Kɔl-gɨ-Ɗari gɨ Lug wal 15 - Gabri Maja

Jesu dan̰ ka-lɔɔ ɨsɨna

¹ Ɨni na, ka-hɔgɛ lambo dan̰ ka-lɔɔ ɨsɨna nɔm ɨrgage gusi Jesu kɨya togɨyiige.

² Ɨni na, Parɨsɨn̰an̰əŋ dan̰ ka-gɨlɨn̰ kalaŋ gasɨn̰-kɔl gɨ da Moyis yɨliige yege hɨn̰: «Sɨlagɨŋ gɨlmi gɨ kɛ le ƴom ka-lɔɔ ɨsɨna gusi bɨ, di dɔɔ danage bɨ.»

Kɨradi-kɔl gɨ ojɨ cay dɨmangɨ di kayaŋ

³ Ɨni na, ban ay kɨradi-kɔl yege hɨn̰:

⁴ «Na waŋ duroygɨŋ, ma na ɨran̰ dan̰ gamge aru ma di pɨna na kayaŋ, ma kɨya ɗɔɔ kan ga toyge dɨngɛsɨ cayge dɨngɛsɨ duroy dal dɨŋ coŋ bɨ, kɨya ɔrɛ male hɨndi di kayaŋ le bɨrɨŋ wayoo naŋ ga?

⁵ Bɨ kɨɗɨn̰ ga ban na wayaa ɨni na, gusi kɨya moy bɨ ban kɨya ayoo dɔgɔɔ cay man̰ kobi gɨŋ

⁶ kɨya jogɨn̰ ɨndi. Bɨ kɨɗɨn̰ ga ban na bugoŋ ɨndi ɨni na, ban kɨya tɔgɛ ka-pogɨn̰ii dan̰ ka-durdi bɨ yoge hɨn̰: “Laagɨŋ gusi-mɔwa danaŋ kɨya wa ɨŋ way dɨmangɨ tɨnge di ba kayaŋ le.”

⁷ Aŋ yəgɨŋ da waŋ, kɨya wɔyɛ na hɨn̰ wo̰ kɨya ba-lɔɔ ɨsɨna pɨna nɛŋ gɨ bɨle gɨye-lɔɔdi ɗɨn̰ kan ga toyge-dɨngɛsɨ-cayge-dɨngɛsɨ ga ɨrɨm gɨ ke na ɨran̰ dan̰ n̰age di bɨle gɨye-lɔɔdɨge naŋ.»

Kɨradi-kɔl gɨ da sɨle di baa kayaŋ

⁸ «Naŋ le, kɛ na tama di ani ma hɨn̰ gɨ hɨndi na ɨran̰ dan̰ sɨle mɔjɨ kɔbɔ, ma di pɨna di ɓal cay kobɨ ba-lɔɔ gɨye gɨ ni wɔlɛ pɨna na ba kayaŋ na, hɨndi gɨ tale tɨwa lamba dɨŋ sarɨn̰ kɨɗɨn̰ bɔr bɔr malɨn̰ bɨrɨŋ wan̰ naŋ ga?

⁹ Bɨ kɨɗɨn̰ ga hɨndi na waa sɨle tɔɔ di ba ba kayaŋ le na, hɨndi kɨya tɔgɛ ka-pɔgɨn̰oo ga kandɨ dan̰ ka-durdo bɨ yoge hɨn̰: “Laagɨŋ gusi-mɔwa danaŋ kɨya gɨ ɨŋ way sɨle tɨnge di ba baa kayaŋ le.”

¹⁰ Aŋ yəgɨŋ daa waŋ, gusi-mɔwa kɨya wɔyɛ a da ka-ƴɔbɛ ga daa nii da Kumu na hɨn̰ wo̰ bɨ, kɨya ba-lɔɔ ɨsɨna pɨna nɛŋ gɨ ba bɨle gɨye-lɔɔdi.»

Kɨradi-kɔl gɨ da kuroŋ gɨ kayaŋ

¹¹ Jesu jɨga yege kɨradi-kɔl gɨ ɗaŋ coŋ hɨn̰: «Gɨlmi gɨ pɨna wo̰ orɨn̰ dan̰ karɨn̰ ban̰aŋ won̰ sɔɔ.

¹² Ban gɨ n̰əŋ le yen̰ bayi hɨn̰: “Banɨ, bəŋ hɨnga ga ni wɔɔ kange ga ojɨ canɨ.” Ɨni na, bay gosɨn hɨnga wɔɔdi bɨn̰ karɨndi ga sɔɔ le.

¹³ Wɔlɛ lam wo̰ kardi nee bɨ na, ban gɨ n̰əŋ le kɨl hɨnga wɔɔdi nɔm coŋ bɨ, san̰ orɨn̰ cay gɨsəŋ ga hən̰ gaŋ. Bɨ mondɨn̰ hɨnga wɔɔdi nɔm coŋ boy bayda dɨŋ.

¹⁴ Kɨɗɨn̰ ga ban mondɨ gursudi nɔm coŋ ɨni na, badɨra di gumu baa a cay gɨsəŋ ga nee le bɨ, hɨnga ga ni dɔɔ ay te wɨyii.

¹⁵ Ɨni na, ban or lɔɔ gɨye a da gɨlmi gɨ pɨna wo̰, a cay ƴaadi nee dɨŋ le. Gɨlmi le gɨyii duroy yage koyi gɨŋ, sɔbɨrɛ gɔsɨyɔŋn̰əŋ.

¹⁶ Kuroŋ le gey dɔɔ wɔɔdi sɨya gɨ kalaŋ bɨn̰ gɔsɨyɔŋn̰əŋ ay na dɨɗɨn̰ kurɔŋdi, ama ungo pɨna aya bii naŋ.

¹⁷ Ɨni na, ban ay te ɨrɨme a cay hɨnga ga ba leeyi bɨ, yen̰ gusi hɨn̰: “Kalaŋ ka-lɔɔ gɨye wɨyan̰ge mɨna a da banɨ, diige hɨn̰ gɨ kuduroyge gey wo̰ ma ɨŋ-bandi ma maŋ marɨn̰ kuroŋ won̰ wo̰ ga?

¹⁸ Ɨŋ kɨya sɔ ɔrɛ gusi banɨ bɨ, ɨŋ kɨya yoy hɨn̰: Banɨ, ɨŋ lee ɨsɨna dan̰ Kumu bɨ, danan̰ bɨ.

¹⁹ Ɨŋ ɓala gɨ ji kɨya sɔlɔŋ loon̰ kurondɨn̰ naŋ. Ƴɨmaŋ gusɨn̰ hɨn̰ ba gɨye kon̰ wo̰.”

²⁰ Bɨ ban say jogɨ a da bayi. «Kɨɗɨn̰ ga ban baa hən̰ dan̰ ƴaa ƴee na, bayi solii bɨ sol cɨn̰-n̰agedi gɨɗaŋ wo̰: Bɨ ban gɨre yal cɨndi bɨ, baa kordi ƴomii gasɨbi.

²¹ Kɨɗɨn̰di ga nee gaŋ le bɨ, kurɔŋ le yen̰ bay hɨn̰: “Banɨ, ɨŋ lee ɨsɨna tumoy Kumu bɨ tumon̰ bɨ, ɨŋ ɓala gɨ ji kɨya sɔlɔŋ leen̰ kurondɨn̰ naŋ.”

²² Ama bayi yen̰ dan̰ gɔyɔŋ kayi hɨn̰: “Ɨren̰gɨŋ dan̰ gumɔjɨ gɨ sɨngɨɗɨ gɨ kuɗa le haw dɨbayigɨŋ gusi bɨ, dɨbayigɨŋ gambaŋ kobi bɨ, tɨbaygɨŋ gɨyabe tɨbayi bɨ.

²³ Ɨren̰gɨŋ dan̰ kurɨn̰ si gɨ ɨn ɗɔb ɗɔb le dɨɗiigɨŋ ana dɨgɨŋ leen̰ gusi-mɔwa.

²⁴ Kɨya wa kuronɨ gɨ kɨŋ ba solii kɛ le, na ungo gɨ ma, ma ban boy lɨbɨ, ban na ungo gɨ kayaŋ coŋ ma maŋ wayi bɨ.” Bɨ kan ay te lɔɔ gusi-mɔwa.

²⁵ «A boy tɨwadi di nee dɨŋ le, kurondi gɨ esi baa a duroy yage gɨŋ ƴee. Kɨɗɨn̰ ga ban jɨga bugoŋ mɨnde dan̰ ƴaa ɨni na, ban je noy dɨɗe dan̰ sɔ gɨ ni gusi-mɔwa.

²⁶ Bɨ ban te ba gɨye gɨ pɨna duroy marɨne ka-gɨye bɨ, ɨngɨrii ye hɨn̰ na wa ba lɔɔ hɨnga ga?

²⁷ Ban dɨbii cay nee yeyi hɨn̰: “Na kurdɨn̰ ba jɨga, ma ban̰ dɨɗɨ dan̰ kurɨn̰ si gɨ ɨn ɗɔb ɗɔb le, kɨya gɨ ban way kurdɨn̰ le dan̰ ɗarway.”

²⁸ Ɨni na, kurundi gɨ esi le, lee kuduroy hɔmɛ bɨ, kan̰ ɔrɛ duroy ƴaa gɨŋ. Bayi andaŋ olii ɗe ban na or ƴen̰.

²⁹ Ama ban jɨga dɨbɨn̰ bayi cay nee ye hɨn̰: “Sɨla, ɨŋ lee gɨye danan̰ ɓal ɨlge kondɨ dɨle nɔɔ cay gasɨndɨn̰. Ama cay pɨna kalɨn̰ ma mɨn̰ dɨɗɨ karɨn̰ tuu ga dḛ wo̰ bəŋ, ni dan̰ ka-pogɨn̰ɨnɨ ni laan̰ gusi-mɔwa naŋ.

³⁰ Ama kɨɗɨn̰ ga kurondɨn̰ gɨ ba ɨre kɛ, gɨ ba mɔndɛ hɨnga wɔɔdɨn̰ nɔm coŋ, dan̰ kandɨ ka-male ban̰aŋ ba jɨga na, ji dɨɗɨ si gɨ ɨn ɗɔb ɗɔb kol cayi.”

³¹ Ɨni na, bayi le ye hɨn̰: “Kuronɨ, ji ban ji som danaŋ kɛ dan̰ wɔlɛ pɨna pɨna bɨ, hɨnga wɔɔnɨ nɔm na kan̰ ji.

³² Ama ojɨ gɨ na ləgɨŋ dɔɔ ten̰gɨŋ pɨre bɨ, leen̰gɨŋ gusi-mɔwa bɨ, kɨya wa kurdɨn̰ gɨ ba kɛ le, ban na ungo gɨ ma, ma ban boy lɨbɨ bɨ, ban na ungo gɨ kayaŋ, ma maŋ wayi bɨ.”»