Magtubu di Pol wal bɨn̰ kalaŋ ga Rɔm 1 - Gabri Maja

Pol leen̰ kalaŋ ga Rɔm lapɨya

¹ Na ɨŋ-bandi Pol ba gɨyɨn̰ dan̰ magtubu bɨgɨŋ. Ɨŋ na marɨna ba-gɨye gɨ da Jesu-Kɨris. Ban təŋ ɗe gɨ ɨŋ na bɨl ba-gɨre-gɨye koyi bɨ, dɔrɔŋ səŋ dan̰ cɨnɨ kɨya togɨn̰ bɛrnɛ Kɔl-gɨ-Ɗari gɨ da Kumu bɨ.

² Kɔl-gɨ-Ɗari gɨ nee le, naa Kumu ye koldi na jɨne hayi, dan̰ gɨyəŋ gɨ da ka-yɔɔ-kɔl-gɨ-Kumu-ba-yɔɔ gɨ walge a duroy Magtubu di da Kumu dɨŋ.

³ Kɔl-gɨ-Ɗari gɨ nee le kan walge ojɨn̰ na cay Ba-gulondɨna Jesu-Kɨris Kurɨn̰-Kumu. Kɨɗɨn̰ ga ban lee gusi leen̰ ungo gɨ ɨndi na, kan wooyge na a te wɨn̰je gɨ da kɨlma Dabid gɨŋ.

⁴ Kɨɗɨn̰ ga Kumu boyii lɨbii duroy kalaŋ ga madɨrdaŋ gaŋ na, Turnɔ ɗe-kuduroy-bɛrɛ gɨl gɨ ban naa Kurɨn̰-Kumu gɨ dɔnɔdi ɗɨn̰ dɔnɔ nɔm.

⁵ Na dan̰ gɨyəŋ gɨ da Jesu-Kɨris ma Kumu leen̰ ɗarwa danaŋ. Lee gɨ ɨŋ bɨle ba-gɨre-gɨye koyi ɗe gɨ te wɔɔ gɨ da kalaŋ nɔm ayge kuduroyge bɨn̰ Jesu bɨ, been̰ge kɔl a cay kɔl koyi gɨŋ bɨ. Na hɨn̰ wo̰ ma, kan kɨya dɨbege gusoŋ-tɔgɛ a cay gusondi gɨŋ bɨ.

⁶ Kɨŋ-gandi kalɨn̰ ma, kɨŋ na duroy kalaŋ ga nee le bɨ. Na Kumu ba togɨgɨŋ ɗe agɨŋ na bɨləŋ kalaŋ ga da Jesu-Kɨris.

⁷ Na toy di hɨn̰ wo̰ ma, ɨŋ wal magtubu di kɛ le bɨgɨŋ kɨŋ-gandi ga a Rɔm ga Kumu lee-toygɨŋ. Ban ba togɨgɨŋ gɨ kɨŋ na bɨl wɨya dan̰ cɨndɨgɨŋ. Kuɗa gɨ Baynagɨŋ Kumu dan̰ Ba-gulɔŋ Jesu-Kɨris laage kuduroy-ɗarwa danagɨŋ bɨ, bɨgɨŋge gusi-dɔbɛ bɨ.

Pol dan̰ ka-aye kudurɔ ga Rɔm

⁸ Hɨnga ga cay wase na, ɨŋ leen̰ Kumu hɨnge ho’o dan̰ gɨyəŋ gɨ da Jesu-Kɨris kol caygɨŋ nɔm, kɨya wa kalaŋ ye kol aye kudurɔ kogɨŋ gon̰ cay gɨsəŋ nɔm.

⁹ Kumu gɨ ɨŋ lee gɨye bii dan̰ kuyoŋdi-gusɨnɨ nɔm a te tɔgɛ bɛrnɛ di da Kɔl-gɨ-Ɗari gɨ ojɨ cay Kurondi le, ɓal lɔɔ tɨmon̰ hɨnge gɨ ɨŋ na woy te ɨrɨme kol caygɨŋ daa daa bɨ, ɨŋ ol Kumu kol caygɨŋ

¹⁰ a boy ɔlɛ hɨnge gɨŋ nɔm bɨ. Ɨŋ woy te ɔlɛ Kumu hɨn̰ gɨ naa kuduroy geye koyi na, ban na hanga gɨyəŋ bəŋ ɗe aŋ na orɨn̰ gusɨgɨŋ.

¹¹ Na cɨndi, tabɨlaŋdi ɔrɛ solgɨŋ ləŋ gɨɗaŋ kɨya ɔrɛ bɨgɨŋ hɨnga ga ni wandɨ ga sayga gusi Turnɔ ɗe-kuduroy-bɛrɛ ɗe agɨŋ ɨrɨn̰ osu.

¹² Ɗɨn̰ gɨ nee le na, ɨŋ gey ɔrɛ gusɨgɨŋ ɗe dan̰ gɨyəŋ gɨ da aye kudurɔ kogɨŋ bɨ hɨnge bɨ na, na-gandi nɔm na na wayan̰ bandɨ.

¹³ Ay, karmɨnɨ ga ban̰aŋ dan̰ ga kandɨ, ɨŋ gey gɨ kɨŋ na sɨla gɨ ɨŋ ojɨ tɨba kondɨ gɨ ni ɔrɛ gusɨgɨŋ, ɨŋ gey gɨ ɗe gɨye-lɔɔnɨ na andaŋ hɨnga duroygɨŋ hɨn̰ gɨ ba andɨn̰ hɨnga duroy kalaŋ ga toyge na Jubɨ naŋ ga ɗaŋ nɔm wo̰ bɨ. Ama ɨŋ ɓala bugoŋ gusɨgɨŋ naŋ bɨrɨŋ gɨsɨn̰ labɨde.

¹⁴ Ojɨ gɨ ɨŋ gɨ ɔrɛ gusi kalaŋ nɔm, kan ga cɨndɨge hangaŋ bɨ, kan ga cɨndɨge hangaŋ naŋ bɨ. Kan ga solge hɨnga bɨ kan ga sɨlage hɨnga naŋ bɨ. Gɨ nee le woy a canɨ hɨn̰ tugɨla wo̰.

¹⁵ Na toy di hɨn̰ wo̰ ma, ɨŋ orɨn̰ dan̰ tabɨlaŋ gɨɗaŋ gɨ ni ɔrɛ tɔgɛ bɛrnɛ Kɔl-gɨ-Ɗari bɨgɨŋ kɨŋ-gandi ga woy a cay ƴaa-di-gumu di Rɔm dɨŋ bɨ.

Dɔnɔ da Kɔl-gɨ-Ɗari

¹⁶ Dasi daŋ a te tɔgɛ bɛrnɛ di da Kɔl-gɨ-Ɗari gɨŋ naŋ bɨrɨŋ. Kɨya wa Kɔl-gɨ-Ɗari na dɔnɔ di da Kumu di ni poɗɨn̰ kalaŋ nɔm ga beege kuduroyge a cay Kɨris, Jubɨn̰əŋ cay wase bɨ, kalaŋ ga toyge na Jubɨ naŋ kardi nee bɨ.

¹⁷ Na cɨndi, Kɔl-gɨ-Ɗari gɨ nee le wasɨn̰ gɨyəŋ gɨ Kumu bɨle kalaŋ leen̰ kalaŋ ga dan̰ durɔ ɗɨngar a cɨndi. Bɨ na dan̰ gɨyəŋ gɨ da aye kudurɔ ɗɔɔ ƴɔbɨ. Waŋ waŋ gɨ ba ay kuduroy le, Kumu solii leen̰ ungo gɨ dan̰ durɔ ɗɨngar a cɨndi. Hɨn̰ gɨ kan ba walɨn̰ duroy Magtubu di da Kumu dɨŋ ye hɨn̰: «Ungo gɨ na ungo gɨ dan̰ durɔ ɗɨngar a cɨn̰ Kumu le, kɨya sɔmɛ-bɨra na dan̰ gɨyəŋ gɨ da aye kudurɔ koyi.»

Kalaŋ nɔm na ka-lɔɔ ɨsɨna

¹⁸ Kuduroy-hɔmɛ da Kumu sayga gɨɗɨgɨ-Kumu gɨŋ baa a cay ka-baa ga da Kumu bɨ, a cay ka-lɔɔ gɨye gɨ dan̰ durɔ ɗɨngar naŋ bɨ, kɨya wa gɨye-lɔɔdɨge gɨ dan̰ durɔ ɗɨngar naŋ le tɨlɨm cay kɔl gɨ cɨndi dugo.

¹⁹ Kɨya wa hɨnga ga ojɨ cay Kumu ga kalaŋ ɓal sɔlɛ le duroyge woy arɨn̰ kol cayge. Kumu gusi koyi dor toyge daa waŋ bɨge.

²⁰ Ungo sɨla Kumu dan̰ tɨdi cay pɨna naŋ, ama an̰ toy jɨne ɓɨrag a te ɗɔɔ gɨ da cay gɨsəŋ le, dɔnɔ toyi di woy dan̰ tumɔɔ bɨ, Kumu gusi bɨ le, woy cɨn̰ tɨwa dɨŋ ɗen̰ ɗen̰ dan̰ gɨyəŋ gɨ da hɨnga se kayi. Na toy di hɨn̰ wo̰ ma, kɨɗɨn̰ ga ni an̰ jɨba unɔ ɨni.

²¹ Kalaŋ solge gɨ Kumu woy nee hage, ama kan̰ge dɨbe gusoŋ-tɔgɛ cayi leen̰ Kumu bɨ, looyi ho’o bɨ. Gɨ ɗe kan na lee hɨn̰ wo̰ na kan laage naŋ, ama kan ɗe ɨrɨmedɨge gɨ kalɨn̰ wo̰ dugo le, orɨn̰ danage dɨbɨge coŋ.

²² Kan solge gusɨge leen̰ ka-muɗɔlɛ, ama leen̰ cɨndi na kan bɨlege na ka-dɨngale.

²³ Kan kɨlangɨge gusoŋ-tɔgɛ gɨ da Kumu gɨ kɨya mare naŋ bɨrɨŋ, dan̰ turnoyi hɨnga se ga kan leege ga gɨlɨn̰ dan̰ ungo gɨ ɨndi gɨ kɨya mare bɨ, dan̰ cɨɗəŋ bɨ, dan̰ kɨmɛnɛ ga tɨbayge poɗɨn̰ bɨ, dan̰ kɨmɛnɛ ga n̰ar dugo bɨ.

²⁴ Na toy di hɨn̰ wo̰ ma, Kumu ɗege a duroy tabɨlaŋdi hɨnga ga lee kɨni ga a kuduroyge, lee gɨ kan dɨbɨn̰ge dasi cay kuyoŋdi-gusɨge koge gɨŋ gaŋ.

²⁵ Kan kɨlangɨge kɔl gɨ da Kumu gɨ cɨndi dan̰ kɔl poy. Kan n̰ɨrge kandɨ se ga da Kumu bɨ leege gɨye bɨge bɨ. Kumu gɨ ba se hɨnga nɔm le kan n̰ɨriige naŋ, ama ojɨ gɨ na ban ma kan ni kɨya hɨramiige dan̰ tumoyge bɨ. Ɗa-ɗe-woy-hɨn̰-wo̰.

²⁶ Na toy di hɨn̰ wo̰ ma, Kumu ɗege a kobi tabɨlaŋdi hɨnga nɔm ga lee dasi ga leege le. Na hɨn̰ wo̰ ma, kandiige malage na ban̰aŋ naŋ ama malge na kamdɨge kandɨ.

²⁷ Ban̰aŋ kalɨn̰ ma ɗege gɨyəŋ gɨ da male tama dan̰ bara coŋ, ama tabɨlaŋdi gusɨge leege a cay gusɨge koge gɨŋ gɨɗaŋ. Lee gɨ kan leege hɨnga ga di dasi dan̰ gusɨge. Na toy di hɨn̰ wo̰ ma, kan wan̰ge hɨnga ga ni cay kɔbɔ gɨ da gɨye-lɔɔdɨge gɨ beege kayaŋ.

²⁸ Kɨɗɨn̰ ga kan hagɨrge sɔlɛ gɨyəŋ gɨ da Kumu na, Kumu ɗege duroy sɔlɛ-hɨnga kage gaŋ le, lee gɨ kan leege hɨnga ga uja ga ni lɔɔ naŋ.

²⁹ Hɨnga ga dan̰ durɔ ɗɨngar naŋ ga toyge kan̰dɨge kan̰dɨge ba wanɨn̰a kuduroyge bɨ: Hɨnga ga nee le na terɨn̰ bɨ, lɔɔ te gursu bɨ, ƴɔmɛ ungo kuduroy bɨ, cɨn̰-pɨɗɨma bɨ, dɨɗe ungo bɨ, bɔjɨn̰ɛ bɨ, lɔɔ jɨba bɨ, lɔɔ solum bɨ, pɔydɛ kɔl bɨ, kuduroy ɨndɨwa bɨ, yɨle kɨɗɨn̰ bɨ.

³⁰ Kan na ka-mɔndɛ guson̰ kamdɨge bɨ, na ka-baa ga da Kumu bɨ, ka-dɔrɛ n̰ərə bɨ, ka-dɔgɛ jorgɨyge bɨ, ka-gɨle gusɨge bɨ, ka-male jɨba di ni loon̰ ɨsɨna bɨ, ka-jɔɔ kɔl kɨbɨ ka-wɔɔdɨge naŋ bɨ.

³¹ Hɨnga sɔlɛ kage unɔ bɨ, na kalaŋ ga ɨrge a cay gasɨndɨge gaŋ naŋ bɨ, na kalaŋ ga kuduroyge dɨmbɨre bɨ, na kalaŋ ga sɨlage cɨn̰-n̰age di da ungo naŋ bɨ.

³² Kan solge gɨ kalaŋ ga ka-lɔɔ hɨnga ga nee le, Kumu na kɨya bɔyɛ kɔl tɨma cayge, ama kan woyge te lɔɔ ɨsɨna mɨjag mɨjag. Kan wɨyage na te lɔɔ ƴɔbɨ naŋ ama kalaŋ ga ɗaŋ ga woyge te lɔɔ kalɨn̰ ma, kan gey danage cay nee bɨ.