Magtubu di Pol wal bɨn̰ kalaŋ ga Rɔm 15 - Gabri Maja

Laagɨŋ hɨnga ga kɨya ƴɔɔ cɨn̰ kamdɨnagɨŋ

¹ Na hɨn̰ wo̰ ma, na-gandi ga na osu a te aye kudurɔ gɨŋ le, ojɨ gɨ na dɨbɨ ɗugoyna cay karmɨna ga usa a te aye kudurɔ gɨŋ naŋ. Ɗanagɨŋ baa lɔɔ hɨnga ga kɨya ƴɔɔ cɨndɨna na-gandi.

² Kuɗa gɨ waŋ waŋ kalɨn̰ ma duroyna laa na hɨnga ga kɨya ƴɔɔ cɨn̰ mɨgayi, kol ɗarwa toyi bɨ, kol togii di kɨya sɔ cay mɨgaa dɨŋ bɨ.

³ Na cɨndi, Kɨris kalɨn̰ ma aya gɨyəŋ gɨ kɨya ƴɔɔ cɨndi kayi ban gaŋ naŋ, ama ban lee hɨn̰ gɨ ba walge a duroy Magtubu di da Kumu dɨŋ yege hɨn̰: «Ka-yagɨdɨn̰ le yagɨde koge baa a canɨ ɨŋ-bandi bɨ.»

⁴ Hɨnga nɔm ga walge a duroy Magtubu di da Kumu dɨŋ bon̰ ɨlgen̰əŋ ga jɨne gaŋ le, kan walge ɗe na gɨlna naa hɨnga. Magtubu di da Kumu gɨlna hɨnga nɔm ga nee le ɗe na laa danana ana na han̰-kuduroyna bɨ, wan̰ bandɨ bɨ, hɨn̰ wo̰ na hɨnga ga na ba bee ɨrɨmedɨna cay nee kɨya orɨn̰ danana tumɔ.

⁵ Kumu gɨ ba-bee haye-kudurɔ bɨ bandɨ bɨ, kuɗa gɨ ban bɨgɨŋ ɨrɨme gɨ ni somɨn̰ pɨna nɔm togɨŋ dɨŋ, agɨŋ kobɨn̰ gɨyəŋ gɨ da Jesu-Kɨris,

⁶ ɗe gɨ kɨŋ-gandi nɔm togɨŋ dɨŋ, kɨŋ na dɨbɨn̰ gusoŋ-tɔgɛ a cay Kumu, Ba-gulondɨna Jesu-Kɨris bayi le.

Kɔl-gɨ-Ɗari ojɨ na cay kalaŋ nɔm

⁷ Naa hɨn̰ wo̰ na, kuɗa gɨ waŋ waŋ kalɨn̰ ma ƴɨma kurɨndi a gusi, hɨn̰ gɨ Kɨris ba ƴomnagɨŋ a gusi wo̰ bɨ, ɗe Kumu wan̰ gusoŋ-tɔgɛ.

⁸ Aŋ yəgɨŋ, Kɨris bɨle marɨna ba-gɨye gɨ da Jubɨn̰əŋ na kɨya gɨlɨn̰ gɨ Kumu naa ungo gɨ ɨre a cay tɨbayi dɨŋ bɨ, dɨɗɨn̰ kɨbɨ hɨnga ga Kumu ye gɨ ɗi na kɨya bɨn̰ mon̰iige bɨ.

⁹ Ban ɨrga na ɗe gɨ kalaŋ ga toyge na Jubɨ naŋ kalɨn̰ ma na dɨbɨn̰ge gusoŋ-tɔgɛ a cay Kumu kɨya cayi sɔlɛ cɨn̰-n̰age toyi bɨ, hɨn̰ gɨ ba walge a duroy Magtubu di da Kumu dɨŋ ye hɨn̰: «Ay Kumu, na toy di hɨn̰ wo̰ ma, Ɨŋ mɨlawɨn̰ a duroy te labar gɨ da kalaŋ ga ɗaŋ bɨ, Ɨŋ kɨbɨ kɨra hɨramɨn̰ gusondɨn̰ bɨ.»

¹⁰ Magtubu di nee le jɨga ye ɗaŋ coŋ ye hɨn̰: «Ay kɨŋ-gandi te kalaŋ ga toyge na Jubɨ naŋ, Laagɨŋ gusi-mɔwa dan̰ te kalaŋ ga da Kumu.»

¹¹ Ɗaŋ coŋ: «Kɨŋ te labar gɨ da kalaŋ ga toyge na Jubɨ naŋ, Ga cay gɨsəŋ gaŋ nɔm, Dɨbgɨŋ gusoŋ-tɔgɛ a cay Ba-gulɔŋ! Kɨŋ te kalaŋ nɔm, Hɨramagɨŋ Kumu.»

¹² Ba-yɔɔ-kɔl-gɨ-Kumu-ba-yɔɔ Ijay ye ɗaŋ coŋ hɨn̰: «Kungay Jese pɨna kɨya andɨgaŋ, Na ban ba kɨya sɔ gɨ ni dɔɔ cayi te wɔɔ, Gɨ da kalaŋ pɨna pɨna le. Te wɔɔ gɨ da kalaŋ kɨya bɔgɛge ɨrɨmedɨge a cayi.»

¹³ Kuɗa gɨ Kumu gɨ ba bɨgɨŋ hɨnga ga kɨŋ kɨya bogɨn̰ ɨrɨmedɨgɨŋ cay nee bɨgɨŋ gusi-mɔwa bɨ, bɨgɨŋ gusi-dɔbɛ a te gɨyəŋ gɨ da aye kudurɔ gɨŋ, ɗe ɨrɨmedɨgɨŋ gɨ kɨŋ ba bee a cayi le, san̰ cay mɨgayi gɨŋ dan̰ gɨyəŋ gɨ da dɔnɔ di da Turnɔ ɗe-kuduroy-bɛrɛ.

Gɨye gɨ da Pol

¹⁴ Ay karmɨnɨ ga ban̰aŋ dan̰ ga kandɨ, gɨ ojɨ caygɨŋ kɨŋ-gandi na, ɨŋ-bandi dan̰ gusɨnɨ hɨnge ɨŋ sol kuɗa gɨ ɗarwa bɨ sɔlɛ-hɨnga bɨ walɨn̰ kuduroygɨŋ jɨŋ jɨŋ daa bɨ, kɨŋ ɓal hale gusɨgɨŋ duroygɨŋ bɨ.

¹⁵ Ama naa hɨn̰ wo̰ kalɨn̰ ma, a duroy magtubu tɨnge di ɨŋ ba wal gɨyɨn̰ bɨgɨŋ le, ɨŋ yəgɨŋ hɨnga ga pɨna hangɨn̰ kuduronɨ bɨgɨŋ, ama na ɗe gɨ aŋ na hɨnɨn̰ kuduroygɨŋ a cay hɨnga ga kɨŋ sol ɨni. Ɨŋ ye kol hɨnga ga nee le hɨn̰ wo̰ na dan̰ gɨyəŋ gɨ da ɗarwa di Kumu lee danaŋ.

¹⁶ Kumu bɨləŋ marɨna ba-gɨye gɨ da Jesu-Kɨris a gusi kalaŋ ga toyge na Jubɨ naŋ. Ɨŋ ay gusɨnɨ dɨbɨ coŋ kɨbɨ gɨye gɨ ni tɔgɛ bɛrnɛ Kɔl-gɨ-Ɗari gɨ da Kumu gɨŋ, ɗe te kalaŋ ga toyge na Jubɨ naŋ na bɨlɨn̰ge wɨyan̰ge hɨn̰ hɨnga ga ni bogɨn̰ kɨbar ga woy dan̰ cɨndɨge dan̰ gɨyəŋ gɨ da Turnɔ ɗe-kuduroy-bɛrɛ bɨ, na ƴan̰ cɨn̰ Kumu bɨ.

¹⁷ Lee gɨ ɨŋ ɓal lɔɔ gusi-mɔwa a cay gɨye nɔm ga ɨŋ lee bɨn̰ Kumu, dan̰ gɨyəŋ gɨ da te bugoŋ pɨna dan̰ Jesu-Kɨris.

¹⁸ Na cɨndi, hɨn̰ gɨ ɨŋ na mala yɔɔ kɔl a cay hɨnga na, na a cay hɨnga ga Kɨris lee kol canɨ ƴɔbɨ, ma maŋ kɨya yɔɔ kɔl cay nee. Dan̰ gɨyəŋ hɨnge na, ban lee gɨ kalaŋ ga toyge na Jubɨ naŋ jege kɔl kɨbɨ Kumu. Ban lee hɨnga ga nee le na dan̰ kɔl bɨ gɨye bɨ,

¹⁹ dan̰ gɨyəŋ gɨ da dɔnɔ di da hɨnga ga ɗɨn̰ cɨn̰-kɨɗɨn̰ bɨ, dɔnɔ di da belin̰əŋ bɨ, dɔnɔ di da Turnɔ ɗe-kuduroy-bɛrɛ bɨ. Na dan̰ gɨyəŋ gɨ nee le ma, maŋ teen̰ bɛrnɛ di da Kɔl-gɨ-Ɗari gɨ da Kɨris ƴen̰ cay kɨɗɨn̰ kɨɗɨn̰ an̰ toy a cay ƴaa-di-gumu di Jerusalɛm dɨŋ bɨrɨŋ andɨn̰ a cay gɨsəŋ ga Iliri gaŋ.

²⁰ Ama ɨŋ gey tɔgɛ bɛrnɛ di da Kɔl-gɨ-Ɗari tɔgɨ na a kɨɗɨn̰ ga ungo ja guson̰ Kɨris nee naŋ ƴee ƴɔbɨ, ɗe aŋ na gaɗɨn̰ ƴaa a cay te ƴaa gɨ da ungo gɨ ɗaŋ gɨŋ naŋ.

²¹ Kɨɗɨn̰ ga ɨŋ na laa hɨn̰ wo̰ na, ɨŋ kɨya lɔɔ na hɨn̰ gɨ naa Magtubu di da Kumu ba ye hɨn̰: «Kalaŋ ga ungo dɨbɨ bɛrnɛ di da kɔl koyi, Sɨmayige naŋ ƴee le kɨya soliige dan̰ cɨndɨge bɨ, Kalaŋ ga tumɔ kɔl koyi ba sɨmayige naŋ ƴee le, Kɨya sɔlɛge duroy kɔl koyi bɨ.»

Pol ojɨ ɔrɛ tɨrga a Rɔm

²² Na cɨndi ɨŋ mal tɨba kondɨ gɨ ni ɔrɛ solgɨŋ hange, ama gɨye hɨnge gɨ nee le naraŋ coŋ gɨsɨn̰ haw kɛ.

²³ Haw kɛ na, ɨŋ dɨɗɨ kɨbɨ gɨye hɨnge gɨ a cay gɨsəŋ ga kɛ gaŋ coŋ ɨni. Lee ɨlge kondɨ gɨ ɨŋ mal gɨ ni ɔrɛ solgɨŋ.

²⁴ Ɨŋ ɨrɨm gɨ ni caŋge caygɨŋ, kɨɗɨn̰ ga ɨŋ kɨya sɔ ɔrɛ a cay gɨsəŋ ga Ɛspan̰ gaŋ na, ɨŋ orɨn̰ dan̰ tabɨlaŋdi ɔrɛ gusɨgɨŋ sɔmɛ danagɨŋ lam ɗe gusɨnɨ mɔŋ. Kardi nee na, kɨŋ kɨya jɨbe tonɨ te ɔrɛ tɨrga tɨnge dɨŋ di a Ɛspan̰.

²⁵ Ama gɨ haw kɛ na, ɨŋ ɨre or na a cay ƴaa-di-gumu di Jerusalɛm dɨŋ kɨya jɨbɨn̰ te kan ga woyge dan̰ cɨndɨge.

²⁶ Kɨya wa ka-aye kudurɔ ga a cay gɨsəŋ ga Masedɨwan gaŋ dan̰ ga Agay ojɨge duroyge gɨ ni gɨyɨn̰ dan̰ hɨnga ga ni jɨbɨn̰ te ka-n̰age ga woyge duroy kan ga woyge dan̰ cɨndɨge ga a Jerusalɛm.

²⁷ Kan ojɨge hɨnga ga nee le, na dan̰ gusi-mɔwa. Woy gɨlɨn̰ na hɨn̰ tugɨla wo̰ a cayge, kɨya wa tumɔ na Jubɨn̰əŋ ba gɔsɨnɛge tɔrɛ-kɨbɨ koge gɨ kan way a gusi Kumu dan̰ kalaŋ ga toyge na Jubɨ naŋ. Haw kɛ na, ojɨ gɨ na kalaŋ ga toyge na Jubɨn̰əŋ naŋ na ba jɨbge te Jubɨn̰əŋ, dan̰ hɨnga ga ni tɔrɛ-kɨbɨ ga da cay gɨsəŋ ga kan wayge.

²⁸ Kɨɗɨn̰ ga gɨye gɨ nee le na kaga bɨ, ɨŋ na bɨge hɨnga nɔm ga kan hogɨge kol cayge bɨ na, ɨŋ kɨya caŋge caygɨŋ a Rɔm orɨn̰ a cay gɨsəŋ ga Ɛspan̰ gaŋ.

²⁹ Ɨŋ sol gɨ kɨɗɨn̰ ga ɨŋ na bugoŋ gusɨgɨŋ na, ɨŋ kɨya bugoŋ na dan̰ tɔrɛ-kɨbɨ gɨ da Kɨris gɨ ojɨ caygɨŋ gɨ walɨn̰ daa jɨŋ jɨŋ.

³⁰ Haw kɛ na, ay karmɨnɨ ga ban̰aŋ dan̰ ga kandɨ, ɨŋ olgɨŋ dan̰ gɨyəŋ gɨ da Ba-gulondɨna Jesu-Kɨris bɨ, dan̰ gɨyəŋ gɨ da geye gɨ Turnɔ di da Kumu bɨn̰ ungo bɨ le, hɨnga ga ba kɛ: Ɗagɨŋ gusɨgɨŋ kɨbɨ wɔrɨn̰ɛ gɨŋ danaŋ pɨna bɨ, ulan̰gɨŋ Kumu kol canɨ bɨ.

³¹ Ulagɨŋ Kumu ɗe aŋ andaŋ a kobɨ ka-bɔgɛ kuduroyge cay Kɨris naŋ ga somge a cay gɨsəŋ ga Jude gaŋ bɨ. Ulayigɨŋ ɗe hɨnga ga ni jɨbɨn̰ te kan ga woyge dan̰ cɨndɨge ga somge a Jerusalɛm ga ɨŋ ba orɨn̰ le kalɨn̰ ma, na ƴa cɨndɨge bɨ.

³² Hɨn̰ wo̰ na, hɨn̰ gɨ Kumu na uja na, ɨŋ kɨya bugoŋ gusɨgɨŋ dan̰ gusi-mɔwa bɨ, ƴomɨn̰ gusɨnɨ danagɨŋ dḛ bɨ.

³³ Kuɗa gɨ Kumu gɨ ba-bee gusi-dɔbɛ baa danagɨŋ nɔm. Ɗa-ɗe-woy-hɨn̰-wo̰!