Galad 1 - Gabri Maja

Pol leen̰ kalaŋ ga Galad lapɨya

¹ Na ɨŋ-bandi Pol ba-gɨre-gɨye, ba gɨyɨn̰ dan̰ magtubu di kɛ le. Ɨŋ gɨr gɨye na dan̰ te tumɔ da kalaŋ naŋ bɨ, dan̰ kuduroy geye koge naŋ bɨ, ama na dan̰ te tumɔ da Jesu-Kɨris bɨ, da Bayna Kumu gɨ boyi lɨbii duroy kalaŋ ga madɨrdaŋ gaŋ bɨ.

² Na ɨŋ-bandi bɨ, karmɨnɨ nɔm ga danaŋ bɨ le, ba gɨyɨn̰ dan̰ magtubu di kɛ le. Ni gɨyɨn̰ bɨn̰ na kalaŋ ga a duroy Ka-Daye ga a cay gɨsəŋ ga Galasi gaŋ.

³ Kuɗa gɨ Baynagɨŋ Kumu dan̰ Ba-gulɔŋ Jesu-Kɨris laage kuduroy-ɗarwa danagɨŋ bɨ, bɨgɨŋge gusi-dɔbɛ bɨ.

⁴ Jesu-Kɨris, na ban gɨ ba ɗɔɔ gusi dan̰ kuduroy geye gɨ da Bayna Kumu, kɨya cay ɨsɨna konagɨŋ, ay na dornagɨŋ a duroy hɨnga ga ɨsɨni gaŋ ga cay gɨsəŋ gaŋ kɛ coŋ.

⁵ Kuɗa gɨ gusoŋ-tɔgɛ wɨya kɨya cay Kumu ɨlge dan̰ ɨlge! Ɗa-ɗe-woy-hɨn̰-wo̰.

Kɔl-gɨ-Ɗari na pɨna hayi ƴɔbɨ

⁶ Kɔl kayaŋ sɛl sɛl kɨya wa kɨŋ bɨle kardɨgɨŋ dan̰ gɨre gɨ daa wo̰ bɨn̰ Kumu, ban gɨ ba togɨgɨŋ dan̰ gɨyəŋ gɨ da ɗarwa di sayga gusi Jesu-Kɨris le, kɨya kɔbɛ kardi tɔgɛ bɛrnɛ Kɔl-gɨ-Ɗari gɨ ɗaŋ.

⁷ Leen̰ cɨndi na, Kɔl-gɨ-Ɗari gɨ ɗaŋ unɔ, ama ɨŋ yəgɨŋ kɔl gɨ nee le hɨn̰ wo̰, na kɨya cay kalaŋ ga ka-tɔbɨdɛ kɔl duroygɨŋ. Kan geyge bɨle kɔl gɨ ɗari gɨ da Kɨris le ɗaŋ.

⁸ Ama hɨn̰ gɨ naa na-gandi gusɨna, wala na ba-ƴɔbɛ gɨ da Kumu gɨ pɨna wo̰, gɨ sayga daa nii gusii ma na tɨga bɛrnɛ di da Kɔl-gɨ-Ɗari gɨ toyi kan̰di gɨ ɨra dan̰ gɨ ni ba-gɨlgɨŋ tumɔ naŋ na, ɗe gɨ ɓɨse ƴɨma cayi

⁹ Ni naa yəgɨŋ tumɔ ɨni, ma maŋ jɨga labɨde yəgɨŋ ɗaŋ coŋ: Hɨn̰ gɨ ungo gɨ pɨna wo̰ na tɨga bɛrnɛ di da kɔl-gɨ-ɗari gɨ na wɨya hɨn̰ gɨ kɨŋ ba bee kuduroygɨŋ cay nee naŋ ɨni na, ɗe gɨ ɓɨse ƴɨma cayi.

¹⁰ Kɛ ɨŋ mal na gɨ kalaŋ na hɨramaŋge ga? Naŋ, na hɨrame gɨ da Kumu ma maŋ gey. Kɛ ɨŋ mal na gɨ kalaŋ gusɨge na mooge canɨ ga? Hɨn̰ gɨ ɨŋ ni na mala gɨ ni ƴɔɔ cɨn̰ kalaŋ ɗaŋ coŋ na, ɨŋ ni kɨya bɨləŋ marɨna ba-gɨye gɨ da Kɨris naŋ ɨni.

Bɨle gɨ Pol bɨle ba-gɨre-gɨye

¹¹ Ay, karmɨnɨ ga ban̰aŋ dan̰ ga kandɨ, ɨŋ yəgɨŋ daa waŋ, Kɔl-gɨ-Ɗari gɨ ɨŋ ba tee bɛrnɛ di kɛ le, saa na gusi ungo gɨ ɨndi naŋ.

¹² Kɨya wa ɨŋ ƴa na kobɨ ungo naŋ bɨ, ungo ba gɨləŋ naŋ bɨ. Ama na Kumu ba wasɨn̰e cay Jesu-Kɨris bəŋ.

¹³ Kɨya wa kɨŋ je kol gɨye-lɔɔnɨ gɨ jɨne, kɨɗɨn̰ ga ɨŋ ba leen̰ gɨye bɨn̰ Kumu dan̰ gɨyəŋ gɨ da kalaŋ ga ni Jubɨ le. Ɨŋ gɨlɨn̰ Ka-Daye ga da Kumu kayi cɨn̰-gɨle-cɨn̰ dan̰ man̰e tɔgɨ bɨ, ɨŋ leege hɨnga ga ɨsɨni tɔgɨ bɨ.

¹⁴ Karmɨnɨ Jubɨ ga ɨlge di ni ɓalɨn̰ le, ɨŋ lee gɨye bɨn̰ Kumu dan̰ gɨyəŋ gɨ da kalaŋ ga ni Jubɨ ɗige. Kɨya wa gusɨnɨ-hɨmbalaŋ tɔgɨ a cay hɨnga ga ni te mon̰ ga da mon̰inagɨŋ ɗɨn̰ ga pɨna kondɨ.

¹⁵ Ama Kumu dan̰ ɗarwa toyi, ban dɔrɔŋ kɨɗɨn̰ ga ɨŋ ban̰ kuduroy ƴonɨ gaŋ ƴee bɨ, təŋ gɨ ɨŋ na laa gɨye bii.

¹⁶ Bɨ kɨɗɨn̰ ga ban wasɨn̰ cay Kurondi bəŋ, ɗe gɨ ɨŋ na tɨga bɛrnɛ kɔl koyi gɨ ɗari bɨn̰ kalaŋ ga toyge na Jubɨ naŋ le, ɨŋ ɨra gusi ungo pɨna wo̰ ɨngɨrii kɔl naŋ bɨ,

¹⁷ kalaŋ ga na ka-gɨre-gɨye wase tumɔnɨ le, ɨŋ ɨra sɨlage a Jerusalɛm naŋ bɨ. Ama ɨŋ say kɨlaw or na a cay gɨsəŋ ga Arabi gaŋ. Kardi nee na, ɨŋ bɨlgɨ canɨ jɨga a cay ƴaa-di-gumu di Damas dɨŋ.

¹⁸ Ɨlge sɨbɨ kardi nee na, ɨŋ say or a Jerusalɛm aŋ na sɔlɛ Kepas gɨ ɨŋ sɨlayi tumɔ naŋ ƴee bɨ, ɨŋ somɨn̰ danayi wɔlɛ mɔjɨ-cay-bay.

¹⁹ A wɔlɛdi gɨ nee gɨŋ le, ɨŋ usɨboŋ dan̰ ba-gɨre-gɨye gɨ ɗaŋ pɨna wo̰ naŋ, ama na Jag Ba-gulɔŋ kurɨndi ƴɔbɨ.

²⁰ Ɨŋ yəgɨŋ na a tumoy Kumu, kɔl nɔm gɨ ɨŋ ba wal kɛ le, na kɔl gɨ ni poy naŋ.

²¹ Kardi nee na, ɨŋ say or a cay gɨsəŋ ga Siri gaŋ dan̰ ga Sɨlisi gaŋ bɨ.

²² A boy wɔlɛdi gɨ nee le, kalaŋ ga a duroy Ka-Daye ga da Kɨris ga a cay gɨsəŋ ga Jude gaŋ, waage cɨnɨ sɨlage naŋ ƴee.

²³ Na kɔl gɨ kalaŋ ga ɗaŋ yege kol canɨ ƴɔbɨ ma kan jege. Kalaŋ yege hɨn̰: «Ungo gɨ tumɔ gɨ ba gɨlnagɨŋ cɨn̰-gɨle-cɨn̰ le, labɨde ɨre tee bɛrnɛ kol aye kudurɔ, gɨ ban gey mɔndɛ coŋ le.»

²⁴ Lee gɨ kan hɨramge Kumu kol canɨ.