kɨya cay Jesu bɨ. Haw kɛ na dɨbəŋge dangay cay hɔgɨwa gɨ teeyige Patmos gɨ woy a duroy kaŋ gaŋ.

¹⁰ Turnɔ di da Kumu naa gɨsɨngɨ canɨ a boy wɔlɛ gɨ da Ba-gulɔŋ gɨŋ, ƴɔmɔŋ lee gɨ ɨŋ je noy ungo gɨ ye dan̰ dɔnɔ hɨn̰ burun̰ji wo̰ a karɨnɨ.

¹¹ Noy ungo le ye hɨn̰: «Hɨnga ga ji ba naa sɨlga dan̰ cɨndɨn̰ le, wala dugo duroy magtubu dɨŋ gɨyɨn̰ bɨn̰ Ka-Daye ga kɨɗɨn̰ jurgum ga a cay gɨsəŋ ga Aji gaŋ: A Epɛs bɨ, Simirnɨ bɨ, Pɛrgam bɨ, Tɨyatir bɨ, Sardɨ bɨ, Piladelpi bɨ, Lawdise bɨ.»

¹² Ɨŋ bɨle karɨnɨ aŋ na solɨn̰ ungo gɨ naa ba-yɔɔ kɔl danaŋ le. Kɨɗɨn̰ ga ɨŋ bɨle karɨnɨ ɨni na, ɨŋ sol lamban̰əŋ jurgum ga leege dan̰ lɔr.

¹³ A duroy lamban̰əŋ ga jurgum ga nee le, ɨŋ sol ungo gɨlɨn̰ hɨn̰ kurɨn̰ ungo gɨ pɨna wo̰ gɨ dobɨ badɨge ga sɨngɨɗɨ gusi bɨ, saɗɨ gasɨbii dan̰ sɔndurɔŋ ga leege dan̰ lɔr bɨ.

¹⁴ Cayi dan̰ teɗi cayi bɛdɨrdɛŋ tɨrɨjɨ tɨrɨjɨ hɨn̰ kow wo̰ bɨ, hɨn̰ gɨna gɨ da kaŋdi Kumu wo̰ bɨ. Tɨdi ƴeede tɨwa jɨrɨn̰ jɨrɨn̰ hɨn̰ kɨləŋ tɨwa wo̰.

¹⁵ Tɨbayi jɨran̰de wɨj wɨj hɨn̰ nare gɨ yɨle gɨ lee marɨna wo̰ bɨ, gɨ arɨn̰ cərərə wo̰ bɨ. Te tumoyi ye ƴee kɨɗɨn̰ hɨn̰ noy kaŋdi kuray gɨ gumu taa taa wo̰ bɨ.

¹⁶ Ungo gɨ nee le ƴom dɛsɨɗɛŋ won̰ jurgum a kobi gɨ bara gɨŋ bɨ, pəlɨm di haɗɨge gasɨndo sɔɗɨmɔŋ andaŋ kɨbi bɨ. Cɨndi jɨran̰de hɨn̰ tɨwa di jɨbɨ dan̰ tɔgɔ nɔm wo̰.

¹⁷ Kɨɗɨn̰ ga ɨŋ sɨlga ungo gɨ nee le ɨni na, ɨŋ ba dugo tɨbayi hɨn̰ ungo gɨ ma wo̰. Ban dɨbɨ kobi gɨ bara a canɨ bɨ ye hɨn̰: «Hundɔrɔ naŋ. Ɨŋ na gɨ cay wase bɨ gɨ karu gɛs bɨ.

¹⁸ Ɨŋ-bandi le, ɨŋ na ba-sɔmɛ-bɨra. Tumɔ ɨŋ ma, ama haw kɛ na ɨŋ som-bɨra, ɨŋ kɨya mare naŋ bɨrɨŋ ɨni. Ɨŋ orɨn̰ dan̰ dɔnɔ a cay tɨma dɨŋ bɨ, a cay dɔɔ-ƴaado dɨŋ bɨ.

¹⁹ Hɨnga ga ji ba sol dan̰ cɨndɨn̰ ga ba kɨya lɔɔ gusɨge haw kɛ bɨ, ga ba kɨya lɔɔ gusɨge kardi nee bɨ le, walage dugo duroy magtubu dɨŋ.

²⁰ Hɨnga ga ba woy a kɨɗɨn̰ wɔsɛdɨge gaŋ ojɨn̰ cay dɛsɨɗɛŋ ga jurgum bɨ, lamban̰əŋ ga jurgum ga leegege dan̰ lɔr ga ji ba solge a kobi gɨ bara gɨŋ le, duroyge ba kɛ: Dɛsɨɗɛŋ ga jurgum le, na Ka-ƴɔbɛ ga daa nii ga da Ka-Daye ga kɨɗɨn̰ jurgum. Lamban̰əŋ ga jurgum le, na Ka-Daye ga kɨɗɨn̰ jurgum bɨ.»