Matɨyo 1 - Gabri Maja

Te mon̰ gɨ da Jesu

¹ Magtubu da te mon̰ gɨ da Jesu-Kɨris ba kɛ: Ban na kungan̰ Dabid dan̰ kungan̰ Abɨraham.

² Abɨraham wɔɔ Isag, Isag wɔɔ Jagob, Jagob wɔɔ Juda dan̰ karmii.

³ Juda dan̰ Tamar wɔɔge Parɛs bɨ Jera bɨ. Parɛs wɔɔ Ɛsrɔm, Ɛsrɔm wɔɔ Aram.

⁴ Aram wɔɔ Aminadab, Aminadab wɔɔ Naso̰, Naso̰ wɔɔ Salmo.

⁵ Salmo dan̰ Rahab wɔɔge Booj. Booj dan̰ Rudɨ wɔɔge Obɛd, Obɛd wɔɔ Jese.

⁶ Jese wɔɔ kɨlma Dabid. Dabid dan̰ tam Uri wɔɔge Salomo.

⁷ Salomo wɔɔ Robowam. Robowam wɔɔ Abɨya, Abɨya wɔɔ Asa.

⁸ Asa wɔɔ Josapad, Josapad wɔɔ Joram, Joram wɔɔ Ojɨyas.

⁹ Ojɨyas wɔɔ Yotam, Yotam wɔɔ Agaj, Agaj wɔɔ Ejegɨyas.

¹⁰ Ejegɨyas wɔɔ Manase, Manase wɔɔ Amo̰, Amo̰ wɔɔ Jojɨyas.

¹¹ Jojɨyas wɔɔ Jegonɨyas bɨ, karmii bɨ. Na boy ɨlgedi gɨ nee gɨŋ le ma, kan ƴomge karɨn̰ Ɨsɨrayɛl orɨn̰ge danage a Babilɔn.

¹² Kardi ɔrɛ gɨ da karɨn̰ Ɨsɨrayɛl a Babilɔn na, Jegonɨyas wɔɔ Salatɨyɛl, Salatɨyɛl wɔɔ Jorobabɛl.

¹³ Jorobabɛl wɔɔ Abihud, Abihud wɔɔ Elɨyagim, Elɨyagim wɔɔ Ajor.

¹⁴ Ajor wɔɔ Sadɔg, Sadɔg wɔɔ Agim, Agim wɔɔ Elɨyud.

¹⁵ Elɨyud wɔɔ Eleyajar, Eleyajar wɔɔ Matan, Matan wɔɔ Jagob.

¹⁶ Jagob wɔɔ Jɨsɛb Mari kudurɔ, bɨ Mari wɔɔ Jesu, kan teeyige na Kɨris.

¹⁷ Ɨni na, ayɨn̰ toy a cay Abɨraham bɨrɨŋ andɨn̰ a cay Dabid na, te mon̰ nɔm ga woyge boy nee na mɔjɨ-cayge-poɗɨn̰. Bɨ ayɨn̰ toy a cay Dabid bɨrɨŋ andɨn̰ a cay ɨlge gɨ orɨn̰ge dan̰ kalaŋ a Babilɔn na, te mon̰ na mɔjɨ-cayge-poɗɨn̰ bɨ, ayɨn̰ toy a cay ɨlge gɨ orɨn̰ge dan̰ kalaŋ a Babilɔn bɨrɨŋ andɨn̰ a boy ɨlge gɨ da Kɨris gɨŋ na, te mon̰ na mɔjɨ-cayge-poɗɨn̰ bɨ.

Wɔɔ gɨ da Jesu-Kɨris

¹⁸ Wɔɔ gɨ da Jesu-Kɨris le woy na hɨn̰ wo̰: Ƴoyi di ni Mari le, na ɗe kujɔ da Jɨsɛb. Ama kɨɗɨn̰ ga kan ƴage gusɨge naŋ ƴee bɨ ga ma, hɨndi ƴee kur dan̰ gɨyəŋ gɨ da Turnɔ ɗe-kuduroy-bɛrɛ.

¹⁹ Jɨsɛb ba-kujɔdo le na ungo gɨ dan̰ durɔ ɗɨngar, ban gey dɨbe dasi caa cɨn̰ kalaŋ naŋ. Lee gɨ ban ɨrɨm dɔrɛ kobi jaŋ coŋ guso.

²⁰ Kɨɗɨn̰ ga ban woy te ɨrɨme ƴee bɨ ga ma, ba-ƴɔbɛ gɨ daa nii gɨ da Ba-gulɔŋ andaŋ cayi duroy sɔndɛ gɨŋ, yeyi hɨn̰: «Jɨsɛb, kungay Dabid, ji ɗɔɔ ba hundɔrɔ gɨ ni kan̰e ƴɔɔ Mari coŋ naŋ. Kɨya wa kur gɨ hɨndi ƴee le, na dan̰ gɨyəŋ gɨ da Turnɔ ɗe-kuduroy-bɛrɛ.

²¹ Hɨndi kɨya wɔɔ kɨye gɨ bara, ji kɨya se gusondi na Jesu, kɨya wa na ban ba kɨya pɔɗɛ te kalaŋ kayi kɨbɨ ɨsɨna koge gɨŋ.»

²² Hɨnga ga nee le nɔm, ɨrga hɨn̰ wo̰ ɗe kɔl gɨ Ba-gulɔŋ ba ye dan̰ gɨyəŋ gɨ da ba-yɔɔ-kɔl-gɨ-Kumu-ba-yɔɔ le, na or kɨɗɨn̰dɨge gaŋ. Kɔl gɨ ban ba ye le ba kɛ:

²³ «Sɨlagɨŋ, tɨmbali di cɨl kɨya ƴɔɔ kur bɨ, Kɨya wɔɔ kɨye gɨ bara, Kan kɨya se gusondi na Emanɨwɛl.» Duroy na Kumu dananagɨŋ.

²⁴ Kɨɗɨn̰ ga Jɨsɛb say lɨbɨ cay kuŋ gaŋ na, ban lee hɨnga ga ba-ƴɔbɛ gɨ daa nii gɨ da Ba-gulɔŋ ba yeyi le, lee gɨ ban ƴoo gorɨn̰ ƴaa danaa.

²⁵ Ama ban wɨyan̰ danaa naŋ bɨrɨŋ gɨsɨn̰ gɨ hɨndi woon̰ kɨye gɨ nee le. Mari wɔɔ kɨye gɨ bara bɨ Jɨsɛb si gusondi naa Jesu.