Kɔlɔs 1 - Gabri Maja

Pol leen̰ kalaŋ ga Kɔlɔs lapɨya

¹ Na ɨŋ-bandi Pol, ba-gɨre-gɨye gɨ da Jesu-Kɨris dan̰ gɨyəŋ gɨ da kuduroy geye gɨ da Kumu bɨ, kurɨndɨna Timote bɨ,

² ni-gandi ni ləgɨŋ lapɨya kɨŋ-gandi ka-karme ga ban̰aŋ dan̰ ga kandɨ ga bugoŋge pɨna dan̰ Kɨris ga woyge dan̰ cɨndɨge bɨ, ga ɨrege a cay tɨbayge dɨŋ bɨ, ga somge a cay ƴaa-di-gumu di Kɔlɔs dɨŋ. Ɗe gɨ Bayna Kumu laa ɗarwa danagɨŋ bɨ bɨgɨŋ gusi-dɔbɛ bɨ.

Ɔlɛ gɨ da Pol bɨ ho’o bɨ

³ Ni leen̰ Kumu, Ba-gulondɨnagɨŋ Jesu-Kɨris Bayi ho’o dan̰ wɔlɛ pɨna pɨna, kɨɗɨn̰ ga ni ol Kumu kol caygɨŋ.

⁴ Kɨya wa ni je kol aye kudurɔ kogɨŋ, kol bugoŋ pɨna dan̰ Jesu-Kɨris bɨ, kol geye gɨ kɨŋ gey kalaŋ ga woyge dan̰ cɨndɨge nɔm bɨ.

⁵ Kɨŋ lee hɨnga ga nee le, na kɨya gɨ kɨŋ bee ɨrɨmedɨgɨŋ a cay hɨnga ga Kumu ƴom cay tɨbayge kol caygɨŋ a gɨɗɨgɨ-Kumu gɨŋ. Bɛrnɛ da kɔl gɨ cɨndi da Kɔl-gɨ-Ɗari gɨ naa kan ba tee bɛrnɛdi bɨgɨŋ le, ma na te hɨnga ga kɨŋ been̰ ɨrɨmedɨgɨŋ cay nee.

⁶ Kɔl-gɨ-Ɗari gɨ nee le or bɨrɨŋ andaŋ gusɨgɨŋ. Ban ƴee cay gɨsəŋ nɔm bɨ, wɔɔ karɨndi bɨ, or dan̰ cɨndi jɨn̰ tumɔ tumɔ hɨn̰ gɨ ba won̰ duroy gɨŋ wo̰ bɨ. Ayɨn̰ toy a boy wɔlɛ gɨ kɨŋ ba jen̰ kɔl bɨ, solɨn̰ ɗarwa di da Kumu leen̰ cɨndi bɨ.

⁷ Na Epapəras mɨgayni marɨna ba-gɨye gɨ ni lee-toyi ba tumɔ gɨlgɨŋ Kɔl-gɨ-Ɗari gɨ nee le. Ban na ba lɔɔ gɨye gɨ da Kɨris gɨ ɨre a cay tɨbayi dɨŋ bɨ, ƴee ban̰dɨni duroygɨŋ bɨ.

⁸ Ban yeni kɔl gɨ ojɨ cay geye gɨ Turnɔ ɗe-kuduroy-bɛrɛ bɨgɨŋ.

⁹ Na toy di hɨn̰ wo̰ ma, ni-gandi kalɨn̰ ma, ayɨn̰ toy a boy wɔlɛ gɨ kɔl gɨ nee le ba ba sɨmayni na, ni dɨl ɔlɛ Kumu kol caygɨŋ naŋ. Ni ol Kumu ɗe na baa danagɨŋ ɗe agɨŋ solɨn̰ hɨnga nɔm ga kuduroyi gey dan̰ gɨyəŋ gɨ ni cɨn̰-muɗɔlɛ bɨ, cay bɨra ojɨn̰ cay hɨnga nɔm ga Turnɔ ɗe-kuduroy-bɛrɛ ba bee bɨ.

¹⁰ Ɗe gɨ gɨye-lɔɔdɨgɨŋ bugoŋ pɨna dan̰ gɨ da Ba-gulɔŋ ɗe agɨŋ ƴen̰ cɨndi mɨjagɨ. Hɨnga nɔm ga kɨŋ kɨya lɔɔ le na ga ɗari bɨ, kɨŋ kɨya sɔlɛ Kumu cɨndɨgɨŋ tumɔ tumɔ bɨ.

¹¹ A duroy tɨwa nɔm na, kuɗa gɨ Kumu bɨgɨŋ tɔgɨ a duroy hɨnga nɔm, dan̰ gɨyəŋ gɨ da dɔnɔ di orɨn̰ dan̰ gusoŋ-tɔgɛ koyi ɗe agɨŋ ɓalɨn̰ ƴomɨn̰ kuduroygɨŋ duroy gɨwase gɨŋ nɔm bɨ, dɨbɨn̰ ɗugoygɨŋ bɨ.

¹² Hɨn̰ wo̰ na, kɨŋ laan̰ Bayna Kumu ho’o dan̰ tɨwa nɔm. Kɨya wa ban bɨlna leen̰ kalaŋ ga na ɓal wɔɔ hɨnga ga ni ban̰di-gulɔŋ ga da kalaŋ ga woyge dan̰ cɨndɨge boy dɔɔ-ƴaa asɨn̰a dɨŋ.

¹³ Ho’o, Kumu dornagɨŋ a te dɔnɔ di da dɨlɨm dɨŋ bɨ, orɨn̰ dananagɨŋ a boy dɔɔ-ƴaa gɨ da Kurondi gɨ ban geyi gɨŋ bɨ.

¹⁴ Dan̰ te bugoŋ pɨna dan̰ Kurondi le, Kumu dornagɨŋ beenagɨŋ daa bɨ, ɗe kuduroyi jal cay ɨsɨna konagɨŋ gɨŋ bɨ.

Kɨris bɨ gɨye-lɔɔdi bɨ

¹⁵ Kɨris le na gɨlɨn̰a gɨ da Kumu, Gɨ ungo ɓala solii dan̰ cɨndi naŋ. Ban woy na hɨn̰ kɨye ba cay wase, Gɨ da hɨnga nɔm ga Kumu ɗe.

¹⁶ Leen̰ cɨndi na, Kumu ɗe hɨnga nɔm Ga gɨɗɨgɨ-Kumu gaŋ bɨ, ga a cay gɨsəŋ gaŋ bɨ. Ban lee hɨnga ga kalaŋ ɓalge sɔlɛ dan̰ tɨdɨge bɨ, hɨnga ga kalaŋ ɓalage sɔlɛ dan̰ tɨdɨge naŋ bɨ, na dan̰ gɨyəŋ gɨ da Kurondi. Ga na kali-tɨrɨmbalan̰əŋ bɨ, Hɨnga nɔm ga orɨn̰ dan̰ dɔnɔ dan̰ tɨrɨmbala bɨ, Dɔnɔ ga ka-dɔɔ cay ƴaan̰əŋ bɨ, Kalaŋ ga gusondɨge ye bɨ. Kumu ɗege nɔm na dan̰ gɨyəŋ gɨ da Kurondi bɨ, Na kol cayi ban bɨ.

¹⁷ Kurondi le na tumoy hɨnga nɔm bɨ, Na dan̰ dɔnɔ toyi ma hɨnga nɔm ga Kumu lee le, Woy ban̰dɨge gaŋ bɨ.

¹⁸ Na ban coŋ ma na ba cay Ka-Daye. Ka-Daye na kuyoŋdi-gusi. Ban na ɗɔɔ te hɨnga bɨ, Ban na ba bɔyɛ lɨbe cay wase cɨg cɨg, Duroy kalaŋ ga madɨrdaŋ bɨ. Kumu lee hɨn̰ wo̰ ɗe ban na won̰, Ba cay wase cɨg cɨg gɨ da hɨnga nɔm.

¹⁹ Hɨnga nɔm ga ba wandɨn̰, Gusi Kumu tɛlɛlɛ tɛlɛlɛ le, Wandɨn̰ gusi kurondi bɨ. Kɨya gɨ Kumu ba geye hɨn̰ wo̰,

²⁰ Ɗe hɨnga nɔm ga gɨɗɨgɨ-Kumu gaŋ bɨ, Ga cay gɨsəŋ gaŋ bɨ, Jɨga bugoŋge pɨna danayi, Dan̰ gɨyəŋ gɨ da kurondi bɨ. Na dan̰ gɨyəŋ gɨ da kɨbardi kurondi, Gɨ bugoŋ dugo a cay sɨya-gɨ-dagɨli gɨŋ, Le ma gusi-dɔbɛ woy.

²¹ Kɨŋ-gandi le, tumɔ kɨŋ na kɨrge a cɨn̰ Kumu bɨ, kɨŋ na ka-baa kayi bɨ, dan̰ gɨyəŋ gɨ da ɨrɨmedɨgɨŋ bɨ, dan̰ gɨyəŋ gɨ da gɨye-lɔɔdɨgɨŋ gɨ ɨsɨni bɨ.

²² Ama haw kɛ na, Kumu beegɨŋ pɨna danayi kol cay kuyoŋdi Kɨris dan̰ gɨyəŋ gɨ da tɨmaydi ɗe lee gɨ kɨŋ na andan̰ cɨn̰ Kumu hɨn̰ kalaŋ ga woyge dan̰ cɨndɨge bɨ, ga masadɨge unɔ bɨ, ga ungo ɓala dɨbɨge kɔl cayge naŋ bɨ.

²³ Ama kuɗa gɨ kɨŋ ɨr a cay tɨbaygɨŋ dɨŋ bɨ, tɨbagɨŋ sarnaygɨŋ gag gag dugo bɨ, ɨrɨn̰gɨŋ usa cay nee a te aye kudurɔ gɨŋ. Dɨle gɨ hɨnga wo̰ gɨ dorgɨŋ orɨn̰ danagɨŋ hen̰ dan̰ hɨnga ga kɨŋ bee ɨrɨmedɨgɨŋ cay nee gɨ Kɔl-gɨ-Ɗari ba bɨgɨŋ le. Kɔl-gɨ-Ɗari gɨ nee le, teege bɛrnɛdi bɨn̰ kalaŋ nɔm ga a cay gɨsəŋ gaŋ. Na ban ma ɨŋ-bandi Pol bɨle ba lɔɔ gɨyedi.

Gɨye gɨ da Pol

²⁴ Haw kɛ na, gusɨnɨ mɔŋ kol cay cɨn̰-gɨle-cɨn̰ di ɨŋ ba way kol caygɨŋ. Leen̰ cɨndi, ɨŋ-bandi dan̰ gusɨnɨ ɨŋ way hɨnga ga ni dɔsɛ-ɗugɔ na kɨya cay guson̰ Kɨris kol ɗarwa di da Ka-Daye ga na kuyoŋdi Kɨris le.

²⁵ Ɨŋ bɨle ba lɔɔ gɨye gɨ da Ka-Daye, na kɨya loon̰ gɨye gɨ Kumu ba bəŋ kɔbɔŋ kol caygɨŋ. Gɨye gɨ nee le, na tɔgɛ bɛrnɛ di da kɔl gɨ da Kumu gɨ ban bəŋ kɔbɔŋ ɗəndəŋ bɨgɨŋ.

²⁶ Kɔl gɨ nee le na hɨnga ga woy kɨɗɨn̰ wɔsɛdɨge gaŋ ga Kumu gam kɨɗɨn̰ wɔsɛdɨge gaŋ ɨlge dan̰ ɨlge le. Haw kɛ ban lee gɨ cɨn̰ kan ga woyge dan̰ cɨndɨge hangaŋ cay nee.

²⁷ Kumu haŋgɨ cɨn̰ kalaŋ ga woy dan̰ cɨndɨge a cay gusoŋ-tɔgɛ bɨ, a cay marɨna gɨ da hɨnga ga tumɔ wosɨ gusɨge duroy kalaŋ ga toyge na Jubɨ naŋ bɨ. Hɨnga ga da Kumu ga woy a kɨɗɨn̰ wɔsɛdɨge gaŋ le, na Kɨris gusi gɨ som a kuduroygɨŋ. Ban kɨya bɨgɨŋ hɨnga ga kɨŋ kɨya bogɨn̰ ɨrɨmedɨgɨŋ cay nee ga kɨya orɨn̰ danagɨŋ a gusoŋ-tɔgɛ koyi gɨŋ bɨ.

²⁸ Na Kɨris gɨ nee le ma mani tee bɛrnɛdi bɨn̰ kalaŋ nɔm. Ni halɨn̰ ungo gɨ ani ani bɨ, ni gɨlɨn̰ ungo gɨ ani ani kɔl dan̰ cɨn̰-muɗɔlɛ nɔm bɨ, ɗe gɨ kalaŋ ga ani ani kalɨn̰ ma na bɨlɨn̰ge kalaŋ ga duroŋ cɨrɛɗ te bugoŋ pɨna dan̰ Kɨris.

²⁹ Na toy di hɨn̰ wo̰ ma, ɨŋ lee gɨye gɨlalɨn̰ kɔɗ kɔɗ bɨ, worɨn̰ɨn̰ dan̰ gɨyəŋ gɨ da tɔgɨ da Kɨris di lee gɨye gusɨnɨ dan̰ dɔnɔ bɨ.