Pilemo 1 - Gabri Maja

Pol leen̰ Pilemo lapɨya

¹ Na ɨŋ-bandi Pol gɨ woy dangay dɨŋ kɨya cay Jesu-Kɨris le, ni-gandi dan̰ kurɨndɨna Timote, ni wal dan̰ kɔl gɨ kɛ le gɨyɨn̰ bɨn̰ ji-bandi Pilemo gɨ ni lee-ton̰, ji mɨgayni ba-lɔɔ gɨye bɨ,

² tɨmdɨni Apɨya bɨ, ba-pogɨyni ba-kɨmbɨl Argip bɨ, Ka-Daye ga dayaŋge a duroy ƴaadɨn̰ gɨŋ bɨ.

³ Kuɗa gɨ Baynagɨŋ Kumu dan̰ Ba-gulɔŋ Jesu-Kɨris laage kuduroy-ɗarwa danagɨŋ bɨ, bɨgɨŋge gusi-dɔbɛ bɨ.

Geye gɨ da Pilemo bɨ aye kudurɔ koyi bɨ

⁴ Ay Pilemo, dan̰ wɔlɛ pɨna pɨna kɨɗɨn̰ ga ɨŋ ol Kumu hɨnge na, ɨŋ hɨn can̰ bɨ ɨŋ leen̰ Kumu hɨnge ho’o bɨ.

⁵ Kɨya wa ɨŋ je kol geye kon̰ bɨ kol aye kudurɔ kon̰ bɨ, gɨ ojɨ cay Ba-gulɔŋ Jesu bɨ, ojɨn̰ cay kan ga woyge dan̰ cɨndɨge nɔm bɨ.

⁶ Ji-bandi bɨ, ni-gandi bɨ, aye kudurɔ konagɨŋ toyi na pɨna, bɨ na toy di hɨn̰ wo̰ ma, ɨŋ ol Kumu ɗe aye kudurɔ gɨ nee le, lee gɨye gusɨn̰ ɗe an̰ solɨn̰ hɨnga nɔm ga ɗadɨrdaŋ jɨn̰ tumɔ tumɔ, ga na way te ɔrɛ konagɨŋ dan̰ Kɨris le.

⁷ Ay kurɨnɨ, leen̰ cɨndi na, kol geye kon̰ bəŋ gusi-mɔwa di gumu bɨ, jal kuduronɨ bɨ, kɨya wa hɨnga nɔm ga ji ba lee le dobɨ bandɨ kuduroy kalaŋ ga woyge dan̰ cɨndɨge.

Pol n̰an gɨyəŋ gɨ da Onesim

⁸ Na toy di hɨn̰ wo̰ ma, ɨŋ gey ɔlɛ hɨnga pɨna gusɨn̰. Ɨŋ orɨn̰ dan̰ gɨyəŋ a te bugoŋ pɨna dan̰ Kɨris kona gɨ ni aye nonɨ bɨn̰ gɨ ji na laa hɨnga ga ɨŋ gey.

⁹ Ama na-gandi na gey gusɨna, na toy di hɨn̰ wo̰ ma ɔlɛ hɨnge gɨ ɨŋ gey ɗɔɔ tumon̰ le, ɨŋ gey gɨ ji na laa naa dan̰ guson̰ wandɨ. Əw ɨŋ-bandi Pol gɨ esi bɨ, gɨ ɨŋ woy dangay dɨŋ kol cay Jesu-Kɨris ban̰ nee haw kɛ bɨ le,

¹⁰ ɨŋ olɨn̰ kol cay kuronɨ gɨ a te aye kudurɔ gɨŋ Onesim, gɨ ɨŋ wooyi a dangay dɨŋ.

¹¹ Tumɔ ban jɨbɨ ton̰ naŋ, ama leen̰ cɨndi haw kɛ na, ban bɨle na ba jɨbe ton̰ bɨ, jɨbe tonɨ ɨŋ-bandi bɨ.

¹² Ɨŋ jogɨ gɨyɨn̰ danayi bɨn̰, ban gɨ na kɨway gusɨnɨ le.

¹³ Leen̰ cɨndi, ɨŋ gey gɨ ban na sɨma danaŋ a kɛ. Ɨŋ woy dangay dɨŋ na kol cay tɔgɛ bɛrnɛ di da Kɔl-gɨ-Ɗari bɨ. Ma hɨn̰ gɨ ban na sɨma danaŋ na, ban kɨya ɓale jɨbe tonɨ ban̰dɨn̰.

¹⁴ Ama ɨŋ gey lɔɔ hɨnga pɨna wo̰ ojɨn̰ cayi dɨle gɨ ji na ya əw cay nee naŋ. Hɨn̰ wo̰ na, ji kɨya lɔɔ ɗarwa na kɨya gɨ ɨŋ na ƴomɨn̰ osu naŋ. Ama na kɨya gɨ ji gusɨn̰, ji na gɨsɨ gɨyəŋ gɨ ni lɔɔ ɗarwa danaŋ dɨm.

¹⁵ Gajanaŋ na koldi ma Kumu dor Onesim kobɨn̰ gɨ ni tɨwa lam wo̰, ɗe haw kɛ ban na jogu gusɨn̰ sɔmɛ danan̰ dan̰ tumoyi.

¹⁶ Haw kɛ na, ban na guyɔŋ ƴɔbɨ naŋ, ban kuɗa ɗɨn̰ guyɔŋ coŋ. Ban na kurɨndɨna gɨ ni lee-toy tɔgɨ te aye kudurɔ gɨŋ. Ɨŋ-bandi ɨŋ geyi tɔgɨ bɨ, ji-bandi ji kɨya geyi cɨla ƴee bɨ, kɨya wa ban na ungo gɨ ɨndi hɨn̰ ji-bandi wo̰ bɨ, ba-aye-kudurɔ hɨn̰ ji-bandi wo̰ bɨ.

¹⁷ Hɨn̰ gɨ ji na sɨlaŋ laan̰ kurɨndɨn̰ a te aye kudurɔ gɨŋ na, ƴɨmayi gusɨn̰ hɨn̰ ɨŋ-bandi gusɨnɨ wo̰ bɨ.

¹⁸ Ma hɨn̰ gɨ ban na laan̰ ɨsɨna wala, tugɨla ton̰ na wɨya cayi na, ɗa a canɨ ɨŋ-bandi gusɨnɨ.

¹⁹ Na ɨŋ-bandi Pol ba wale kɨbɨ kɔl gɨ kɛ le dan̰ kɔbɔŋ hɨnge gɨ ɨŋ na gɨ bɔyɛ tugɨla ton̰ le. Ji-bandi kalɨn̰ ma hale gɨybəŋ gɨ ɨŋ na orɨn̰ dan̰ tugɨla a can̰ naŋ. Ɨŋ ye kɔl gɨ kɛ le, na kɨya gɨ ji je kol sɔmɛ-bɨra gɨ dan̰ tumon̰ na a kɨbɨnɨ.

²⁰ Ho’o, ay kurɨnɨ, ji laa ɗarwa di nee le danaŋ kol bugoŋ gɨ na bugoŋ pɨna dan̰ Ba-gulɔŋ. Laa ɗe kuduronɨ ba-dugo kol geye gɨ da Kɨris.

²¹ Na kɨya sɔlɛ gɨ ɨŋ sol gɨ ji kɨya jɔɔ kɔl kɨbɨnɨ ma maŋ walɨn̰ magtubu di kɛ le, ɨŋ sol gɨ hɨnga ga ɨŋ ba ɨngɨrɨn̰ le, ji kɨya lɔɔ ɗe ɗɨn̰ coŋ.

²² Dan̰ kɔl gɨ nee le na, ɨŋ ɨngɨrɨn̰ gɨ ji na ƴɨma cay tɨbay kɨɗɨn̰ sɔmɛ kange a tan̰, kɨya wa ɨŋ kɨya sɔmɛ danan̰. Ɨŋ gam gɨ Kumu kɨya jɔɔ ɔlɛ kogɨŋ kol canɨ bɨ, kan kɨya dɨbəŋ daa mɨnde.

Lapɨya di ni dɨɗɨn̰ kɨbɨ kɔl

²³ Epapəras mɨganɨ gɨ woy a dangay dɨŋ danaŋ kol Jesu-Kɨris le, leegɨŋ lapɨya.

²⁴ Ka-lɔɔ gɨye danaŋ, Marg bɨ, Aristarg bɨ, Demas bɨ, Lug bɨ, leegɨŋge lapɨya.

²⁵ Kuɗa gɨ Ba-gulɔŋ Jesu-Kɨris laa ɗarwa danagɨŋ.