Titɨ 1 - Gabri Maja

Lapɨya

¹ Ɨŋ-bandi Pol, ɨŋ na marɨna ba-gɨye gɨ da Kumu bɨ, ba-gɨre-gɨye gɨ da Jesu-Kɨris bɨ. Na nɨn̰wa gɨ sɨge canɨ gɨ ɨŋ na gɨlɨn̰ kalaŋ ga Kumu torge le kɔl, ɗe kan na ayɨn̰ kuduroyge bɨ gɨ ɨŋ na laa ɗe kan na sɨlan̰ kɔl gɨ cɨndi gɨ bugoŋ pɨna dan̰ gɨye-lɔɔ gɨ bugoŋ pɨna dan̰ Kumu bɨ,

² ɗe kan na been̰ ɨrɨmedɨge a cay sɔmɛ-bɨra gɨ dan̰ tumoyi. Kumu gɨ ya poy naŋ le, ye gɨ ɗi na kɨya bɨge sɔmɛ-bɨra gɨ dan̰ tumoyi gɨ nee le naa tumɔ ɓɨragɨ.

³ Kɨɗɨn̰ ga tɨwa di Kumu gɨsɨ ɓal ɨni na, Kumu ba-pɔɗɨna wasɨn̰ cay kɔl koyi. Kɔl gɨ nee le, ban bəŋ kɔbɔŋ bɨ, ay noy bəŋ gɨ ɨŋ na tɨga bɛrnɛdi bɨ.

⁴ Ɨŋ wal magtubu di kɛ le, gɨyɨn̰ bɨn̰ na ji-bandi Titɨ, kuronɨ gɨ cɨndi a te aye kudurɔ gɨ pɨna gɨ na dayaŋ cay nee. Kuɗa gɨ Bayna Kumu dan̰ Jesu-Kɨris ba-pɔɗɨna bɨn̰ge ɗarwa bɨ gusi-dɔbɛ bɨ.

Gɨye gɨ sige cay Titɨ a cay gɨsəŋ ga Kɨrɛtɨ gaŋ

⁵ Ɨŋ ɗen̰ a cay gɨsəŋ ga Kɨrɛtɨ gaŋ na ɗe gɨ an̰ na ɗen̰ hɨnga ga ba baa ƴee le dan̰ durɔ bɨ, ɗe an̰ na ɗen̰ ka-muɗɔlɛ a cay ƴaa ga gɨmdəŋ gaŋ pɨna pɨna hɨn̰ gɨ ɨŋ ba yen̰ le bɨ.

⁶ Ungo gɨ ji ba kɨya dorii le, kuɗa gɨ ban wɨya na ungo gɨ masadi unɔ bɨ, ungo gɨ tamdi na pɨnaa bɨ, gɨ karɨndi beege kuduroyge a cay Kumu bɨ, gɨ ungo dɨbɨ kɔl cayge ojɨn̰ cay gɨye-lɔɔdɨge gɨ ɨsɨni wala kol mɨn̰e daa toge naŋ bɨ.

⁷ Ba-dɔrɛ tumoy Ka-Daye gɨ na ungo gɨ beeyige gɨye gɨ ni solɨn̰ kardi hɨnga ga da Kumu kobi le, kuɗa gɨ ban wɨya na ungo gɨ ungo kɨya ɓale dɨbe kɔl cayi naŋ bɨ. Kuɗa gɨ ban wɔyɛ ba-dɔrɛ n̰ərə naŋ bɨ, ba kuduroy-hɔmɛ naŋ bɨ, ba-kɔydɛ cɛrɛ naŋ bɨ, ba wale man̰e naŋ bɨ, ungo gɨ ba male gursu dan̰ gɨyəŋ gɨ dan̰ durɔ naŋ, naŋ bɨ.

⁸ Ama kuɗa gɨ ban wɨya na ungo gɨ ba ƴɔmɛ kɨrge gusi bɨ, na ungo gɨ hɨnga ga ɗari moyi lɔɔ bɨ. Ban kɨya sɔlɛ na hɨnga ga ɗari dɨm ma kɨya lɔɔ bɨ, na ungo gɨ ba lɔɔ hɨnga ga dan̰ durɔ ɗɨngar bɨ, hɨnga ga woy dan̰ cɨndɨge bɨ, ungo gɨ ba ƴɔmɛ gusi osɨwa cay hɨnga gaŋ bɨ.

⁹ Ban na ba ƴɔmɛ kɔl gɨ ojɨ gɨ ni bɔgɛ kudurɔ cay nee osɨwa gɨ na kɔl gɨ or pɨna dan̰ hɨnga ga ni gɨle bɨ. Hɨn̰ wo̰ na ban kɨya ɓale bɔgɛ kɔl gɨ ɗari kuduroy kalaŋ dan̰ hɨnga ga ni gɨle ga cɨndi bɨ, ban kɨya ɓale gɨle a cɨn̰ tɨwa dɨŋ gɨ kɔl gɨ da ka-man̰e-kɔl gɨ da Kumu naa cɨndi naŋ bɨ.

¹⁰ Na cɨndi, ka-mɨn̰e daa bɨ, ka-dɔrɛ kɔl gɨ toyi dan̰ cayi unɔ bɨ, ka-nare cɨn̰ kalaŋ bɨ, kondɨge. Ama kondɨwayge na, na a duroy Jubɨn̰əŋ ga ayge kuduroyge.

¹¹ Kuɗa gɨ kɨŋ lɨgɨ kɨbɨge daa. Kɨya wa kan na ka-tɔbɛ kalaŋ ga a duroy wandɨ di pɨna dɨŋ nɔm duroy nee, dan̰ hɨnga gɨledɨge. Kan som gɨlɨn̰ kalaŋ hɨnga ga uja naŋ ɗe age na wan̰ gursu di kan ƴɨmage kɨjan̰e kɔldɔ naŋ.

¹² Na ungo gɨ a cay gɨsəŋ ga Kɨrɛtɨ gaŋ gusi, duroy ka-gɨlɨn̰ kalaŋ hɨnga kage ba yɔ hɨn̰: «Kalaŋ ga somge a cay gɨsəŋ ga Kɨrɛtɨ gaŋ le, bɨyage kɨbɨge te poy dɨŋ naŋ. Kan na ka-jɨba bɨ, ka-dabɨr bɨ, geyge na dɔɔ dɔɔ kalɨn̰ ƴɔbɨ.»

¹³ Na kɔl gɨ cɨndi ma mani ye. Na toy di hɨn̰ wo̰ ma sayan̰ danage ɗe aye kudurɔ koge woy dan̰ durɔ ɗɨngar,

¹⁴ kuɗa gɨ kan lun̰doŋge kardi lɛngɛ lɛngɛ di sayga a duroy Jubɨn̰əŋ gaŋ naŋ bɨ, kobɨn̰ hada di da kalaŋ ga bɨlge kardige bɨn̰ kɔl gɨ cɨndi naŋ, naŋ bɨ.

¹⁵ Kalaŋ ga duroŋge mɨra le, hɨnga nɔm na hɨnga ga duroŋ mɨra kol cayge bɨ. Ama kalaŋ ga leege kɨni le, na kalaŋ ga kan̰ge aye kuduroyge coŋ bɨ, hɨnga ga duroŋ mɨra kol cayge unɔ bɨ. Kɨya wa gɨrɨn̰ cayge bɨ, ɨrɨmedɨge bɨ, lee kɨni.

¹⁶ Kan yege gɨ ke na sol Kumu ama gɨye-lɔɔdɨge gɨl gɨ kan sɨlage Kumu naŋ leen̰ cɨndi. Kalaŋ ga gɨlɨn̰ge hɨn̰ wo̰ le, na kalaŋ ga ɨsɨnge tɔgɨ bɨ, na ka-mɨn̰e daa bɨ, ɓalage lɔɔ hɨnga ga ɗari pɨna wo̰ dɨbe daa naŋ bɨ.